Mukesh Rishi: ఆ హీరో సినిమాలో విలన్ గా చేసి తప్పు చేశా..

Mukesh Rishi: ఇప్పుడంటే కుర్ర హీరోలు విలన్స్ అవుతున్నారు.. ఒకప్పటి స్టార్ హీరోలు విలన్స్ గా మారుతున్నారు. కానీ, ఒకానొక సమయంలో విలన్స్ అంటే.. ఆశిష్ విద్యార్థి, షియాజీ షిండే, ముకేశ్ రిషి.. వీళ్ళే ఉండేవాళ్ళు. ముఖ్యంగా ముకేశ్ రిషి పేరు టాలీవుడ్ లో బాగా వినిపించింది. ఇంద్రలో వీరశంకర్ రెడ్డిగా అయన నటనను ఎప్పటికీ మర్చిపోలేరు. ఇక ఇండస్ట్రీలో మార్పులు వస్తున్న కొద్దీ విలన్స్ కూడా క్యారెక్టర్ ఆర్టిస్ట్స్ గా మారిపోయారు. ప్రస్తుతం ముకేశ్ రిషి.. ఒకపక్క విలన్ గా నటిస్తూనే ఇంకోపక్క వెబ్ సిరీస్ లలో సపోర్టింగ్ రోల్స్ చేస్తూ బిజీగా మారాడు. తాజాగా ఆయన అమెజాన్ లో స్ట్రీమింగ్ అవుతున్న ది ఇండియన్ పోలీస్ ఫోర్స్ లో ముఖ్యమైన పాత్రలో మెప్పించాడు. ఇక తాజాగా ఒక ఇంటర్వ్యూలో ముకేశ్ రిషి.. తన కెరీర్ లోని సినిమాల గురించి మాట్లాడాడు. కొన్ని సినిమాల్లో తాను చేసిన పాత్రలు తనకే నచ్చలేదని చెప్తూనే .. ఒక స్టార్ హీరో సినిమాలో నటించి తప్పు చేసినట్లు తెలిపాడు.

” సీనియర్ స్టార్ హీరో మిథున్ చక్రవర్తి హీరోగా నటించిన చిత్రం గుండా. అప్పటికే నేను అన్ని భాషల్లో విలన్ గా నటించి.. మంచి పేరు తెచ్చుకున్నాను. ఆ సమయంలోనే గుండా ఆఫర్ వచ్చింది. సినిమాలో నా పేరు బుల్లా. సినిమా చేసేటప్పుడే నాకు ఎందుకో అనిపించింది.. అనవసరం ఈ పాత్రను ఒప్పుకొని తప్పు చేశాను అని. ఇక ఈ సినిమా రిలీజ్ అయ్యి భారీ పరాజయాన్ని అందుకుంది. అయితే ఇదే సినిమా కొన్నేళ్లు తరువాత కల్ట్ బొమ్మగా ట్రెండ్ అయ్యింది. న పాత్రకు, డైలాగ్స్ కు మంచి పేరు వచ్చింది. నేను ఎక్కడికి వెళ్లినా కూడా ఆ డైలాగ్స్ చెప్పమని అడిగేవారు. బుల్లా గా నీ క్రేజ్‌ ఎలా ఉందో తెలుసా? ఇంటర్నెట్‌లో మొత్తం నీదే హవా అని సైఫ్‌ అలీఖాన్‌ చెప్పేవరకు నాకు ఈ విషయం తెలియలేదు. అప్పుడు ఈ పాత్ర ఒప్పుకొని తప్పు చేశా అనుకున్నాను.. ఆ తరువాత అలా అనుకోవడం తప్పు అని అనిపించింది” అని చెప్పుకొచ్చాడు.