Monkeypox: చర్మంపై దద్దుర్లు, జ్వరం వంటివి మంకీపాక్స్, చికెన్పాక్స్ రెండింటిలో సాధారణ లక్షణాలు కావడంతో ప్రజలు గందరగోళానికి గురవుతున్నారు. తమకు సోకింది ఏ వైరస్ అర్థం కాక అయోమయానికి గురవుతున్నారు. అయితే రెండు వైరల్ వ్యాధుల లక్షణాలు రోగులలో వ్యక్తమయ్యే విధానంలో తేడా ఉందని వైద్యులు వెల్లడించారు. సందేహాలుంటే నివృత్తి చేసుకునేందుకు వైద్యులను సంప్రదించాలని కూడా సూచించారు.
మంకీపాక్స్ అనేది ఒక వైరల్ జూనోసిస్ (జంతువుల నుండి మానవులకు సంక్రమించే వైరస్) మశూచి రోగులలో గతంలో కనిపించిన లక్షణాలను పోలి ఉంటుంది, అయితే ఇది వైద్యపరంగా తక్కువ తీవ్రతతో ఉంటుంది. వర్షాకాలంలో, ప్రజలు వైరల్ ఇన్ఫెక్షన్లకు ఎక్కువగా గురవుతారు. ఈ సమయంలో చికెన్పాక్స్ కేసులు ఎక్కువగా కనిపిస్తాయి, ఇవి ఇతర ఇన్ఫెక్షన్లతో పాటు దద్దుర్లు, వికారం వంటి లక్షణాలను కూడా చూపుతాయని మెదాంటా హాస్పిటల్ విజిటింగ్ కన్సల్టెంట్, డెర్మటాలజీ డాక్టర్ రమణ్జిత్ సింగ్ తెలిపారు. ఈ పరిస్థితి కారణంగా, కొంతమంది రోగులు తికమక పడుతున్నారని.. మంకీపాక్స్, చికెన్పాక్స్ను తప్పుగా అర్థం చేసుకుంటున్నారని డాక్టర్ రమణ్జిత్ సింగ్ వెల్లడించారు. తమకు మంకీపాక్స్ ఉందా లేదా అనేది లక్షణాల ద్వారా అర్థం చేసుకోవచ్చని ఆయన పేర్కొన్నారు.
ఇంకా వివరిస్తూ మంకీపాక్స్ సాధారణంగా జ్వరం, అస్వస్థత, తలనొప్పి, కొన్నిసార్లు గొంతు నొప్పి, దగ్గు, శోషరస కణుపుల వాపుతో మొదలవుతుందని, ఈ లక్షణాలన్నీ చర్మ గాయాలు, దద్దుర్లు, ఇతర సమస్యలకు నాలుగు రోజుల ముందు కనిపిస్తాయి. కళ్లు, మొత్తం శరీరానికి వ్యాపిస్తాయన్నారు. మంకీపాక్స్ విషయంలో చర్మమే కాకుండా ఇతర లక్షణాలు కూడా ఉన్నాయన్నారు. అయితే ఏవైనా సందేహాలను తొలగించుకోవడం కోసం వైద్యుడిని సంప్రదించడం ఎల్లప్పుడూ మంచిదన్నారు. ఇటీవల బయటపడిన రెండు అనుమానాస్పద మంకీపాక్స్ కేసులు చికెన్పాక్స్గా మారాయి.
గత వారం ఢిల్లీలోని లోక్నాయక్ జైప్రకాష్ నారాయణ్ ఆస్పత్రిలో మంకీపాక్స్ పరీక్ష కోసం చేరారు. ఈ నేపథ్యంలో వైద్యులు పరీక్షించగా ఆ వ్యక్తి చికెన్పాక్స్తో బాధపడుతున్నట్లు నిర్ధారణ అయింది. ఇటీవల బెంగళూరులో ఇథియోపియన్ పౌరుడికి మంకీపాక్స్ లక్షణాలు ఉన్నాయని పరీక్షించగా.. అతనికి చికెన్పాక్స్ ఉందని నిర్ధారణైంది. భారతదేశంలో ఇప్పటి వరకు నాలుగు మంకీపాక్స్ కేసులు నమోదయ్యాయి. కేరళలో మూడు కేసులు, ఢిల్లీలో ఒక మంకీపాక్స్ కేసు నమోదైంది. ఓ వ్యక్తి ఆదివారం మంకీపాక్స్ కారణంగా ప్రాణాలు కోల్పోయాడు. కేరళలోని త్రిసూర్ జిల్లాలో 22 ఏళ్ల యువకుడు మరణించిన సంగతి తెలిసిందే.
మంకీపాక్స్ వ్యాధిలో చికెన్పాక్స్ కంటే పెద్దగా గాయాలు ఉంటాయని ఫోర్టిస్ మెమోరియల్ రీసెర్చ్ ఇన్స్టిట్యూట్లోని ఇంటర్నల్ మెడిసిన్ డైరెక్టర్ డాక్టర్ సతీష్ కౌల్ వెల్లడించారు. మంకీపాక్స్లో అరచేతులు, అరికాళ్లపై గాయాలు కనిపిస్తాయన్నారు. చికున్పాక్స్లో గాయాలు చర్మంపై నీటి బొబ్బలు లేదా పొక్కుల్లా ఏర్పడి దురదగా ఉంటాయన్నారు. మంకీపాక్స్లో జ్వరం ఎక్కువ కాలం ఉంటుందని.. అలాంటి రోగికి శోషరస గ్రంథులు పెరిగాయని డాక్టర్ సతీష్ కౌల్ చెప్పారు.
