First Single: సాయికుమార్ యముడిగా ‘యమ డ్రామా’!

Sai Kumar: సోషియో ఫాంటసీ థ్రిల్లర్ మూవీస్ ట్రెండ్ తో నిమిత్తం లేకుండా ఎప్పుడొచ్చినా ప్రేక్షకుల ఆదరణ చూరగొంటాయి. అలాగే యముడిని సెంటర్ ఆఫ్ అట్రాక్షన్ చేసుకుని రూపొందిన సినిమాలు సైతం ఎంతగానో అలరిస్తుంటాయి. ఇప్పుడు ఆ కోవలో ‘యమ డ్రామా’ చిత్రం తెరకెక్కింది. సాయికుమార్ యముడిగా నటించిన ఈ సినిమాలో యువచంద్ర, శివకుమార్, కౌటిల్య, సుదర్శన్ రెడ్డి హీరోలుగా, ప్రియాంక శర్మ (‘సవారి’ ఫేమ్), నేహాదేశ్ పాండే, హమీద ప్రధాన పాత్రలు పోషించారు. టి. హర్షచౌదరి దర్శకత్వంలో తోటకూర శివరామకృష్ణారావు నిర్మించిన ఈ సినిమా విడుదలకు సన్నద్ధమవుతోంది.

ఇదిలా ఉంటే ఈ సినిమాలోని “నిను చూసినాకనే…” అనే మొదటి పాటకు పాటను తెలుగు ఫిలిం ప్రొడ్యూసర్స్ కౌన్సిల్ ప్రెసిడెంట్ కె. ఎల్. దామోదర ప్రసాద్ విడుదల చేశారు. దీనికి కరుణాకర్ సాహిత్యం అందించగా, సునీల్ కశ్యప్ స్వర రచన చేశారు. ఈ సందర్భంగా దామోదర ప్రసాద్ మాట్లాడుతూ, “ఈ చిత్ర బృందం సినిమా మొదలు పెట్టిన తర్వాత కరోనా విలయతాండవం చేసినప్పటికీ, కష్టాలన్నింటినీ అధిగమించి, సినిమాను పూర్తి చేసి, విడుదలకు సన్నాహాలు చేస్తుండటం అభినందనీయం. తప్పకుండా ఈ సినిమా ప్రేక్షకులను అలరింపజేస్తుందన్న నమ్మకం ఉంది” అని అన్నారు. మరో అతిథి డి.ఎస్.రావు మాట్లాడుతూ, “కొత్త డైరెక్టర్లు చిన్న సినిమాలతో పెద్ద విజయాలను సాధిస్తున్నారు. సోషియో ఫాంటసీ థ్రిల్లర్ సినిమాలు తప్పకుండా ప్రేక్షకాదరణ పొందుతుంటాయి. ఇది కూడా ఆ జాబితాలో చేరాలని కోరుకుంటున్నాను” అని అన్నారు. మంచి వినోదం, భావోద్వేగాలను రంగరించి, ఆద్యంతం ఆకట్టుకునేలా ఈ చిత్రాన్ని తెరకెక్కించానని దర్శకుడు హర్ష చౌదరి తెలిపాడు. ఇదే నెలలో ఈ చిత్రాన్ని విడుదల చేయబోతున్నామని నిర్మాత శివరామ కృష్ణారావు చెప్పారు.