Bengal Assembly Elections 2026: బెంగాల్ ఎన్నికలు.. మే 4న కేవలం 293 స్థానాలకు మాత్రమే ఓట్ల లెక్కింపు.. కారణం ఏమిటి?

2026 పశ్చిమ బెంగాల్ శాసనసభ ఎన్నికల ఓట్ల లెక్కింపు సోమవారం (మే 4) జరగనుంది. రెండు దశల్లో జరిగిన ఈ పోలింగ్ ఫలితాలు, రాష్ట్రంలో తృణమూల్ కాంగ్రెస్ తిరిగి అధికారంలోకి వస్తుందా లేక బీజేపీ తొలిసారి గెలుస్తుందా అనే విషయాన్ని నిర్ణయిస్తాయి. అయితే, ఒక స్థానంలో ఎన్నికల ప్రక్రియ కొనసాగుతుంది. ఆ స్థానం ‘ఫల్తా’. వాస్తవానికి, ఏప్రిల్ 29వ తేదీన జరిగిన ఎన్నికల సమయంలో తీవ్రమైన ఎన్నికల అవకతవకలు జరిగాయని, ప్రజాస్వామ్య ప్రక్రియకు అంతరాయం కలిగిందని ఆరోపణలు వచ్చాయి. అందువల్ల, మొత్తం 294 స్థానాలకు గాను 293 స్థానాలలో రేపు ఓట్ల లెక్కింపు జరుగుతుంది. ఫాల్తా నియోజకవర్గం లో 285 పోలింగ్ స్టేషన్ లలో ఈనెల 21 పోలింగ్.. 24 న కౌంటింగ్ నిర్వహించాలని ఈసి ఆదేశాలు జారీ చేసింది.

బెంగాల్ వ్యాప్తంగా ఉన్న స్ట్రాంగ్ రూమ్‌లు, కౌంటింగ్ కేంద్రాల వద్ద రెండంచెల భద్రత అమలు చేస్తున్నారు. కౌంటింగ్ కేంద్రాల వెలుపల రాష్ట్ర పోలీసు బలగాలు, కౌంటింగ్ కేంద్రాల లోపల కేంద్ర బలగాలు (Central Forces) భద్రత కల్పిస్తాయి. అంతేకాకుండా, కౌంటింగ్ ప్రక్రియను పర్యవేక్షించడానికి ఎన్నికల సంఘం అదనంగా 242 మంది పరిశీలకులను (Election Observers) పంపించింది. రేపటి కౌంటింగ్‌తో బెంగాల్ అసెంబ్లీ ఎన్నికల ఫలితాలు స్పష్టమవుతాయి.

ఫల్దా అసెంబ్లీ స్థానానికి మే 24న ఓట్ల లెక్కింపు

దక్షిణ 24 పరగణాల జిల్లాలోని ఫల్తా అసెంబ్లీ నియోజకవర్గంలోని మొత్తం 285 పోలింగ్ కేంద్రాలలో మే 21న తిరిగి పోలింగ్ నిర్వహించాలని ఎన్నికల సంఘం శనివారం ఆదేశించింది. స్వేచ్ఛాయుత, నిష్పక్షపాత, పారదర్శక ప్రక్రియను నిర్ధారించడానికి కట్టుదిట్టమైన భద్రత నడుమ ఈ పోలింగ్ జరుగుతుంది. ఈ నియోజకవర్గానికి ఓట్ల లెక్కింపు మే 24న జరుగుతుంది. శనివారం, వెస్ట్ మగ్రాహట్, డైమండ్ హార్బర్ అసెంబ్లీ నియోజకవర్గాల్లోని 15 బూత్‌లలో రీ-పోలింగ్ జరిగింది.

ఫల్తాలో టీఎంసీకి చెందిన జహంగీర్ ఖాన్, బీజేపీకి చెందిన దేబాంగ్షు పాండా, కాంగ్రెస్‌కు చెందిన అబ్దుర్ రజాక్ మొల్లాలతో తలపడుతున్నారు. సీపీఐ(ఎం)కి చెందిన శంభు నాథ్ కుర్మి కూడా బరిలో ఉన్నారు. ఓటర్లను బెదిరించడం, బూత్‌లలోకి అనధికారిక ప్రవేశం, అవకతవకలకు పాల్పడటం వంటి ఆరోపణలను పరిశీలకుల నివేదికలో పేర్కొన్నట్లు ఎన్నికల సంఘం తెలిపింది. పోలింగ్ రోజున, ఫల్తాలోని 177వ నంబర్ బూత్‌లో బీజేపీ అభ్యర్థికి చెందిన ఈవీఎం బటన్‌ను టేపుతో కప్పి ఉంచారని పాండా ఆరోపించారు. కేంద్ర బలగాలు సంఘటనా స్థలానికి చేరుకుని టేపును తొలగించడంతో, పోలింగ్ తిరిగి ప్రారంభమైంది.