Italy Floods: ఉత్తర ఇటలీలో వరదల బీభత్సం.. 9 మంది మృతి, ఫార్ములా వన్ రేసు రద్దు

Italy Floods: ఉత్తర ఇటలీని వరదలు అతలాకుతలం చేస్తున్నాయి. గతంలో ఎన్నడూ లేని విధంగా వర్షాలు కురుస్తుండటంతో అనేక ప్రాంతాలు వరద నీటిలో మునిగిపోయాయి. వేలాది మంది నిరాశ్రయులుగా మారారు. వేలాది ఎకరాల వ్యవసాయ భూములు నీటమునిగాయి. ఇటలీలోని ఉత్తర ఎమిలియా-రొమాగ్నా ప్రాంతంలో భారీ వర్షం కురవడంతో తీవ్రమైన వరదల కారణంగా కొండచరియలు విరిగిపడటంతో తొమ్మిది మంది మరణించారు. కేవలం 36 గంటల్లో కొన్ని ప్రాంతాల్లో వార్షిక వర్షపాతంలో సగం వర్షపాతం నమోదైందని, దీంతో నదుల్లో ప్రవాహం భయంకరంగా మారిందని పౌర రక్షణ మంత్రి నెల్లో ముసుమెసి తెలిపారు. వర్షపాతం నీరు నదుల వెలుపలకు వచ్చి పట్టణాల గుండా ప్రవహిస్తోందని చెప్పారు. వేలాది ఎకరాల వ్యవసాయ భూములు మునిగిపోయాయని పేర్కొన్నారు.

ఇదిలావుండగా.. అత్యవసర సేవలపై ఒత్తిడిని తగ్గించడానికి, మోటారు రేసింగ్ అభిమానులు ముంపు ప్రాంతంలో గుమిగూడకుండా నిరోధించడానికి వరద ప్రభావిత ప్రాంతాలకు సమీపంలోని ఇమోలాలో ఆదివారం జరగాల్సిన ఫార్ములా వన్ గ్రాండ్ ప్రిక్స్‌ను అక్కడి ప్రభుత్వం రద్దు చేసింది. ఎమిలియా-రోమాగ్నా ప్రాంత అధ్యక్షుడు స్టెఫానో బోనాసిని విలేకరులతో మాట్లాడుతూ.. ‘‘ఇలాంటి పరిస్థితిని ఇంతకు ముందెన్నడూ చూడలేదు. గతంలో ఎప్పుడూ లేని విధంగా అసాధారణ స్థాయిలో వర్షాలు కురిశాయి. అందుకే విపత్కర ఘటనలను ఎదుర్కొంటున్నాం’’ అని అన్నారు. క్రైస్తవ వారసత్వ ప్రదేశాలకు ప్రసిద్ధి చెందిన అడ్రియాటిక్ తీర నగరమైన రవెన్నా తీవ్రంగా ప్రభావితమైంది. దాదాపు 14,000 మందిని వీలైనంత త్వరగా ఆ ప్రాంతం నుండి ఖాళీ చేయవలసి ఉంటుందని స్థానిక అంతర్గత మంత్రిత్వ శాఖ ప్రతినిధి తెలిపారు. 37 పట్టణాలు, కమ్యూనిటీలను వరదలు ముంచెత్తాయని, దాదాపు 120 కొండచరియలు విరిగిపడ్డాయని అధికారులు తెలిపారు. బోలోగ్నా నగరానికి సమీపంలో కనీసం ఒక వంతెన కూలిపోయింది. కొన్ని రోడ్లు వరదనీటిలో మునిగిపోయి ఉన్నాయి. అనేక రైలు సేవలు నిలిపివేయబడ్డాయి.

Read Also: Fighter Jet Engines: ఫైటర్ జెట్ ఇంజిన్ల కోసం అమెరికా, ఫ్రాన్స్‌లతో భారత్ చర్చలు

వర్షాలు తగ్గుముఖం పట్టినప్పటికీ నదుల నీటి మట్టాలు పెరుగుతూనే ఉన్నాయని మండల ఉపాధ్యక్షురాలు ఐరీన్ ప్రియోలో విలేకరులతో అన్నారు. సహాయక చర్యలను పరిశీలించడానికి మే 23న సమావేశం అవుతామని, అందులో వరద ప్రభావిత ప్రాంతాల కోసం 20 మిలియన్ యూరోలు (22 మిలియన్ డాలర్లు) కనుగొనాలని మంత్రివర్గాన్ని కోరనున్నట్లు పౌర రక్షణ మంత్రి ముసుమెసి చెప్పారు. అయితే ఈ ఎమర్జెన్సీ సమయంలో వరద ప్రభావిత ప్రాంతాలకు పన్ను, తనఖా చెల్లింపులను నిలిపివేస్తున్నట్లు ప్రభుత్వ అధికారులు తెలిపారు.