Bichagadu 2: సిస్టర్ సెంటిమెంట్ సాంగ్ తో గుండెల్ని పిండేస్తున్న విజయ్ ఆంటోనీ!

Vijay Antony: ‘బిచ్చగాడు’ మూవీతో కెరీర్ బెస్ట్ హిట్ అందుకున్నాడు హీరో కమ్ మ్యూజిక్ డైరెక్టర్ విజయ్ ఆంటోనీ. తెలుగులోనూ ఈ చిత్రం చాలా పెద్ద విజయం సాధించింది. ఆ చిత్రానికి సీక్వెల్ గా స్వీయ దర్శకత్వంలో ‘బిచ్చగాడు-2’తో వస్తున్నాడు. ఈ మూవీ నుంచి ఆ మధ్య విడుదల చేసిన ఫస్ట్ లిరికల్ సాంగ్ కు అద్భుతమైన స్పందన వచ్చింది. లేటెస్ట్ గా ఈ మూవీ నుంచి సెకండ్ సాంగ్ రిలీజ్ చేసింది చిత్ర బృందం.

‘చెల్లి వినవే.. నా తల్లీ వినవే.. నీ అన్నను కానూ అమ్మను నేను.. చిట్టీ వినవే.. నా బుజ్జీ కనవే.. నీ పుట్టూ మచ్చై ఉంటా తోడూ’ అంటూ సాగే ఈ గీతాన్ని భాష్య శ్రీ రాయగా అనురాగ్ కులకర్ణి ఆలపించాడు. సంగీతం విజయ్ ఆంటోనీ అందించాడు. అనాథలైన హీరో, అతని సోదరి చిన్నతనంలో అనుభవించిన కష్టాలు, సమస్యల నేపథ్యంలో సాగే గీతంలా కనిపిస్తోంది. ‘బ్రతుకులే వీధిపాలైనా.. నిన్ను రథములో తిప్పుకోనా.. భూమి బద్దలైపోయి రెండు ముక్కలైపోయినా.. ఊయలల్లే నేను మారి నిన్ను మోయనా.. ’ అంటూ ఆర్ద్రతతో నిండిన సాహిత్యంతో వినగానే హృదయం బరువెక్కేలా ఉందీ పాట. ‘బిచ్చగాడు2’ లో ఇదే హైలెట్ సాంగ్ లానూ కనిపిస్తోంది. ప్రతి ఒక్కరినీ కదిలించేలా పూర్తి ఎమోషనల్ టచ్ తో ఉంది. ఇప్పటికే సినిమాపై భారీ అంచనాలుండటంతో ఈ సమ్మర్ కు మంచి విజయాన్ని ‘బిచ్చగాడు-2’ అందుకుంటుందనిపిస్తోంది. విశేషం ఏమంటే… ఈ సినిమాలో హీరోగా నటించి, డైరెక్షన్ చేస్తూ, మ్యూజిక్ అందించడంతో పాటు విజయ్ ఆంటోని ఎడిటింగ్ సైతం తానే చేసుకుంటున్నాడు. ఇది అతని సొంత బ్యానర్ విజయ్ ఆంటోనీ ఫిల్మ్ కార్పొరేషన్ పై నిర్మితం అవుతోంది. అతి త్వరలో జనం ముందుకు రాబోతున్న ఈ సినిమాలో కావ్య థాపర్ హీరోయిన్ గా నటించింది.