Virat Kohli: కాలం ఎవరికీ ఆగదు.. విరాట్ కోహ్లీ ఆఖరి పోరాటం.. అయినా ఇంకా 14 కొట్టొచ్చు ఇలా!

Virat Kohli 100 Centuries Path: టీమిండియా స్టార్‌ బ్యాటర్‌ విరాట్‌ కోహ్లీ కెరీర్‌ ఇప్పటికే ఎన్నో రికార్డులు, మైలురాళ్లతో నిండిపోయింది. వన్డే ప్రపంచ కప్‌, టీ20 ప్రపంచ కప్‌, ఛాంపియన్స్‌ ట్రోఫీ వంటి ఐసీసీ టైటిళ్లను అందుకున్న కోహ్లీ.. చివరికి రాయల్‌ ఛాలెంజర్స్‌ బెంగళూరు (ఆర్సీబీ) తరఫున ఐపీఎల్‌ ట్రోఫీని కూడా ముద్దాడాడు. దీంతో తన సుదీర్ఘ కెరీర్‌లో చాలా కాలంగా ఎదురుచూస్తున్న మరో కలను నెరవేర్చుకున్నాడు. అయినప్పటికీ కోహ్లీ ఆటలో మాత్రం ఇంకా అదే దూకుడు కనిపిస్తోంది. 38 ఏళ్ల వయసులోనూ పరుగుల వేటను కొనసాగిస్తూ.. కొత్త రికార్డుల దిశగా అడుగులు వేస్తున్నాడు.

కెరీర్‌లో చివరి టోర్నీ:

సాధారణంగా 38 ఏళ్ల వయసులో చాలామంది క్రికెటర్లు ఆటకు వీడ్కోలు పలికి కామెంటేటర్లుగా, విశ్లేషకులుగా మారుతుంటారు. కానీ కింగ్ కోహ్లీ మాత్రం అందుకు భిన్నంగా మైదానంలోనే సత్తా చాటుతున్నాడు. ఫిట్‌నెస్‌, క్రమశిక్షణ, పరుగుల కోసం తపన, మైదానంలో చురుకుదనం.. ఇలా ప్రతి విషయంలోనూ తన ప్రత్యేకతను కొనసాగిస్తున్నాడు. వికెట్ల మధ్య వేగంగా పరుగెత్తడం, ప్రత్యర్థి బౌలర్లపై ఒత్తిడి పెంచడం, మైదానంలో ఉత్సాహంగా కనిపించడం వంటి లక్షణాలు ఇప్పటికీ అతడిలో అలాగే ఉన్నాయి. అయితే కాలం ఎవరికీ ఆగదు. 2027 వన్డే ప్రపంచ కప్‌ కోహ్లీ అంతర్జాతీయ కెరీర్‌లో చివరి టోర్నీ కావచ్చని క్రికెట్‌ వర్గాల్లో చర్చ జరుగుతోంది. ప్రపంచ కప్‌ ట్రోఫీని మరోసారి అందుకుని కెరీర్‌కు ఘనమైన ముగింపు పలకాలనే లక్ష్యం అతడికి ఉందని అభిమానులు ఆశిస్తున్నారు. దీనికి తోడు క్రికెట్‌ దిగ్గజం సచిన్‌ టెండూల్కర్‌ నెలకొల్పిన 100 అంతర్జాతీయ సెంచరీల రికార్డు కూడా కింగ్ ముందున్న మరో అసలైన సవాలు.

అభిమానుల్లో కొత్త ఆశలు:
ప్రస్తుతం విరాట్ కోహ్లీ అంతర్జాతీయ క్రికెట్‌లో 86 సెంచరీలు సాధించాడు. సచిన్‌ టెండూల్కర్‌ నెలకొల్పిన 100 సెంచరీల ప్రపంచ రికార్డును సమం చేయాలంటే మరో 14 శతకాలు చేయాల్సి ఉంది. టెస్టులు, టీ20 అంతర్జాతీయ మ్యాచ్‌లకు వీడ్కోలు పలికిన తర్వాత ఈ రికార్డును అందుకోవడం కోహ్లీకి మరింత కష్టంగా మారింది. అయితే 2025లో టెస్టు క్రికెట్‌కు రిటైర్మెంట్‌ ప్రకటించిన తర్వాత కూడా వన్డేల్లో అతడి బ్యాట్‌ నుంచి నాలుగు సెంచరీలు రావడం అభిమానుల్లో కొత్త ఆశలు రేకెత్తించింది. దక్షిణాఫ్రికాతో 2025 నవంబర్‌ 30న రాంచీలోని జేఎస్‌సీఏ స్టేడియంలో జరిగిన వన్డేలో కోహ్లీ 135 పరుగులు చేశాడు. ఇది అతడి 52వ వన్డే సెంచరీ కాగా.. అంతర్జాతీయ కెరీర్‌లో 83వది. ఆ తర్వాత డిసెంబర్‌ 3న రాయ్‌పూర్‌లో జరిగిన మ్యాచ్‌లో 102 పరుగులు చేసి 53వ వన్డే శతకాన్ని, 84వ అంతర్జాతీయ సెంచరీని నమోదు చేశాడు.

