Garba row: ‘‘మీ సోదరిమణుల్ని తీసుకురండి’’.. ముస్లింల గర్బా ఎంట్రీపై వివాదాస్పద వ్యాఖ్యలు..

Garba row: గర్బా కార్యక్రమాల్లోకి ముస్లింల ఎంట్రీపై వివాదం తీవ్రమవుతోంది. ‘‘లవ్ జిహాద్’’కు కేంద్రంగా గర్బా వేదికలు ఉండకూడదని హిందూ సంస్థలు, బీజేపీ నేతలు వ్యాఖ్యానిస్తున్నారు. ఇదిలా ఉంటే, మధ్యప్రదేశ్ రాష్ట్రానికి చెందిన హుజూర్ నియోజకవర్గం బీజేపీ ఎమ్మెల్యే రామేశ్వర్ శర్మ చేసిన వ్యాఖ్యలు తీవ్ర వివాదస్పదమయ్యాయి. ముస్లింలు గర్బాకు ఒంటరిగా రావొద్దని, తమ సోదరీమణులు, కుమార్తెలను కూడా వెంట తీసుకురావాలని ఆయన వ్యాఖ్యానించారు.

‘‘ముస్లిం యువకులు గర్బాకు ఒంటరిగా ఎందుకు రావాలనుకుంటున్నారు? ఒంటరిగా రావొద్దు, సోదరీమణులు, కుమార్తెలను కూడా వెంట తీసుకురావాలి’’ అని అన్నారు. దీని తర్వాత ‘‘మా అబ్బాయిలు కూడా సిద్ధంగా ఉన్నారు’’ అని వ్యాఖ్యానించడంతో సభ నుంచి ఒక్కసారిగా పెద్ద స్పందన వచ్చింది. ముస్లింలు గర్బాకు రావాలనుకుంటే రావచ్చు, అయితే నుదుటిపై తిలకం పెట్టుకుని ‘జైశ్రీరాం’ అంటూ పాల్గొనాలని రామేశ్వర్ శర్మ అన్నారు. గోవుల్ని రక్షించడంలో పాలుపంచుకోవాలని సూచించారు.

ఈ వ్యాఖ్యలపై కాంగ్రెస్, ఎంఐఎం తీవ్ర అభ్యంతరం తెలిపాయి. భోపాల్ సెంట్రల్ కాంగ్రెస్ ఎమ్మెల్యే ఆరిఫ్ మాసూద్ మాట్లాడుతూ.. మతపరమైన వాతావరణాన్ని దెబ్బతీసేలా ఉన్నాయని అన్నారు. ఎంఐఎం రాష్ట్ర అధ్యక్షుడు మోహ్సీన్ అలీ ఖాన్ బీజేపీ ఎమ్మెల్యే వ్యాఖ్యలపై ఆగ్రహం వ్యక్తం చేశారు. ఇలాంటి వ్యాఖ్యలు సమాజంలో విభజన తెస్తాయని, శర్మ రాజ్యాంగాన్ని చదవాలని అన్నారు.