Harish Rawat: హరీశ్ రావత్ సంచలన నిర్ణయం.. కాంగ్రెస్‌లోని అన్ని పదవులకు రాజీనామా

Harish Rawat: ఉత్తరాఖండ్ మాజీ ముఖ్యమంత్రి, కాంగ్రెస్ సీనియర్ నేత హరీశ్ రావత్ పార్టీ పదవుల నుంచి తప్పుకుంటున్నట్లు ప్రకటించారు. తన మాజీ సహాయకుడు, ప్రస్తుతం PAగా పనిచేస్తున్న చందన్ సింగ్ జీనా నివాసంతో పాటు పలు ప్రాంతాల్లో ఎన్‌ఫోర్స్‌మెంట్ డైరెక్టరేట్ (ED) సోదాలు నిర్వహించిన మరుసటి రోజే హరీశ్ రావత్ ఈ నిర్ణయం తీసుకోవడం రాజకీయంగా చర్చనీయాంశంగా మారింది. తన వల్ల కాంగ్రెస్ పార్టీ అవినీతికి వ్యతిరేకంగా చేస్తున్న పోరాటంపై ఎలాంటి ప్రశ్నలు తలెత్తకూడదనే ఉద్దేశంతోనే పదవుల నుంచి తప్పుకుంటున్నట్లు రావత్ తెలిపారు. ఈ మేరకు ఫేస్‌బుక్ పోస్టు ద్వారా తన నిర్ణయాన్ని వెల్లడించారు.

చందన్ సింగ్ జీనా నివాసంలో ED సోదాలు

2016లో జరిగిన గ్రామ పంచాయతీ డెవలప్‌మెంట్ ఆఫీసర్ (VDO) పరీక్షలో అక్రమాలకు సంబంధించిన మనీలాండరింగ్ కేసు దర్యాప్తులో భాగంగా ED ఉత్తరాఖండ్‌లోని డెహ్రాడూన్ సహా పలు ప్రాంతాల్లో సోదాలు నిర్వహించినట్లు సమాచారం. ఈ సోదాల్లో చందన్ సింగ్ జీనా నివాసం కూడా ఉందని ED పేర్కొంది. అక్కడ రూ.32 లక్షల లెక్కల్లో చూపని నగదు, సుమారు 200.5 గ్రాముల బంగారం, 12 విలాసవంతమైన గడియారాలు లభించినట్లు దర్యాప్తు సంస్థ వెల్లడించినట్లు సమాచారం. అదేవిధంగా జీనా, ఆయన కుటుంబ సభ్యుల బ్యాంకు ఖాతాల్లో ఉన్న సుమారు రూ.52.16 లక్షలను ఫ్రీజ్ చేసినట్లు ED తెలిపింది. చందన్ సింగ్ జీనా గతంలో హరీశ్ రావత్ ముఖ్యమంత్రిగా ఉన్న సమయంలో OSDగా పనిచేశారు. ప్రస్తుతం ఆయన రావత్‌కు PAగా పనిచేస్తున్నట్లు సమాచారం.

‘నిజాలు దర్యాప్తులోనే బయటకు రావాలి’

తన సహాయకుడి ఇంట్లో నగదు, నగలు స్వాధీనం చేసుకున్నట్లు టీవీ చానళ్లలో ప్రసారం అవుతున్న వార్తలపై హరీశ్ రావత్ స్పందించారు. వాటి వెనుక ఉన్న అసలు వాస్తవాలు దర్యాప్తు పూర్తయిన తర్వాతే స్పష్టమవుతాయని అన్నారు. చందన్ సింగ్ జీనాను తనకు చాలా కాలంగా పరిచయం ఉన్న సహచరుడిగా పేర్కొన్న రావత్.. 2016 నియామక పరీక్షలో అక్రమాలకు సంబంధించిన ఆరోపణలు నిజమని తేలితే అది తనకు కూడా సిగ్గుచేటేనని అన్నారు. అయితే ప్రస్తుతం వచ్చిన ఆరోపణలను తాను నమ్మడం లేదని స్పష్టం చేసినట్లు సమాచారం.

పార్టీ ప్రతిష్టకు ఇబ్బంది కలగకూడదనే రాజీనామా

తన సహచరుడి నివాసంపై చర్యలను ప్రస్తావిస్తూ, ఎన్నికలకు ముందు రాజకీయ వాతావరణాన్ని ప్రభావితం చేయడానికి కొత్త కథనాన్ని సృష్టించే ప్రయత్నం జరుగుతోందని హరీశ్ రావత్ ఆరోపించారు. అయితే తన కారణంగా కాంగ్రెస్ పార్టీ ప్రతిష్టకు, అవినీతికి వ్యతిరేకంగా పార్టీ చేస్తున్న పోరాటానికి ఎలాంటి ఇబ్బంది కలగకూడదని భావిస్తున్నట్లు తెలిపారు. ఈ నేపథ్యంలో రాష్ట్ర కాంగ్రెస్ కార్యవర్గం, కాంగ్రెస్ వర్కింగ్ కమిటీ (CWC)లో తన పదవుల నుంచి తప్పుకుంటున్నట్లు ప్రకటించారు.

