Karnataka SIR: కర్ణాటకలో ప్రత్యేక సమగ్ర ఓటర్ల జాబితా సవరణ (Special Intensive Revision – SIR) అనంతరం తుది ఓటర్ల జాబితాను ఎన్నికల సంఘం మంగళవారం విడుదల చేసింది. SIRపై విపక్షాలు అభ్యంతరాలు వ్యక్తం చేస్తున్న సమయంలో కర్ణాటకలో పూర్తైంది. ఈ ప్రక్రియలో 1.08 కోట్లకు పైగా ఓటర్ల వివరాలను జాబితా నుంచి తొలగించారు. దీంతో రాష్ట్రంలో మొత్తం ఓటర్ల సంఖ్య 5.54 కోట్ల నుంచి 4.54 కోట్లకు తగ్గింది. ఇందులో 2,25,40,493 మంది పురుష ఓటర్లు (2.25 కోట్లు), 2,29,12,355 మంది మహిళా ఓటర్లు (2.29 కోట్లు) మరియు 2,841 మంది థర్డ్ జెండర్ ఓటర్లు ఉన్నారు. 18-19 ఏళ్ల వయస్సు వర్గానికి చెందిన ఓటర్లు 6.83 లక్షలకు పైగా ఉన్నారు.
తుది జాబితా రూపొందించే సమయానికి 1,08,76,625 ఎన్యూమరేషన్ ఫారాలను పరిగణనలోకి తీసుకోలేదని అధికారులు తెలిపారు. మరోవైపు, నోటీసులు జారీ చేసి విచారణ నిర్వహించిన తర్వాత 61,867 మంది ఓటర్లను తుది జాబితాలో చేరేందుకు అనర్హులుగా గుర్తించారు. ముసాయిదా జాబితా వివరాల ప్రకారం.. ఎస్ఐఆర్ సవరణకు ముందు ఉన్న ఓటర్ల మొత్తం సంఖ్యలో 1,07,96,339 మంది (19.48 శాతం) వివరాలను ఎన్యూమరేట్ చేయలేపోయారు.
ఫారాలు సమర్పించకపోవడం, గైర్హాజరు, వేరే ప్రాంతానికి వెళ్లిపోవడం, మరణించడం, ఒకటి కన్నా ఎక్కువ చోట్ల పేర్లు నమోదు కావడం వంటి అంశాలను కారణాలుగా చూపించింది. జాబితా నుంచి తొలగించిన పేర్లలో.. 65,45,679 మంది (11.81 శాతం) మంది శాశ్వతంగా వేరే ప్రాతానికి వెళ్లిన వారు, 19,00,926 మంది (3.43 శాతం) మంది గైర్హాజరైన వారిగా గుర్తించారు. 16,39,864 మంది (2.96 శాతం) మరణించిన వారిగా గుర్తించారు. 7,09,870 మంది (1.28 శాతం) మంది పేర్లు ఇప్పటికే రెండు చోట్ల ఉండటంతో వీరిని కూడా జాబితా నుంచి తొలగించారు.
కర్ణాటకలో ఈ ఏడాది జూన్ 30న ఈ ప్రక్రియ ప్రారంభమైంది. రాష్ట్రవ్యాప్తంగా ఉన్న 5.54 కోట్ల మంది ఓటర్ల వివరాలను పరిశీలించే బాధ్యతను బూత్ స్థాయి అధికారులు (BLOs) చేపట్టారు. ఇంటింటికీ వెళ్లి ఎన్యూమరేషన్ ఫారాలను సేకరించి, ఓటర్ల వివరాలను ధ్రువీకరించారు. 2002 తర్వాత కర్ణాటకలో చేపట్టిన ఎస్ఐఆర్ ఇదే.