చికెన్పాక్స్కు కారణమయ్యే వైరస్ గురించి బాత్రా హాస్పిటల్ మెడికల్ డైరెక్టర్ డాక్టర్ ఎస్సీ ఎల్ గుప్తా వివరించారు. చికెన్పాక్స్ అనేది రిబోన్యూక్లిక్ యాసిడ్ (ఆర్ఎన్ఏ) వైరస్ అని, ఇది అంత తీవ్రంగా ఉండదన్నారు. అయితే ఇది చర్మంపై దద్దుర్లు కూడా కలిగిస్తుందన్నారు. ఇది చికెన్పాక్స్ సీజన్ అని తెలిపిన ఆయన సాధారణంగా, వర్షాకాలంలో ఈ తేమ, ఉష్ణోగ్రత పెరుగుదల, నీరు నిలిచిపోవడం, తేమ, తడి బట్టలు ఇవన్నీ వైరస్ పెరుగుదలకు దారితీస్తాయన్నారు. అలాగే, ఈ వ్యాధికి సంబంధించిన మతపరమైన అంశం ఉంది. ప్రజలు దీనిని ‘దేవత’ లాగా చూస్తారు కాబట్టి అలాంటి రోగులకు ఎలాంటి మందులతో చికిత్స చేయరని కూడా వెల్లడించారు. వారిని ఒంటరిగా ఉంచి నయం చేయడానికి సమయం ఇస్తారని ఆయన చెప్పారు. మంకీపాక్స్ గురించి మాట్లాడుతూ, ఈ వైరస్ జంతువుల ద్వారా సోకుతుందని.. అయితే గొంతు నొప్పి, జ్వరం, సాధారణ వైరస్ సంకేతాలతో మొదటగా వైరస్ వ్యాప్తి జరుగుతుందన్నారు.
“ఈ వైరస్ యొక్క ప్రధాన సంకేతం శరీరం లోపల ద్రవాలు కలిగి ఉన్న దద్దుర్లు. ఇది వైరల్ ఇన్ఫెక్షన్కు దారితీస్తుంది, ఇది శరీర నిరోధకతను బలహీనపరుస్తుంది. కానీ దాని సంక్లిష్టత వల్ల సమస్యలు తలెత్తుతాయి. ఒకవేళ ఏదైనా బ్యాక్టీరియా ఇన్ఫెక్షన్కు గురై పొక్కులు వస్తాయి. ప్రస్తుతం మంకీపాక్స్ వ్యాధి ప్రారంభదశలో ఉంది. మేము కేవలం ఐసోలేషన్ పద్ధతిని అనుసరిస్తున్నాము. అనుమానిత రోగికి వారి లక్షణాల ప్రకారం చికిత్స చేస్తున్నాము. గొంతు ఇన్ఫెక్షన్ ఉంటే మనం సాధారణంగా తీసుకునే జెనరిక్ మందులనే వాడతాం.” ఆయన వెల్లడించారు. గతంసో చికెన్పాక్స్ ఇన్ఫెక్షన్ ఉన్న రోగి మంకీపాక్స్కు గురవుతాడా లేదా అనే ప్రశ్నలను కూడా వైద్యులు స్వీకరించారు. కానీ దీనికి సమాధానం లేదు.
Monkeypox: కేరళలో మంకీపాక్స్తో 22 ఏళ్ల వ్యక్తి మృతి.. దేశంలో తొలి మరణం
చికెన్పాక్స్, మంకీపాక్స్లు రెండూ వేర్వేరు వైరస్ల వల్ల సంభవిస్తాయని ఢిల్లీలోని బీఎల్కే మ్యాక్స్ ఆస్పతిలోని సీనియర్ డాక్టర్ రాజిందర్ కుమార్ తెలిపారు. ప్రసార విధానం భిన్నంగా ఉంటుందన్నారు. కానీ మశూచి వ్యాక్సినేషన్ పొందిన వారికి మంకీపాక్స్ వ్యాధి సోకే అవకాశాలు తక్కువగా ఉన్నాయని ఆయన నొక్కి చెప్పారు.
“1979-80లో వ్యాధి పూర్తిగా నిర్మూలించబడిందని ప్రపంచ ఆరోగ్య సంస్థ (డబ్లూహెచ్వో) చెప్పిన తర్వాత స్మాల్పాక్స్ వ్యాక్సిన్ నిలిపివేయబడింది. 1980 కంటే ముందు జన్మించిన వారిలో మశూచి వ్యాక్సిన్ తీసుకున్న వారికి మంకీపాక్స్ వచ్చే అవకాశాలు తక్కువగా ఉంటాయి. మశూచి, మంకీపాక్స్ వ్యాధులు రెండూ ఒకే కుటుంబానికి చెందిన వైరస్ల వల్ల వస్తాయి.” అని డాక్టర్ రాజిందర్ కుమార్ సింఘాల్ తెలిపారు.
