Vaibhav Sooryavanshi: ‘వైభవ్ సూర్యవంశీ ఆడటం చాలా కష్టం.. నాకు నమ్మకం లేదు’.. సంచలన వ్యాఖ్యలు..
- Follow Us :
-
-
Add as a preferred
source on google
ఐపీఎల్ 2026లో తన అద్భుతమైన బ్యాటింగ్‌తో ప్రపంచ క్రికెట్ దృష్టిని ఆకర్షించిన యువ సంచలనం వైభవ్ సూర్యవంశి గురించి ప్రస్తుతం అనేక మంది మాజీ క్రికెటర్లు తమ అభిప్రాయాలు వ్యక్తం చేస్తున్నారు. తాజాగా దక్షిణాఫ్రికా మాజీ దిగ్గజ బ్యాటర్ ఏబీ డివిలియర్స్ కూడా వైభవ్ భవిష్యత్తుపై ఆసక్తికర వ్యాఖ్యలు చేశాడు. వైట్ బాల్ క్రికెట్‌లో అతడు గొప్ప విజయాలు సాధించే సామర్థ్యం కలిగిన ఆటగాడని ప్రశంసించిన డివిలియర్స్, రెడ్ బాల్ క్రికెట్‌లో మాత్రం అతడికి కొన్ని సవాళ్లు ఎదురయ్యే అవకాశం ఉందని అభిప్రాయపడ్డాడు.
ఓ ఏఐ కార్యక్రమంలో మాట్లాడిన డివిలియర్స్, వైభవ్‌ను అసాధారణ ప్రతిభ కలిగిన యువ ఆటగాడిగా అభివర్ణించాడు. అతనిలో టెస్టు క్రికెట్ ఆడే సామర్థ్యం కూడా ఉందని, కానీ అందుకు కావాల్సిన ఓపిక, సాంకేతిక నైపుణ్యాలు, పరిస్థితులకు అనుగుణంగా ఆడే సామర్థ్యాన్ని నిరూపించుకోవాల్సి ఉంటుందని పేర్కొన్నాడు. వైభవ్ నిజంగా రెడ్ బాల్ క్రికెట్‌లో కెరీర్ నిర్మించాలనుకుంటాడా లేదా అనేది కాలమే నిర్ణయిస్తుందని చెప్పాడు.
టెస్టు క్రికెట్‌లో ప్రతి బంతిని జాగ్రత్తగా ఆడాల్సి ఉంటుందని, వైట్ బాల్‌లో కనిపించే దూకుడు అక్కడ ఎప్పుడూ పనిచేయదని డివిలియర్స్ వివరించాడు. అయితే వైభవ్ వద్ద ఉన్న సహజ ప్రతిభ, షాట్ ఎంపిక, ఆత్మవిశ్వాసం అతడిని ఆ సవాళ్లను అధిగమించే స్థాయికి తీసుకెళ్లగలవని అభిప్రాయపడ్డాడు.
ఇదిలా ఉండగా, భారత క్రికెట్ నియంత్రణ మండలి (బీసీసీఐ) ఇటీవల ఇంగ్లండ్-ఐర్లాండ్ పర్యటనతో పాటు ఆసియా క్రీడల కోసం ప్రకటించిన జట్లలో వైభవ్ సూర్యవంశికి చోటు కల్పించింది. ఐపీఎల్‌లో అతడు చూపించిన అసాధారణ ప్రదర్శనకు ఇది గుర్తింపుగా భావిస్తున్నారు. త్వరలోనే టీమిండియా తరఫున అతడు అంతర్జాతీయ అరంగేట్రం చేసే అవకాశాలు కూడా బలంగా కనిపిస్తున్నాయి. ప్రస్తుతం భారత క్రికెట్ అభిమానులందరూ వైభవ్ రెడ్ బాల్, వైట్ బాల్ క్రికెట్ రెండింటిలోనూ ఎలా రాణిస్తాడో ఆసక్తిగా ఎదురుచూస్తున్నారు.