బాలీవుడ్ స్టార్ హీరో షాహిద్ కపూర్ ఇప్పుడు డిజిటల్ మీడియాలోకీ అడుగుపెట్టాడు. అతను నటిస్తున్న ‘ది బాయ్స్’ వెబ్ సీరిస్ సీజన్ 3 జూన్ 3 నుండి అమెజాన్ ప్రైమ్ లో స్ట్రీమింగ్ కాబోతోంది. దీనికి సంబంధించిన ప్రచారానికి శ్రీకారం చుట్టిన షాహిద్ కపూర్ ఈ వెబ్ సీరిస్ గురించి కొన్ని ఆసక్తికరమైన విషయాలు తెలిపాడు. ”సహజంగా సూపర్ హీరోస్ అంటే సమాజానికి, తమ చుట్టు ఉన్న ప్రజలకు మేలు చేస్తారు. కానీ నేను నటించిన ‘ది బాయ్స్’ వెబ్ సీరిస్ లో అందుకు పూర్తి భిన్నంగా వాళ్ళ ప్రవర్తన ఉంటుంది. ‘హోమ్ లాండర్’ అనే వీళ్ళు కంటి చూపుతూనే తమ ముందు ఉన్న వాటన్నింటినీ నాశనం చేస్తుంటారు. నిజానికి వీళ్ళు సూపర్ హీరోలు కాదు… సూపర్ విలన్స్.
వాళ్ళ ఆగడాలను ‘ది బాయ్స్’ ఎలా అరికట్టారన్నదే ఈ సీజన్ 3లో చూపబోతున్నాం. మొదటి రెండు సీజన్స్ చూడగానే నాకు దీనిపై ఆసక్తి కలిగింది. దాంతో అమెజాన్ ప్రైమ్ సంస్థతో చేతులు కలిపాను” అని అన్నారు. ‘ది బాయ్స్’ సీజన్ 3 మొత్తం ఎనిమిది ఎపిసోడ్స్. జూన్ 3న మొదటి మూడు ఎపిసోడ్స్ ను అమెజాన్ ప్రైమ్ లో స్ట్రీమింగ్ చేస్తారు. ఆ తర్వాత ప్రతి శుక్రవారం ఒకటి చొప్పున టెలికాస్ట్ చేస్తారు. జూలై 8తో ఈ సీజన్ పూర్తవుతుంది. ఇది ఇంగ్లీష్, హిందీ, తమిళ, తెలుగు భాషల్లో ప్రసారం కానుంది. ఇటీవల వచ్చిన ‘జెర్సీ’తో అభిమానులను కాస్తంత నిరాశ పర్చిన షాహిద్ కపూర్ ఈ తాజా వెబ్ సీరిస్ తో తిరిగి వారి అభిమానాన్ని చూరగొంటాడేమో చూడాలి.
