Sasaram-Patna Passenger: 24 గంటలు గడవకముందే వణికించిన మరో రైలు ప్రమాదం.. ప్యాసింజర్ రైలులో చెలరేగిన మంటలు

నిన్న (ఆదివారం) ఉదయం ఢిల్లీ-నిజాముద్దీన్ వెళ్లే రాజధాని ఎక్స్‌ప్రెస్ (12431)లోని రెండు కోచ్‌లలో అగ్నిప్రమాదం సంభవించిన విషయం తెలిసిందే. ఈ సంఘటన ఆలోట్, విక్రమ్‌గఢ్ రైల్వే స్టేషన్ల మధ్య జరిగింది. ఈ ఘటన జరిగి 24 గంటలు గడవకముందే మరో ప్రమాదం ప్రయాణికులను వణికించింది. పండిట్ దీన్‌దయాళ్ ఉపాధ్యాయ-గయాజీ రైల్వే లైన్‌లోని ససారం రైల్వే స్టేషన్‌లో అగ్నిప్రమాదం జరిగింది. సోమవారం ఓ ప్యాసింజర్ రైలులో అకస్మాత్తుగా మంటలు చెలరేగాయి. ససారం-ఆరా-పాట్నా ప్యాసింజర్ రైలులో అకస్మాత్తుగా మంటలు చెలరేగడంతో ప్లాట్‌ఫారమ్‌పై, రైలు లోపల ఉన్న ప్రయాణికులు ప్రాణ భయంతో వణికిపోయారు. భయంతో పరుగులు తీయడం ప్రారంభించారు. ఈ సంఘటన సోమవారం ఉదయం 6 గంటల ప్రాంతంలో జరిగినట్లు సమాచారం. ప్రస్తుతం మంటలను అదుపులోకి తీసుకువచ్చారు.

ఈ ఘటనలో ప్యాసింజర్ రైలుకు చెందిన ఒక బోగీ పూర్తిగా కాలి బూడిదైంది. ఈలోగా, ఎంతో శ్రమించి మంటలను అదుపులోకి తెచ్చామని ఆర్‌పిఎఫ్ ఇన్‌స్పెక్టర్ సంజీవ్ కుమార్ తెలిపారు. ప్రాథమికంగా ఇది షార్ట్ సర్క్యూట్ అని తేలిందని, రైల్వే యంత్రాంగం ఈ ఘటనపై దర్యాప్తు ప్రారంభించిందని ఆయన చెప్పారు. ఈ ఘటనలో ప్రయాణికులెవరూ గాయపడలేదని కూడా ఆయన తెలిపారు.

యాజమాన్య వైఫల్యం కారణంగా రైలుకు తీవ్ర నష్టం వాటిల్లిందని ప్రత్యక్ష సాక్షులు చెబుతున్నారు. సకాలంలో నీరు, అగ్నిమాపక పరికరాలు ఉపయోగించి ఉంటే, రైలును మరింత నష్టం నుండి కాపాడి ఉండొచ్చని ప్రయాణికులు విమర్శించారు.