Raghavvi: రాఘవ లారెన్స్ కూతురు సంచలన నిర్ణయం.. హీరోయిన్‌గా కాకుండా ఆ రూట్‌లో ఇండస్ట్రీలోకి ఎంట్రీ!

Raghavvi: కొరియోగ్రాఫర్, హీరో, డైరెక్టర్, ప్రొడ్యూసర్‌గా టాలీవుడ్, కోలీవుడ్‌లలో తనకంటూ ఒక సెపరేట్ ఇమేజ్ క్రియేట్ చేసుకున్నారు రాఘవ లారెన్స్. ప్రస్తుతం ఆయన ‘కాంచన-4’, లోకేష్ కనగరాజ్ ‘బెంజ్’, ప్రతిష్ఠాత్మక చిత్రం ‘కాలభైరవ’లతో ఫుల్ బిజీగా ఉన్నారు. ఇదిలా ఉంటే లారెన్స్ కుటుంబం నుంచి మరో క్రేజీ స్టార్ కిడ్ త్వరలోనే సినీ ఎంట్రీ ఇవ్వబోతున్నరానే వార్త ఇప్పుడు సోషల్ మీడియాలో హాట్ టాపిక్‌గా మారింది. లారెన్స్ కూతురు రాఘవి ఇండస్ట్రీలోకి అడుగుపెట్టేందుకు సర్వం సిద్ధమైందట.

సాధారణంగా స్టార్ల వారసులు, ముఖ్యంగా కూతుళ్లు ఇండస్ట్రీలోకి వస్తున్నారంటే హీరోయిన్లుగానో లేదా ప్రొడ్యూసర్లుగానో ఎంట్రీ ఇస్తుంటారు. కానీ రాఘవి మాత్రం అందరి రూట్‌కు భిన్నంగా ఏకంగా ‘దర్శకురాలిగా’ ఇండస్ట్రీకి పరిచయం కాబోతున్నారని సమాచారం. రాఘవికి చిన్నప్పటి నుంచే సినిమా మేకింగ్, స్క్రీన్ ప్లే పట్ల విపరీతమైన ఆసక్తి ఉందట. దీంతో ఆమె అమెరికా వెళ్లి డైరెక్షన్ టెక్నాలజీలో ప్రొఫెషనల్ కోర్సు కూడా పూర్తి చేసి భారత్‌కు తిరిగొచ్చారు. పరిశ్రమలో ఎవరైనా డైరెక్టర్ కావాలంటే పెద్ద పెద్ద దర్శకుల దగ్గర ఏళ్ల తరబడి అసిస్టెంట్‌గా, అసోసియేట్‌గా పనిచేసి అనుభవం సంపాదిస్తారు. కానీ రాఘవి మాత్రం ఎలాంటి ముందస్తు ప్రాక్టికల్ ఎక్స్‌పీరియన్స్ లేకుండా, నేరుగా డైరెక్టర్ సీట్లో కూర్చోబోతున్నారు. నేరుగా మెగాఫోన్ పట్టేందుకు సిద్ధమై ఆమె ఒక రకంగా భారీ రిస్క్ తీసుకోబోతోందని సినీ వర్గాల్లో చర్చ నడుస్తోంది. అయితే అమెరికాలో నేర్చుకున్న టెక్నాలజీ, తనకున్న విజన్ మీదున్న నమ్మకంతోనే ఆమె ఈ నిర్ణయం తీసుకున్నట్లు తెలుస్తోంది.

కూతురి పట్టుదలను చూసి లారెన్స్ కూడా గ్రీన్ సిగ్నల్ ఇచ్చేశారట. ఈ మొదటి సినిమాను తన సొంత బ్యానర్‌పై, భారీ బడ్జెట్‌తో తనే స్వయంగా నిర్మించడానికి లారెన్స్ రెడీ అయ్యారని చెబుతున్నారు. ఇప్పటికే దీనికి సంబంధించిన కథ కూడా రెడీ అయినట్లు సమాచారం. గతంలో తన తమ్ముడు ఎల్విన్ లారెన్స్‌ను హీరోగా పరిచయం చేసి సపోర్ట్ ఇచ్చిన లారెన్స్.. ఇప్పుడు తన కూతురిని కూడా డైరెక్టర్‌గా లాంచ్ చేస్తూ తన ఫ్యామిలీ నుంచి మరో కొత్త టాలెంట్‌ను పరిశ్రమకు అందిస్తున్నారని చెబుతన్నారు. మరి రాఘవి తన మొదటి సినిమాతో ఎలాంటి సంచలనం సృష్టిస్తుందో వేచి చూడాలి. దీనికి సంబంధించిన అధికారిక ప్రకటన రావాల్సి ఉంది.