TVK Vijay: అలా అయితే మద్దతు విత్‌డ్రా చేసుకుంటాం.. సీఎం విజయ్‌కు కొత్త తలనొప్పి..

TVK Vijay: తమిళనాడులో సీఎం విజయ్, ఆయన పార్టీ టీవీకేకు కూటమి పోరు మొదలైనట్లు కనిపిస్తోంది. ఇటీవల అధికారంలోకి రావడానికి విజయ్‌కు మద్దతు పలికిన లెఫ్ట్ పార్టీలు, వీసీకే వంటి చిన్న పార్టీలు ఇప్పుడు టీవీకేను శాసిస్తున్నాయి. ఈ పార్టీలతో పాటు అసెంబ్లీలో బలనిరూపణ సమయంలో అన్నాడీఎంకే రెబల్ ఎమ్మెల్యేలు 28 మంది విజయ్ ప్రభుత్వానికి మద్దతు ప్రకటించారు. ఈ నేపథ్యంలోనే రెబెల్ ఎమ్మెల్యే వర్గానికి మంత్రి పదవి కేటాయిస్తారనే ప్రచారం తమిళనాడులో జోరుగా కొనసాగింది.

Read Also: Kejriwal: కేజ్రీవాల్ ఎన్నికల్లో పోటీ చేయొద్దనడానికి మీరెవరు? పిటిషనర్‌కు ఢిల్లీ హైకోర్టు చీవాట్లు

అయితే, అన్నాడీఎంకే లేదా దాని రెబల్ వర్గాన్ని కేబినెట్‌లో చేర్చుకుంటే తాము మద్దతు విత్‌డ్రా చేసుకుంటామని సీపీఎం, వీసీకే పార్టీలు హెచ్చరించాయి. దీంతో టీవీకే ఈ విషయంపై స్పందిస్తూ, అలాంటిదేం లేదని చెప్పింది. టీవీకే నేత, మంత్రి అధవ్ అర్జున మాట్లాడుతూ.. అన్నాడీఎంకే వర్గాన్ని ప్రభుత్వంలోకి తీసుకోవడంపై వస్తున్న వార్తల్ని కొట్టిపారేశారు. అదే సమయంలో తమకు మద్దతు ఇస్తున్న సీపీఎం, సీపీఐ, వీసీకే, ఐయూఎంఎల్ వంటి మిత్రపక్షాలను ప్రభుత్వంలో చేరాలని ఆహ్వానించారు. ఇదిలా ఉంటే, టీవీకే మిత్రపక్షాల్లో పెద్దదైన కాంగ్రెస్ ప్రభుత్వంలో భాగస్వామ్యం అవ్వడం దాదాపుగా ఖాయమైంది.

ఇటీవల తమిళనాడు అసెంబ్లీ ఎన్నికల్లో మొత్తం 234 సీట్లకు గానూ టీవీకే 108 చోట్ల విజయం సాధించింది. అయితే, ప్రభుత్వం ఏర్పాటుకు 10 స్థానాలు తక్కువ కావడంతో కాంగ్రెస్, సీపీఎం, సీపీఐ, ఐయూఎంఎల్ మద్దతుతో విజయ్ సీఎంగా ప్రమాణస్వీకారం చేశారు. దీని తర్వాత అన్నాడీఎంకేలోని చీలిక వర్గం కూడా విజయ్‌కు మద్దతు తెలిపింది.