Ilayaraja: రాజేంద్ర ప్రసాద్ ‘షష్టిపూర్తి’కి మాస్ట్రో బాణీలు!

Shashtipoorthi: రాజేంద్ర ప్రసాద్, అర్చన అంటే ఠక్కున గుర్తొచ్చేది ‘లేడీస్ టైలర్’ మూవీనే! వీరిద్దరూ ప్రధాన పాత్రధారులుగా తెరకెక్కుతున్న తాజా సినిమా ‘షష్టిపూర్తి’. ఈ చిత్రం పూజా కార్యక్రమాలు శుక్రవారం చెన్నయ్ లోని ఇసైజ్ఞాని ఇళయరాజా స్టూడియోస్ లో జరిగాయి. ముహూర్తపు సన్నివేశానికి సూపర్ గుడ్ ఫిలిమ్స్ ఆర్‌. బి. చౌదరి క్లాప్ కొట్టగా, సంగీత దర్శకుడు ఇళయరాజా కెమెరా స్విచాన్ చేశారు. ఈ చిత్రంలో హీరోగా నటిస్తున్న రూపేష్ కుమార్ మా ఆయ్ ప్రొడక్షన్స్ ఎల్.ఎల్.పి. బ్యానర్ లో ఆ చిత్రాని నిర్మిస్తున్నారు. ‘క్లాప్’ చిత్రంలో తన అద్భుతమైన నటనతో అందరి హృదయాలను గెలుచుకున్న ఆకాంక్ష సింగ్ ఇందులో రూపేష్ కుమార్ కు జంటగా నటిస్తుంది. రాజేంద్ర ప్రసాద్, అర్చన, ‘కాంతారా’ ఫేమ్ అచ్యుత్ కుమార్, వై. విజయ, ‘శుభలేఖ’ సుధాకర్ తదితరులు కీలకపాత్రలు పోషించబోతున్నారు. నాలుగు పాటలున్న ఈ చిత్రానికి మాస్ట్రో ఇళయరాజా సంగీతం అందిస్తున్నారు. ఈ సినిమా షూటింగ్ ఇదే నెలలో ప్రారంభమై మూడు షెడ్యూల్‌లతో తక్కువ వ్యవధిలో పూర్తి కానుంది. జులై 2023లో సినిమాను విడుదల చేసేందుకు ప్లాన్ చేస్తున్నారు.