India-US: హిందూ ఆలయంపై దాడికి కుట్ర ఆరోపణలు.. అమెరికాకు భారత్ కీలక విజ్ఞప్తి

India-US: అమెరికా ఇల్లినాయిస్ రాష్ట్రంలో హిందూ ఆలయంపై సామూహిక కాల్పులకు కుట్ర పన్నినట్లు ఆరోపణలు ఎదుర్కొంటున్న 19 ఏళ్ల యువకుడిని అక్కడి పోలీసులు అరెస్ట్ చేశారు. ఈ ఘటనపై భారత్ తీవ్ర ఆందోళన వ్యక్తం చేసింది. ఈ ఘటనను జాత్యాంకార, భారత వ్యతిరేక ద్వేషంగా అభివర్ణించింది. యూఎస్‌లో భారత ద్వేషం పెరుగుతోందనే ఆందోళనల్ని ఈ ఘటన పెంచుతోందని భారత విదేశాంగ మంత్రిత్వ శాఖ పేర్కొంది.

చికాగో సమీపంలోని అరోరా ప్రాంతంలో హిందూ ఆలయాన్ని లక్ష్యగా చేసుకుని కాల్పులకు కుట్ర పన్నినట్లు ఆరోపణలు రావడం తీవ్ర ఆందోళన కలిగిస్తోందని విదేశాంగ శాఖ అధికార ప్రతినిధి రణధీర్ జైస్వాల్ అన్నారు. ఈ కేసులో అమెరికా అధికారలుు తీసుకున్న చర్యలు, నిందితుడి అరెస్ట్, అతడిపై అభియోగాలను భారత్ గమనించిందని ఆయన చెప్పారు. ఈఘటనపై అమెరికా అధికారులు సమగ్ర దర్యాప్తు జరిపి, న్యాయస్థానం ముందు నిలబెట్టాలని భారత్ ఆశిస్తున్నట్లు చెప్పారు. అమెరికాలో భారతీయుల భద్రతకు అవసరమైన అన్ని చర్యలు తీసుకోవాలని కోరారు.

అమెరికా అధికారుల ప్రకారం.. పాలటైన్‌కు చెందిన అలెగ్జాండ్రోస్ పాపోరాకిస్ అనే 19 ఏళ్ల యువకుడు ఈ కుట్రకు పాల్పడినట్లు ఆరోపణలు ఎదుర్కొంటున్నాడు. పాపోరాకిస్ మాస్ షూటింగ్‌కు కుట్ర పన్నుతున్నట్లు మరో వ్యక్తి పోలీసులకు సమాచారం ఇవ్వడంతో అతడిని పోలీసులు అరెస్ట్ చేశారు. నిందితుడి వద్ద నుంచి పత్రాలు, రైఫిల్, మ్యాగజైన్లు, బాడీ ఆర్మర్, ఇతర పరికరాలను స్వాధీనం చేసుకున్నారు.