తన హయాంలో 42 వేలకుపైగా ఉద్యోగ నియామకాలు

తన ముఖ్యమంత్రి పదవీకాలాన్ని ప్రస్తావించిన హరీశ్ రావత్.. తన ప్రభుత్వ హయాంలో సుమారు మూడు సంవత్సరాల కాలంలో 42 వేలకు పైగా ప్రభుత్వ ఉద్యోగాల భర్తీకి నోటిఫికేషన్లు జారీ చేసినట్లు తెలిపారు. ఆ నియామక ప్రక్రియలో అనుకోకుండా ఏదైనా తప్పిదం జరిగి ఉంటే రాష్ట్ర ప్రజలకు క్షమాపణలు చెబుతున్నట్లు పేర్కొన్నారు. అప్పటి నియామక కమిషన్ చైర్మన్ నియామకంపై కూడా ఆయన వివరణ ఇచ్చారు.

ఫిర్యాదు వచ్చిన వెంటనే ఆ అధికారిని పదవి నుంచి తొలగించినట్లు తెలిపారు. పాత సర్వీస్ రికార్డు, మెరిట్ ఆధారంగానే ఆ నియామకం జరిగిందని వివరించినట్లు సమాచారం. ఈ నిర్ణయం తీసుకునే సమయంలో మాజీ ముఖ్యమంత్రి భువన్ చంద్ర ఖండూరి సలహా కూడా తీసుకున్నట్లు రావత్ పేర్కొన్నారు. భవిష్యత్తులో ఒక వ్యక్తి ఏ విధంగా తప్పు చేస్తారో ముందుగానే ఎవరూ అంచనా వేయలేరని అన్నారు.

2016 VDO పరీక్షలో అక్రమాలపై దర్యాప్తు

ED దర్యాప్తు ప్రధానంగా 2016 గ్రామ పంచాయతీ డెవలప్‌మెంట్ ఆఫీసర్ పరీక్షలో జరిగినట్లు ఆరోపణలు ఎదుర్కొంటున్న అక్రమాలపై కొనసాగుతోంది. దర్యాప్తులో భాగంగా అప్పటి UKSSSC చైర్మన్, కార్యదర్శి, పరీక్ష నియంత్రణ అధికారి, OMR షీట్ల ప్రాసెసింగ్‌కు సంబంధించిన ప్రైవేట్ కంప్యూటర్ సంస్థ యజమాని, కొంతమంది మధ్యవర్తులకు సంబంధించిన ప్రాంతాల్లో కూడా సోదాలు నిర్వహించినట్లు సమాచారం.

ED ఆరోపణల ప్రకారం, కొన్ని OMR షీట్లలో మార్పులు జరిగినట్లు అనుమానాలు ఉన్నాయి. కొంతమంది వ్యక్తులకు పరీక్షకు సంబంధించిన సమాచారం ముందుగానే చేరిందని, అనంతరం సమాధానాల భాగంలో మార్పులు చేసినట్లు ఆరోపణలు ఉన్నాయని దర్యాప్తు సంస్థ పేర్కొన్నట్లు సమాచారం. ఈ కేసులో నగదు లావాదేవీలకు సంబంధించిన అంశాలను కూడా ED పరిశీలిస్తోంది.

జీనా మొబైల్ ఫోన్ స్వాధీనం

దర్యాప్తులో భాగంగా చందన్ సింగ్ జీనా మొబైల్ ఫోన్‌ను కూడా ED స్వాధీనం చేసుకున్నట్లు సమాచారం. ఫోన్‌ను ఫోరెన్సిక్ పరీక్షకు పంపే అవకాశం ఉంది. సోదాల్లో లభించిన నగదు, గతంలో జరిగిన ఖర్చులు, వాటి ఆర్థిక మూలాలకు సంబంధించిన వివరాలను కూడా అధికారులు పరిశీలిస్తున్నట్లు తెలుస్తోంది.

‘ఆధారాలు ఉంటే దర్యాప్తు సంస్థలకు ఇవ్వండి’

తనపై లేదా తన హయాంలో జరిగిన నియామకాలపై ఆరోపణలు చేసే వారికి హరీశ్ రావత్ సవాల్ విసిరారు. నియామక ప్రక్రియలో తన జోక్యానికి సంబంధించిన ఆధారాలు ఎవరి వద్దైనా ఉంటే వాటిని CBI, ED లేదా పోలీసులకు అందించాలని కోరారు. తన వల్ల తెలిసీ తెలియక ఏదైనా తప్పు జరిగి, దాని ప్రభావం యువత భవిష్యత్తుపై పడితే అందుకు చేతులు జోడించి క్షమాపణలు చెబుతున్నట్లు తెలిపారు. ఒకవేళ తన తప్పు దర్యాప్తులో నిరూపితమైతే చట్టం విధించే శిక్షను స్వీకరించేందుకు సిద్ధంగా ఉన్నానని స్పష్టం చేసినట్లు సమాచారం.

सामने टीवी पर खबर आ रही है कि देहरादून में हरीश रावत के पीए के पास भारी मात्रा में कैश और ज्वैलरी आदि पकड़ी गई या पकड़ाई गई, इस तथ्य का खुलासा तो आने वाले समय में होगा और यह सत्य है कि श्री जीना मेरे ओएसडी रहे हैं और मैं जितने भी पदों पर रहा, चाहे पार्टी में रहा या सरकार में रहा,… pic.twitter.com/Z6rZYcVev0

— Harish Rawat (@harishrawatcmuk) September 11, 2026