AP Govt: ఆ ప్రాంతంలో నివాసం ఉంటున్న పేదలకు శుభవార్త.. శాశ్వత ఇంటి పట్టాల పంపిణీ..

నెల్లూరు నగరంలోని పూలే బొమ్మ సెంటర్ వద్ద నిర్వహించిన ప్రత్యేక కార్యక్రమంలో భాగంగా పేద ప్రజలకు శాశ్వత ఇంటి పట్టాల పంపిణీ వైభవంగా జరిగింది. రాష్ట్ర ముఖ్యమంత్రి నారా చంద్రబాబు నాయుడు వర్చువల్ విధానం ద్వారా ఈ పట్టాల పంపిణీ కార్యక్రమాన్ని ప్రారంభించారు. ఎన్నికల సమయంలో కాలువకట్ట ప్రాంతంలో నివాసముంటున్న పేదలు తమకు శాశ్వత ఇళ్ల పట్టాలు ఇప్పించాలని పురపాలక శాఖ మంత్రి పొంగూరు నారాయణను కోరగా, ఆయన ఇచ్చిన మాట ప్రకారం దీనిని నెరవేర్చారు.

కాలువకట్ట ప్రాంతంలో దాదాపు 22.31 ఎకరాల్లో కొన్ని దశాబ్దాలుగా నివాసం ఉంటున్న పేద ప్రజల సమస్యలను పరిష్కరించేందుకు మంత్రి నారాయణ ప్రత్యేక చొరవ చూపారు. ఈ ప్రక్రియలో ఎదురైన సమస్యలను దాటేందుకు ఐదు వేర్వేరు ప్రభుత్వ శాఖలను సమన్వయం చేసి, కేబినెట్ సమావేశంలో దీనికి ఆమోదముద్ర వేయించారు. ఆ విధంగా ప్రభుత్వ ఆమోదం పొందిన తర్వాత, సుమారు 600 కోట్ల రూపాయల విలువైన 939 శాశ్వత ఇళ్ల పట్టాలను సీఎం చంద్రబాబు నాయుడు వర్చువల్ విధానంలో పేదలకు అందజేశారు.

ఈ నిర్ణయంతో కాలువకట్ట నివాసితుల దశాబ్దాల కలను ప్రభుత్వం నెరవేర్చినట్లయింది. నెల్లూరు సిటీ పరిధిలో పేదల సంక్షేమానికి ప్రభుత్వం అత్యంత ప్రాధాన్యతనిస్తోందని ఈ సందర్భంగా ప్రతినిధులు తెలిపారు. ఇప్పటివరకు నెల్లూరు నగర వ్యాప్తంగా 58 ఎకరాల విస్తీర్ణంలో ఉన్న సుమారు 900 కోట్ల రూపాయల విలువైన 2600 శాశ్వత ఇళ్ల పట్టాలను నిరుపేదలకు పంపిణీ చేసినట్లు వెల్లడించారు. ప్రభుత్వం అందించిన ఈ శాశ్వత హక్కుల ద్వారా పేదల కుటుంబాల్లో కొత్త వెలుగులు నిండాయని, ఇది వారికి ఆర్థిక భద్రతను, సామాజిక గౌరవాన్ని కల్పిస్తుందని అధికారులు, నాయకులు ఆనందం వ్యక్తం చేశారు.