Measles: గాల్లో వైరస్..30ఏళ్ల తర్వాత అదే ముప్పు!

ఒక చిన్న వైరస్.. గాలిలో ప్రయాణిస్తుంది. ఒక మనిషి నుంచి మరో మనిషికి చేరుతుంది. మొదట జ్వరంలా కనిపిస్తుంది.. ఆ తర్వాత శరీరమంతా ఎర్రటి దద్దుర్లతో నిండిపోతుంది. పరిస్థితి విషమిస్తే ఊపిరితిత్తులను దెబ్బతీస్తుంది.. మెదడుపై దాడి చేస్తుంది.. చివరకు ప్రాణాలనే తీస్తుంది.

ఒకప్పుడు ప్రపంచవ్యాప్తంగా చిన్నారుల మరణాలకు ప్రధాన కారణాల్లో ఒకటిగా ఉన్న ఈ వ్యాధి.. ఇప్పుడు మళ్లీ అమెరికాలో భయాన్ని పుట్టిస్తోంది. దాని పేరే మీజిల్స్.. మనం తట్టు వ్యాధి అని కూడా పిలుచుకుంటాం.

2026లో అమెరికాలో ఈ వ్యాధి వ్యాప్తి వేగంగా పెరుగుతోంది. ముఖ్యంగా పెన్సిల్వేనియా రాష్ట్రంలో పరిస్థితి తీవ్రంగా మారింది. ఏప్రిల్ చివరిలో మొదలైన వ్యాప్తి.. ఇప్పుడు 45 కౌంటీలకు చేరుకుంది. మొత్తం 1,467 మందికి ఈ వ్యాధి సోకింది. వీరిలో 283 మంది ఆసుపత్రుల్లో చికిత్స పొందాల్సి వచ్చింది.

ఇప్పటివరకు ఆరుగురు ప్రాణాలు కోల్పోయారు. మరోవైపు అమెరికా మొత్తం మీద అక్టోబర్ 29 నాటికి 4,852 కేసులు నమోదయ్యాయి. వీటిలో 96 శాతం వ్యాధి వ్యాప్తి జరుగుతున్న ప్రాంతాలకు సంబంధం ఉన్నవే. మూడు దశాబ్దాలకు పైగా అమెరికాలో కనిపించిన అతిపెద్ద మీజిల్స్ వ్యాప్తుల్లో ఇది ఒకటి.

అయితే ఈ వ్యాధి ఇప్పుడే పుట్టింది కాదు. దీని చరిత్ర వందల ఏళ్ల నాటిది. టీకాలు అందుబాటులోకి రాకముందు మీజిల్స్ ప్రపంచవ్యాప్తంగా లక్షలాది చిన్నారుల ప్రాణాలను బలిగొంది. ఒక ఇంట్లో ఒకరికి వస్తే.. ఆ తర్వాత పిల్లలందరికీ వ్యాపించే భయం ఉండేది. వ్యాధి నుంచి కోలుకున్నా కొందరికి చూపు దెబ్బతినేది, మరికొందరికి ఊపిరితిత్తులు, మెదడుకు సంబంధించిన సమస్యలు వచ్చేవి.

1963లో మీజిల్స్ టీకా అందుబాటులోకి రావడంతో ఈ పరిస్థితిని మార్చే అవకాశం ఏర్పడింది. అయినా టీకాలు అందని ప్రాంతాల్లో ఈ వైరస్ తన ప్రభావాన్ని కొనసాగిస్తూనే ఉంది. ఇంతకీ అసలు మీజిల్స్ అంటే ఏమిటి? ఇది ఒక వైరస్ వల్ల వచ్చే అంటువ్యాధి. బాధితుడు దగ్గినప్పుడు, తుమ్మినప్పుడు గాలిలోకి వెళ్లే వైరస్.. పక్కనున్న వ్యక్తికి సులభంగా సోకుతుంది. అంతేకాదు, బాధితుడు వెళ్లిపోయిన తర్వాత కూడా రెండు గంటల వరకు ఆ గదిలోని గాలిలో ఈ వైరస్ ఉండగలదు. అంటే వైరస్ సోకిన వ్యక్తిని నేరుగా కలవకపోయినా, అతను ఉన్న ప్రదేశంలోకి వెళ్లడం వల్ల కూడా ఇన్ఫెక్షన్ వచ్చే ప్రమాదం ఉంది.

మొదట తీవ్రమైన జ్వరం, దగ్గు, ముక్కు కారడం, కళ్ల నుంచి నీరు కారడం కనిపిస్తాయి. కొన్ని రోజుల తర్వాత ముఖంపై ఎర్రటి దద్దుర్లు మొదలై క్రమంగా శరీరమంతా వ్యాపిస్తాయి. చాలామంది కోలుకున్నప్పటికీ, కొందరిలో పరిస్థితి ప్రాణాంతకంగా మారుతుంది.

ఊపిరితిత్తుల్లో ఇన్ఫెక్షన్ ఏర్పడి న్యుమోనియా రావచ్చు. మెదడుకు వాపు వచ్చి ప్రాణాలకే ముప్పు ఏర్పడవచ్చు. అంతేకాదు, శరీరంలోని రోగనిరోధక శక్తిని బలహీనపరిచి ఇతర వ్యాధులతో పోరాడే సామర్థ్యాన్ని కూడా తగ్గిస్తుంది. ఇంతటి ప్రమాదకరమైన వ్యాధికి విరుగుడుగా మనిషి ఎప్పుడో టీకాను కనిపెట్టాడు. మీజిల్స్, మంప్స్, రుబెల్లా అనే మూడు వ్యాధుల నుంచి రక్షణ కల్పించే MMR టీకా.. రెండు డోసులు తీసుకుంటే మీజిల్స్ నుంచి దాదాపు 97 శాతం రక్షణ లభిస్తుంది. అయినా పెన్సిల్వేనియాలో వ్యాప్తి పెరుగుతుండటంతో ప్రజలు ఇప్పుడు టీకాల కోసం ముందుకొస్తున్నారు. సాధారణంగా నెలకు 25 వేల టీకా డోసులు ఇస్తుండగా, అక్టోబర్‌లో ఏకంగా 61 వేలకు పైగా ఇచ్చారు. వ్యాప్తి ఉన్న ప్రాంతాల్లో 6 నుంచి 11 నెలల చిన్నారులకు కూడా ముందస్తు టీకా ఇవ్వాలని సూచిస్తున్నారు. అయితే ఆ తర్వాత సాధారణంగా తీసుకోవాల్సిన రెండు డోసులు కూడా తప్పనిసరి.

ఒకప్పుడు ప్రపంచాన్ని వణికించిన వ్యాధి.. టీకా రాకతో అదుపులోకి వచ్చింది. కానీ ఆ రక్షణ అందరికీ చేరకపోతే, వైరస్‌కు మళ్లీ అవకాశం దొరుకుతుంది. పెన్సిల్వేనియాలో ఆరుగురి మరణాలు, వేలాది ఇన్ఫెక్షన్లు చెబుతున్నది అదే. మనిషి కనిపెట్టిన రక్షణను నిర్లక్ష్యం చేస్తే.. గతంలో ఎదుర్కొన్న భయం మళ్లీ వర్తమానంలోకి వస్తుంది.