UP: ప్రాణాలు తీసిన డీజే సౌండ్‌.. తరగతి గదిలో బాలిక మృతి

డీజే సౌండ్ కారణంగా ఎన్నో ఇళ్లల్లో దీపాలు ఆరిపోతున్నాయి. చిన్నారుల దగ్గర నుంచి పెద్దోళ్ల వరకు ప్రాణాలు తీస్తున్నాయి. శబ్దాలకు గుండె తట్టుకోలేక ఊపిరి ఆగిపోతున్నాయి. అయినా ప్రభుత్వాలు కళ్లు తెరవడం లేదు. తాజాగా ఉత్తరప్రదేశ్‌లో ఘోరం జరిగింది. డీజే సౌండ్‌తో ఊరేగింపు కారణంగా తరగతి గదిలోనే బాలిక కుప్పకూలిపోయింది. టీచర్ స్పందించేలోపే ప్రాణాలు కోల్పోయింది. ఈ ఘటన తీవ్ర దిగ్భ్రాంతికి గురి చేస్తోంది.

ఉత్తరప్రదేశ్‌లోని బలరాంపూర్‌లో నిమజ్జన ఊరేగింపు జరుగుతోంది. పాఠశాల దగ్గరే పెద్ద శబ్దంతో ఊరేగింపు జరగడంతో 12 ఏళ్ల విద్యార్థిని తీవ్ర అస్వస్థతకు గురైంది. బెంచ్‌పైనే కుప్పకూలిపోయింది. ఉపాధ్యాయురాలు స్పందించి దగ్గరకు వచ్చి పరిశీలించింది. ఆస్పత్రికి తరలించే లోపే ప్రాణాలు కోల్పోయింది. ఈ ఘటనతో అందరూ షాక్‌కు గురయ్యారు. ఇందుకు సంబంధించిన దృశ్యాలు సీసీటీవీ కెమెరాలో చిక్కాయి. కుమార్తె మరణంతో కుటుంబ సభ్యులు కన్నీరుమున్నీరుగా విలపించారు. ఇంకా ఎలాంటి ఫిర్యాదు అందలేదని పోలీసులు తెలిపారు.