Delhi Protest: అభిజిత్ దీప్కేతో పాటు పోలీసుల అదుపులో నేహా బోరా..

Delhi Protest: కాక్రోచ్ జనతా పార్టీ(CJP) శుక్రవారం ‘‘తిరంగా మార్చ్’’కు పిలుపునిచ్చింది. ఢిల్లీలోని కన్నాట్‌ప్లేస్ సెంట్రల్ పార్క్‌లో జాతీయ జెండాలను పట్టుకుని నిరసన తెలపాలని ప్లాన్ చేసింది. అయితే, ఢిల్లీ పోలీసులు ఈ మార్చ్‌కు ముందే సీజేపీ చీఫ్ అభిజిత్ దీప్కేను అదుపులోకి తీసుకున్నారు. ఇదిలా ఉంటే, AISA విద్యార్థి నేత నేహా బోరాను కూడా పోలీసులు అదుపులోకి తీసుకున్నారు. మండిహౌజ్ వద్ద నిరసన తెలిపేందుకు వెళ్తున్న నేహా బోరా, వామపక్ష విద్యార్థి సంఘాల నేతల్ని పోలీసులు అడ్డుకున్నారు.

తిరంగా ర్యాలీకి ముందు ఢిల్లీ పోలీసులు అభిజిత్ దీప్కే నివానానికి వెళ్లి ర్యాలీ నిర్వహించవద్దని నోటీసులు అందించారు. భారతీయ నాగరిక్ సురక్షా సంహిత(BNSS)లోని సెక్షన్ 163 కింద ఈ నోటీసులు అందించారు. కన్నాట్‌ప్లేస్‌లో ఆంక్షలు అమలులో ఉన్నట్లు పోలీసులు నోటీసుల్లో వెల్లడించారు.

ఇదిలా ఉంటే, ప్రతిపక్షాల నేతలు దీప్కే అరెస్టును ప్రశ్నిస్తున్నారు. బెంగాల్ మాజీ సీఎం, టీఎంసీ అధినేత్రి దీప్కేను అదుపులోకి తీసుకోవడాన్ని ‘‘అప్రకటిత ఎమర్జెన్సీ’’గా అభివర్ణించారు. సమాజ్ వాదీ పార్టీ అధినేత అఖిలేష్ యాదవ్ తిరంగా మార్చ్‌కు మద్దతు ఇస్తూ.. ‘‘ఏక్-రంగా వర్సెస్ తిరంగా’’ అంటూ కామెంట్ చేశారు. ఆప్ నేతలు, కార్యకర్తలు తిరంగా మార్చ్‌లో పాల్గొన్నారు.