ఉత్తరప్రదేశ్‌లోని ఆగ్రాలో మైనర్ బాలికపై అత్యాచారం జరిగింది. బాలికను ఓ హోటల్ కు తీసుకెళ్లి నిందితుడు అత్యాచారానికి పాల్పడ్డాడు. అంతేకాకుండా.. ఈ ఘటన మొత్తం నిందితుడి స్నేహితులు వీడియో తీశారు. వీడియో తీసిన అనంతరం బాలికను బెదిరించి తన వద్ద నుంచి డబ్బు, ఉంగరం తీసుకున్నారు. కాగా.. ఈ ఘటనలో ఇద్దరు నిందితులను పోలీసులు అరెస్ట్ చేసి జైలుకు తరలించారు. మూడో వ్యక్తి కోసం గాలిస్తున్నారు.
Read Also: AP CM Chandrababu: పుట్టపర్తి సత్య సాయి ట్రస్ట్ విషయంలో సీఎం కీలక కామెంట్లు
వివరాల్లోకి వెళ్తే.. షాహ్‌గంజ్ పోలీస్ స్టేషన్ పరిధిలోని ఓ హోటల్‌లో ఈ ఘటన చోటుచేసుకుంది. బాలిక తొమ్మిదో తరగతి చదువుతుంది. ఆరు నెలల క్రితం సందీప్ అనే యువకుడితో బాలికకు పరిచయమైంది. ఈ క్రమంలో.. సందీప్ బాలిక మొబైల్ నంబర్ తీసుకున్నాడు. ఆ తర్వాత కాల్ చేయడం ప్రారంభించాడు. అయితే.. కలవడానికి బాలిక నిరాకరించడంతో ఫోన్లో బెదిరించడం మొదలుపెట్టాడు. ఈ విషయాన్ని కుటుంబ సభ్యులకు చెప్పకపోవడంతో నిందితుడు హద్దులు మీరాడు. కాగా.. జూలై 17వ తేదీ మధ్యాహ్నం సందీప్ తన స్నేహితుడితో కలిసి బాలిక గ్రామానికి వచ్చాడు. ఇద్దరూ కలిసి బాలికను బలవంతంగా బైక్‌పై తీసుకెళ్లి పథౌలీలోని ఓ హోటల్‌లో బాలికపై సందీప్ అత్యాచారం చేశాడు.
అంతేకాదు మొబైల్‌లో అభ్యంతరకర వీడియోను రికార్డ్ చేశారు. నిందితుడి సహచరులు సాజన్, బాబీ ఉంగరంతో పాటు రూ.15 వేలు తీసుకున్నారు. అనంతరం.. ఈ ఘటనపై బాధితురాలు పోలీసులకు ఫిర్యాదు చేసింది. ఈ ఘటనపై కేసు నమోదు చేసుకున్న పోలీసులు.. నిందితులు సందీప్, సాజన్‌లను ఆదివారం రాత్రి అరెస్టు చేశారు. పరారీలో ఉన్న మరో నిందితుడు బాబీ కోసం గాలింపు చర్యలు చేపట్టారు. రాజ్ రాజేశ్వరి హోటల్‌లో ఈ ఘటన జరిగినట్లు పోలీసులు చెబుతున్నారు. హోటల్ లో రికార్డులు తనిఖీ చేసి.. సీసీ కెమెరాల ఫుటేజీని పరిశీలించారు.