Jr NTR: త్రివిక్రమ్, తమన్‌లకు తారక్ క్లాస్.. అప్పట్లో జరిగిందిదేనట!

Jr NTR: సినిమా రంగంలో ఎంత పెద్ద స్టార్ హీరోలైనా తమకు నచ్చిన దర్శకులు, సంగీత దర్శకులతో ఎంతో చనువుగా ఉంటారు. అలాంటి సరదా ముచ్చటే ఇప్పుడు బయటకు వచ్చి నెట్టింట తెగ నవ్వులు పూయిస్తోంది. దర్శకుడు త్రివిక్రమ్ శ్రీనివాస్, సంగీత దర్శకుడు తమన్‌లకు జూనియర్ ఎన్టీఆర్ ఒకప్పుడు ఫోన్ చేసి ఫన్నీగా క్లాస్ పీకిన సంగతిని తాజాగా తమన్ స్వయంగా ఒక ఇంటర్వ్యూలో బయటపెట్టారు. ఎన్టీఆర్ హీరోగా వచ్చిన ‘అరవింద సమేత వీరరాఘవ’ సినిమాకి త్రివిక్రమ్ దర్శకత్వం వహించగా తమన్ సంగీతం అందించిన విషయం తెలిసిందే.

ఈ సినిమాలో తమన్ కొన్ని గుండెల్ని పిండేసే ఎమోషనల్ పాటలు ఇచ్చారు. కట్ చేస్తే.. ఆ వెంటనే అల్లు అర్జున్‌తో త్రివిక్రమ్ చేసిన ‘అల వైకుంఠపురములో’ సినిమా కోసం ‘సామజవరగమనా’, ‘బుట్టబొమ్మ’, ‘రాములో రాములా’ లాంటి అదిరిపోయే రొమాంటిక్, డాన్స్ నంబర్లు కంపోజ్ చేశారు. ఆ పాటలు బయటకు వచ్చి సూపర్ హిట్ కాగానే తారక్ వెంటనే త్రివిక్రమ్, తమన్‌లకు ఫోన్ చేశారట. “మాకేంట్రా ఏడబోయినాడో, ఎప్పుడు వస్తాడో లాంటి పాటలిచ్చారు.. బన్నీకి వచ్చేసరికి అలాంటి అదిరిపోయే సాంగ్స్ ఇచ్చేశారా?” అంటూ తనదైన స్టైల్‌లో సరదాగా వాళ్లిద్దరిని నిలదీశారని తమన్ గుర్తు చేసుకున్నారు.

అంతేకాదు, “నాకేమో ఎండలో నిలబెట్టి, నెత్తిమీద దుమ్ము పోసి, చొక్కాలు విప్పించి, చెమటలు కక్కించారు.. బన్నీకి అలాంటి సూపర్ హిట్ పాటలా” అంటూ తారక్ సరదాగా వేసిన పంచ్‌లను పక్కనే ఉన్న త్రివిక్రమ్ కూడా గుర్తు చేసుకుని పగలబడి నవ్వారు. తారక్‌కు ఇప్పటికీ తమపై ఆ విషయంలో చిన్న సరదా కోపం ఉందని తమన్ చెప్పడం విశేషం. ప్రస్తుతం ఈ స్టార్స్ మధ్య జరిగిన ఫన్నీ సంభాషణ సోషల్ మీడియాలో తెగ వైరల్ అవుతోంది.