Ravibabu : డబ్బు, టైం ఉంటే ఏ వెధవైనా సినిమా అద్భుతంగా చేస్తాడు.. రవిబాబు సంచలన వ్యాఖ్యలు!
సినిమా అనేది కేవలం ఒక కళ మాత్రమే కాదు, అది పక్కా లెక్కలతో కూడిన ఒక వ్యాపారం కూడా, నేటితరం దర్శకులు టెక్నాలజీని, భారీ బడ్జెట్లను నమ్ముకుంటున్న వేళ, సీనియర్ దర్శకుడు రవిబాబు చేసిన వ్యాఖ్యలు ఇప్పుడు ఇండస్ట్రీలో హాట్ టాపిక్ అయ్యాయి. అసలు ‘ఫిల్మ్ మేకింగ్’ అంటే ఏమిటి? అన్న ప్రశ్నకు ఆయన ఇచ్చిన సమాధానం అటు మేకర్స్కి, ఇటు ప్రేక్షకులకు కొత్త కోణాన్ని పరిచయం చేస్తోంది. ఒక అద్భుతమైన కథను, అనుకున్న బడ్జెట్లో, కేటాయించిన సమయంలో, ఉన్న వనరులతో వెండితెరపై ఆవిష్కరించడమే నిజమైన సినిమా మేకింగ్ అని అన్నారు. రవిబాబు అభిప్రాయం ప్రకారం, “అపరిమితమైన సమయం, అంతులేని బడ్జెట్ ఉంటే ఏ వెదవ అయినా సినిమా తీస్తాడు, కానీ, పరిమితుల మధ్య ఉండి, క్వాలిటీ తగ్గకుండా అవుట్పుట్ తీసుకురావడమే దర్శకుడి ప్రతిభకు అసలైన పరీక్ష.
హాలీవుడ్ స్టూడియోల పనితీరును గమనిస్తే, అక్కడ ప్రతి నిమిషానికి ఒక లెక్క ఉంటుంది. స్క్రిప్ట్ లాక్ అయిన తర్వాత, షూటింగ్ షెడ్యూల్ దాటడం అన్నది అక్కడ అరుదుగా జరుగుతుంది. అలాంటి పక్కా ప్రణాళిక ఉన్నప్పుడే నిర్మాతలు నష్టపోకుండా ఉంటారు. కానీ, మన దగ్గర మాత్రం నెలల తరబడి షూటింగ్లు సాగదీయడం, బడ్జెట్ అదుపు తప్పడం అన్నది సర్వసాధారణం అయిపోయింది. ఈ ధోరణి మారాల్సిన అవసరం ఎంతైనా ఉందని అన్నారు. ఒక కథను రూపొందించేటప్పుడు దాని స్కోప్ ముందే ఊహించగలగాలి. అందుబాటులో ఉన్న నిధులతో విజువల్స్ ఎలా గ్రాండ్గా చూపాలి? అనుకున్న తేదీకి సినిమాను సిద్ధం చేయడం వల్ల కలిగే మార్కెట్ ప్రయోజనాలు ఏమిటి? ఉన్న టెక్నీషియన్లను, పరికరాలను గరిష్ట స్థాయిలో ఎలా ఉపయోగించుకోవాలి? ఈ మూడు అంశాలను బ్యాలెన్స్ చేయడమే ఒక దర్శకుడి అసలైన విజయం. కేవలం విజువల్ ఎఫెక్ట్స్ కోసమో, అనవసరపు గ్రాండియర్ కోసమో సమయాన్ని వృధా చేయడం వల్ల ప్రాజెక్ట్ విలువ తగ్గుతుంది తప్ప పెరగదని అభిప్రాయం వ్యక్తం చేశారు.