Patna High Court: ‘‘సల్వార్ తీయడం, ఛాతీ నొక్కడం’’.. రేప్ అటెంప్ట్ కేసుపై హైకోర్టు కీలక తీర్పు..

Patna High Court: అత్యాచారయత్నంపై పాట్నా హైకోర్టు ఇచ్చిన తీర్పు వివాదాస్పదంగా మారింది. మహిళ సర్వార్ తొలగించడం, ఛాతీని నొక్కడం వంటి చర్యలు మాత్రమే అత్యాచారయత్నానికి స్పష్టమైన ఆధారాలుగా పరిగణించలేమని చెప్పింది. స్పష్టమైన ఆధారాలు లేకపోతే దానిని ‘‘అత్యాచాయత్నం(Attempt to Rape)గా పరిగణించలేమని కోర్టు తీర్పు చెప్పింది. 2008లో బీహార్‌లోని బాంకా జిల్లాలో నమోదైన కేసులో దోషిగా తేలిన వ్యక్తి దాఖలు చేసిన అప్పీల్ విచారణ సందర్భంగా జస్టిస్ పూర్ణేందు సింగ్ ఈ వ్యాఖ్యలు చేశారు. ట్రయల్ కోర్టు అత్యాచారయత్నం, అక్రమ నిర్భందం కింద విధించిన శిక్షల్ని హైకోర్టు రద్దు చేసింది.

ఈ కేసు విషయానికి వస్తే.. ఫోటో తీయించుకునేందుకు స్టూడియోకు వెళ్లిన మహిళను స్టూడియో యజమాని గదిలో బంధించి, ఆమె సల్వార్ తొలగించే ప్రయత్నం చేసి, ఛాతీని నొక్కాడనే ఆరోపణలు ఉన్నాయి. ఫోటో తీసిన తర్వాత, స్టూడియో యజమాని కంప్యూటర్‌లో ఫోటో చూపిస్తానన్న నెపంతో ఆమె తండ్రిని బయట వేచి ఉండమని కోరినట్లు ఆరోపణలు ఉన్నాయి. ఆ తర్వాత నిందితుడు స్టూడియో తలుపుకు తాళం వేసి, ఆ మహిళ సల్వార్‌ను తొలగించడానికి ప్రయత్నించి, అత్యాచారం చేయాలనే ఉద్దేశ్యంతో ఆమె ఛాతీపై నొక్కాడని ప్రాసిక్యూషన్ తెలిపింది. బాధితురాలు కేకలు వేయడంతో ఆమె తండ్రి అక్కడికి చేరుకునే లోగా నిందితుడు పరారయ్యాడు. అయితే, ఈ కేసులో అత్యాచారానికి ప్రయత్నించినట్లు నిర్ధారించే వైద్య ఆధారాలు, అత్యాచార చర్యకు సంబంధించి ఎలాంటి స్పష్టమైన సాక్ష్యాలు లేవని హైకోర్టు గుర్తించింది. దీంతో అత్యాచార కేసు నుంచి నిందితుడికి విముక్తి లభించింది.

అయితే, నిందితుడి చర్యలు మహిళ గౌరవాన్ని దెబ్బతీసేలా, అవమానించేలా ఉన్నాయని పేర్కొంటూ, ఇవి ఐపీసీ సెక్షన్ 354 (మహిళపై అసభ్య దాడి/గౌరవానికి భంగం కలిగించడం) పరిధిలోకి రావచ్చని కోర్టు వ్యాఖ్యానించింది. చివరగా నిందితుడిపై మోపబడ్డ అభియోగాలను, కింది కోర్టు విధించిన శిక్షల్ని హైకోర్టు రద్దు చేసింది.