Obsession Collections : 7 కోట్ల బడ్జెట్ తో 1000కోట్లకు పైగా కలెక్షన్లు… బాక్సాఫీస్ లో అదరగొడుతన్న హారర్ థ్రిల్లర్

Obsession Collections : కొన్ని సినిమాలు భారీ బడ్జెట్‌తో వస్తాయి. మరికొన్ని స్టార్ హీరోల హంగామాతో ప్రేక్షకులను అలరిస్తాయి. అయితే అరుదుగా మాత్రమే కొన్ని చిత్రాలు ఎలాంటి అంచనాలు లేకుండానే ప్రపంచవ్యాప్తంగా చర్చనీయాంశంగా మారుతాయి. ప్రస్తుతం హాలీవుడ్‌లో అలాంటి సంచలనమే సృష్టిస్తోంది సైకలాజికల్ హారర్ చిత్రం ‘అబ్సెషన్’. తక్కువ బడ్జెట్‌తో తెరకెక్కిన ఈ సినిమా, విడుదలైన నాలుగు రోజుల్లోనే వెయ్యి కోట్లకు పైగా వసూళ్లు సాధించి సినీ పరిశ్రమను ఆశ్చర్యానికి గురి చేసింది.

బడ్జెట్ ఏడు కోట్లు మాత్రమే

అబ్సెషన్ నిర్మాణ వ్యయం ఒక మిలియన్ డాలర్ల లోపే ఉండటం విశేషం. భారతీయ కరెన్సీలో ఇది సుమారు 7.3 కోట్ల రూపాయలుగా అంచనా వేస్తున్నారు. అయితే విడుదలైన నాలుగు రోజుల్లోనే ప్రపంచవ్యాప్తంగా 148 మిలియన్ డాలర్లకు పైగా, అంటే దాదాపు 1,200 కోట్ల రూపాయల వసూళ్లు సాధించడం ట్రేడ్ వర్గాలను కూడా ఆశ్చర్యపరిచింది. చిన్న సినిమా కూడా బలమైన కథ ఉంటే ప్రపంచవ్యాప్తంగా ఎంతటి ప్రభావం చూపగలదో అబ్సెషన్ మరోసారి నిరూపించింది.

భారతీయ మార్కెట్‌లో కూడా ఈ సినిమా మంచి ఆదరణ పొందుతోంది. ప్రముఖ బాక్సాఫీస్ ట్రాకింగ్ సంస్థ సాక్‌నిల్క్ వెల్లడించిన గణాంకాల ప్రకారం, ఇప్పటివరకు ఈ చిత్రం దేశవ్యాప్తంగా 11.52 కోట్ల రూపాయల గ్రాస్, 9.75 కోట్ల రూపాయల నెట్ కలెక్షన్లను నమోదు చేసింది. మే 29న విడుదలైన ఈ సినిమా మొదటి రోజు సాధారణ స్థాయిలో ఓపెనింగ్స్ సాధించినప్పటికీ, వీకెండ్‌లో కలెక్షన్లు గణనీయంగా పెరిగాయి. ముఖ్యంగా ఆదివారం భారీ వసూళ్లతో బాక్సాఫీస్ వద్ద తన సత్తా చాటింది.

సినిమా కథ

ఈ స్టోరీ కూడా ప్రేక్షకులను ఆకట్టుకునేలా ఉంటుంది. మ్యూజిక్ స్టోర్‌లో పనిచేసే బేర్ అనే యువకుడు తన సహోద్యోగి నిక్కీని ప్రేమిస్తాడు. అయితే తన ప్రేమను ఆమెకు చెప్పే ధైర్యం చేయలేడు. ఇదే సమయంలో అతనికి ఒక విచిత్రమైన శక్తులు కలిగిన బొమ్మ దొరుకుతుంది. యజమాని కోరుకున్న ఒక కోరికను నెరవేర్చగల ఆ బొమ్మ సహాయంతో నిక్కీ తనను ప్రేమించాలని బేర్ కోరుకుంటాడు. అక్కడి నుంచి ప్రారంభమయ్యే సంఘటనలు వారి జీవితాలను పూర్తిగా మార్చేస్తాయి. ఒక కోరిక ఎలా భయంకరమైన పరిణామాలకు దారితీస్తుందో సినిమా ఉత్కంఠభరితంగా చూపిస్తుంది. ప్రేమ పేరుతో జరిగే మానసిక వేధింపులు ఎంత ప్రమాదకరమో ఈ చిత్రం కళ్లకు కట్టినట్లు చూపించింది. అందుకే యువతతో పాటు మహిళా ప్రేక్షకులు కూడా ఈ చిత్రానికి ఎక్కువగా కనెక్ట్ అవుతున్నారు. భయంతో పాటు ఆలోచింపజేసే అంశాలను కలిపి చూపించడంతో ఈ చిత్రం ప్రపంచవ్యాప్తంగా ఆదరణ పొందుతోంది.