Vidadala Rajini: నా రాజకీయ భవిష్యత్ జగన్‌ పెట్టిన భిక్షే.. మంత్రి భావోద్వేగం

Vidadala Rajini: రాబోయే ఎన్నికల్లో దిక్కులు పిక్కటిల్లేలా జగన్ గెలుపు ఉండబోతుందని ఏపీ వైద్య ఆరోగ్య శాఖ మంత్రి విడదల రజిని అన్నారు. పల్నాడు జిల్లా చిలకలూరిపేట మండలం లింగంగుంట్లలో సీఎం జగన్‌ ‘ఫ్యామిలీ డాక్టర్’ విధానాన్ని ప్రారంభించిన అనంతరం ఏర్పాటు చేసిన బహిరంగ సభలో ఆమె ప్రసంగించారు. చంద్ర బాబు హయాంలో ఆరోగ్య రంగాన్ని అమ్మకానికి పెట్టాడని.. ఆరోగ్య శ్రీని అనారోగ్య శ్రీగా మార్చేశారని ఆమె ఆరోపించారు. చంద్రబాబు హయాంలో వైద్య రంగానికి ఏం చేశాడో చెప్పాలని ఆమె డిమాండ్ చేశారు. నాలుగేళ్లలో ఒక ముఖ్యమంత్రి ఎంత చేయొచ్చో.. సీఎం జగన్‌ ఆరోగ్య రంగంలో చేసి చూపించారని మంత్రి రజిని పేర్కొన్నారు. దుష్టచతుష్టయం ఎన్ని పన్నాగాలు పన్నినా.. భూమి చీలినా.. నింగి కుంగినా.. అన్యాయానికి ఓటమి తప్పదని, చంద్రబాబు టీడీపీ ఓటమి తప్పదని, జగనన్న గెలుపు తథ్యమని ఏపీ ఆరోగ్య మంత్రి విడదల రజిని అన్నారు.

Read Also: AP CM YS Jagan: ఇంటికే వైద్యం.. ఫ్యామిలీ డాక్టర్‌ దేశానికే రోల్‌ మోడల్

చంద్ర బాబు నలుగురు ఎమ్మెల్యే లను కొనగలడు కానీ, జగనన్న కోసం ప్రాణాలు ఇచ్చే నాలుగు కోట్ల మంది ప్రజలను మాత్రం కొనలేడని మంత్రి అన్నారు. ఒక సాధారణ మహిళనైన తనకు ఎమ్మెల్యేగా మంత్రిగా అవకాశం ఇచ్చిన జగనన్నకు జీవితాంతం రుణపడి ఉంటానన్నారు. తన రాజకీయ జీవితం, తన పదవులు, రాజకీయ భవిష్యత్తు మీరు పెట్టిన భిక్షేనంటూ సీఎం జగన్‌ను ఉద్దేశిస్తూ.. భావోద్వేగంతో రజిని కంటతడి పెట్టారు. వైఎస్ రాజశేఖర్ రెడ్డి ఆరోగ్య శ్రీ ద్వారా వైద్య రంగంలో చరిత్ర సృష్టించారని ఈ సందర్భంగా అన్నారు. మళ్ళీ ఇప్పుడు జగన్ ఫ్యామిలీ డాక్టర్ విధానంతో తండ్రికి తగ్గ తనయుడుగా చరిత్ర సృష్టిస్తున్నారని మంత్రి పేర్కొన్నారు. వైఎస్ రాజశేఖర్ రెడ్డి తర్వాత అధికారం లోకి వచ్చిన ఏ నాయకుడు ప్రజా ఆరోగ్యం పై దృష్టి పెట్టలేదన్నారు. మహా నగరాల్లో ధనవంతులకు మాత్రమే ఫ్యామిలీ డాక్టర్స్ ఉంటారని ఆమె స్పష్టం చేశారు. గ్రామాల్లో ఉండే పేదల కోసం ఇక నుంచి ఫ్యామిలీ డాక్టర్‌ ఉండబోతున్నాడని ఆమె పేర్కొన్నారు. ఫ్యామిలీ డాక్టర్‌ పథకం వినూత్నం, విలక్షణం. ఇది జగన్‌ మానసపుత్రిక అని మంత్రి రజిని పేర్కొన్నారు.