Maharastra: ఔరంగజేబు, టిప్పు సుల్తాన్పై సోషల్ మీడియా పోస్ట్లు.. రణరంగంగా కొల్హాపూర్..
Maharastra: ఔరంగజేబ్ మరియు టిప్పు సుల్తాన్లపై సోషల్ మీడియాలో వివాదాస్పద పోస్ట్లపై మహారాష్ట్రలోని కొల్హాపూర్ నగరం అట్టుడికింది. హిందూ సంస్థలు ఈ రోజు పెద్ద ఎత్తున నిరసన తెలిపాయి. బంద్ కు పిలుపునిస్తూ ఆందోళన నిర్వహించారు. ఔరంగజేబు, టిప్పు సుల్తాన్ ను కీర్తిస్తూ ఓ వర్గం వ్యక్తులు సోషల్ మీడియాలో పోస్టులు పెట్టారు. ఇదే సమయంలో మహారాష్ట్ర ఔనత్యాన్ని కించపరిచేలా, మహారాష్ట్ర జాతీయ చిహ్నాన్ని అగౌరపరిచేలా సోషల్ మీడియాలో పోస్టులు చేశారని హిందూ సంస్థలు ఆరోపించాయి.
Read Also: Gangster Shot Dead: ఉత్తర్ప్రదేశ్లో మరో గ్యాంగ్స్టర్ హతం.. కోర్టులోనే కాల్పులు..
కొల్హాపూర్లోని ఛత్రపతి శివాజీ మహారాజ్ చౌక్ వద్ద నిరసనకారులు కొన్ని దుకాణాలు మరియు వాహనాలను ధ్వంసం చేయడంతో నిరసన హింసాత్మకంగా మారింది. సోషల్ మీడియాలో పోస్టులు పెట్టిన వారిపై కఠిన చర్యలు తీసుకోవాలని డిమాండ్ చేశారు. ఆందోళనకారులను చెదరగొట్టేందుకు లాఠీచార్జ్ చేయాల్సి వచ్చిందని అధికారులు తెలిపారు. పట్టణంలో ఇతర ప్రాంతాల్లో కూడా రెండు వర్గాల మధ్య ఘర్షణ జరిగినట్లు సమాచారం.
ఈ ఘర్షణలపై డిప్యూటీ సీఎం,హోంమంత్రి దేవేంద్ర ఫడ్నవీస్ స్పందించారు. ఔరంగజేబ్ను పొగిడేవారికి మహారాష్ట్రలో క్షమాపణ లేదు. పోలీసులు కూడా చర్యలు తీసుకుంటున్నారు. అదే సమయంలో శాంతిభద్రతలు కాపాడటం మా సమిష్టి బాధ్యత అని అన్నారు. సీనియర్ పోలీస్ అధికారులతో మాట్లాడిన మహారాష్ట్ర ముఖ్యమంత్రి ఏక్ నాథ్ షిండే ఈ ఘటనపై ఆరా తీశారు.. ప్రజలు ప్రశాంతంగా ఉండాలని కోరారు. ‘మహారాష్ట్రలోని కొన్ని జిల్లాల్లో ఔరంగజేబు పిల్లలు అకస్మాత్తుగా కనిపించారు. వారు ఔరంగజేబు గురించి సోషల్ మీడియాలో పోస్ట్ చేస్తున్నారు. ఇలాంటివి సమాజంలో చెడును కలిగిస్తాయి. ఈ ఘటన వెనక ఎవరున్నారనేది తెలుస్తుందని’ దేవేంద్ర ఫడ్నవీస్ అన్నారు.