100 సెంచరీల రికార్డు దిశగా:
2026 జనవరి 18న ఇండోర్‌లో న్యూజిలాండ్‌తో జరిగిన వన్డేలో మరోసారి 102 పరుగులతో మెరిశాడు. ఇది అతడికి 54వ వన్డే సెంచరీ, 85వ అంతర్జాతీయ శతకం. ఇక 2026 సెప్టెంబర్‌ 27న తిరువనంతపురంలోని గ్రీన్‌ఫీల్డ్‌ స్టేడియంలో వెస్టిండీస్‌పై అజేయంగా 139 పరుగులు చేసి 55వ వన్డే సెంచరీని, 86వ అంతర్జాతీయ సెంచరీని తన ఖాతాలో వేసుకున్నాడు. ఈ నాలుగు సెంచరీలు కేవలం 16 మ్యాచ్‌ల్లోనే రావడం విశేషం. అంటే ప్రతి నాలుగు వన్డేలకు ఒక సెంచరీ చొప్పున సాధించాడు. ఇదే స్థాయి ప్రదర్శనను కొనసాగిస్తే 100 సెంచరీల రికార్డు దిశగా అతడు మరింత ముందుకు వెళ్లే అవకాశం ఉంది. 2027 వన్డే ప్రపంచ కప్‌కు ముందు భారత్‌ ఇంకా పలు వన్డే సిరీస్‌లు, టోర్నీల్లో పాల్గొనాల్సి ఉంది. న్యూజిలాండ్‌తో నాలుగు వన్డేలు, శ్రీలంకతో మూడు, జింబాబ్వేతో మూడు మ్యాచ్‌లు ఆడే అవకాశం ఉంది. అలాగే 2027లో వన్డే ఫార్మాట్‌లో జరగనున్న ఆసియా కప్‌లో భారత్‌ గరిష్ఠంగా ఏడు మ్యాచ్‌లు ఆడవచ్చు. వీటితో పాటు బీసీసీఐ ఇంకా ఖరారు చేయని మరో ఆరు వన్డేలు కూడా షెడ్యూల్‌లో చేరే అవకాశం ఉంది.

అసాధ్యమని కూడా చెప్పలేం:
ఇవన్నీ కలిపి చూస్తే.. 2027 ప్రపంచ కప్‌ ప్రారంభానికి ముందు విరాట్ కోహ్లీ సుమారు 30 నుంచి 35 వన్డేలు ఆడే అవకాశం ఉంది. ఇక దక్షిణాఫ్రికాలో జరగనున్న ప్రపంచ కప్‌లో భారత్‌ ఫైనల్‌ వరకు చేరితే.. మరో 13 మ్యాచ్‌లు ఆడే అవకాశం ఉంటుంది. కోహ్లీ ప్రస్తుతం 86 అంతర్జాతీయ సెంచరీలతో ఉన్నాడు. సచిన్‌ 100 సెంచరీల రికార్డును సమం చేయాలంటే మరో 14 శతకాలు కావాలి. ప్రపంచ కప్‌ ముగిసే వరకు అతడికి 30 నుంచి 35 వన్డేలు ఆడే అవకాశం ఉంటే.. ప్రతి రెండున్నర మ్యాచ్‌లకు ఒక సెంచరీ చొప్పున సాధించాల్సి ఉంటుంది. ఇది అంత సులభమైన విషయం కాకపోయినా.. కోహ్లీ గతంలో నెలకొల్పిన ప్రమాణాలను చూస్తే అసాధ్యమని కూడా చెప్పలేం. మొత్తంగా 2027 ప్రపంచ కప్‌ కోహ్లీ కెరీర్‌లో కీలక మలుపుగా మారే అవకాశం ఉంది. ఒకవైపు దేశానికి మరో ప్రపంచ కప్‌ అందించాలనే లక్ష్యం.. మరోవైపు సచిన్‌ 100 అంతర్జాతీయ సెంచరీల రికార్డును అందుకోవాలనే అరుదైన అవకాశం.. ఈ రెండు లక్ష్యాలతో కోహ్లీ తన బ్యాటింగ్‌ ప్రయాణాన్ని కొనసాగిస్తున్నాడు. ఈ చారిత్రక మైలురాయిని అందుకుంటాడా లేదా అన్నది రాబోయే మ్యాచ్‌ల్లో అతడి ప్రదర్శనపై ఆధారపడి ఉంటుంది.