Kanmani: ఆ విషయంలో కమల్ హాసన్ తర్వాత తారకే పర్ఫెక్ట్

జూ. ఎన్టీఆర్ ఎంత గొప్ప నటుడో ప్రత్యేకంగా చెప్పుకోనవసరం లేదు. ‘జై లవ కుశ’లో తాను చెప్పిన ‘ఘట్టమేదైనా, పాత్రేదైనా’ అన్నట్టు.. ఎలాంటి పాత్ర ఇచ్చినా అవలీలగా చేసేస్తాడు. ఇతని నటనలో సహజత్వం ఉట్టిపడుతుందే తప్ప.. ఎక్కడా ఫేక్ కనిపించదు. ఈతరం హీరోల్లో నవరసాల్ని పండింగల హీరో ఎవరైనా ఉన్నారంటే, అది తారక్ అని చెప్పుకోవడంలో అతిశయోక్తి లేదు. సాక్షాత్తూ.. దర్శకధీరుడు రాజమౌళి లాంటోడే తన ఫేవరేట్ హీరో అని తారక్ చెప్పాడంటే, అతడు ఎంత విలక్షణ నటుడో అర్థం చేసుకోవచ్చు. ఇప్పుడు మరో దర్శకుడు.. తారక్‌పై పొగడ్తల వర్షం కురిపించడం, కమల్ హాసన్ తర్వాత అతడే పర్ఫెక్ట్ ఆర్టిస్ట్ అని పేర్కొనడం టాక్ ఆఫ్ ద టౌన్‌ అయ్యింది

ఆ దర్శకుడి పేరు కన్మణి. ఈయన నా ఊపిరి, చిన్నోడు, బీరువా వంటి సినిమాలను తీశాడు. రీసెంట్‌గా ఇచ్చిన ఇంటర్వ్యూలో.. ఇప్పుడు హీరోల్లో పర్ఫెక్ట్ ఆర్టిస్ట్ ఎవరనే ప్రశ్న కన్మణికి ఎదురవ్వగా.. ఏమాత్రం మొహమాటం లేకుండా కుండబద్దలు కొట్టినట్టు తారక్ అని చెప్పేశాడు. ‘‘నాకు వ్యక్తిగతంగా తారక్ అంటే చాలా ఇష్టం. నాకు తెలిసి, ఇప్పుడున్న హీరోల్లో కమల్ హాసన్ తర్వాత పర్ఫెక్ట్ ఆర్టిస్ట్ ఎవరైనా ఉన్నారంటే, అది తారకే అని చెప్తాను. ఎందుకంటే, క్లోజప్ షాట్‌లో ఏ స్టార్ హీరో కూడా ఏడ్వడానికి ఇష్టపడరు. కానీ.. కమల్, ఎన్టీఆర్ మాత్రం అలా కాదు. మిగతా హీరోలు క్లోజప్ షాట్స్‌లో ఏడ్వడానికి ట్రై చేసినా, అందులో ఒరిజినాలిటీ కనిపించదు. కానీ.. అదే సీన్ ఎన్టీఆర్ – కమల్ చేస్తే, సోల్ కనిపిస్తుంది’’ అంటూ కన్మణి చెప్పుకొచ్చాడు.

ఇదే సమయంలో.. ఆర్ఆర్ఆర్‌లో తారక్ ప్రదర్శించిన గొప్ప పెర్ఫార్మెన్స్ గురించి కన్మణి మాట్లాడాడు. ‘కొమరం భీముడో’ పాటలో తారక్ పలికిన హావభావాలు, పండించిన ఎమోషన్స్.. అతని ప్రతిభకు తార్కాణం అన్నాడు. ఎమోషనల్ కంటెంట్ విషయంలో తారక్ ‘ఆర్ఆర్ఆర్’కు సోల్‌గా నిలిచాడని తెలిపాడు. ఇలా తారక్‌పై కన్మణి చేసిన పొగడ్తలు నెట్టింట వైరల్‌గా మారాయి. ముఖ్యంగా, తారక్ ఫ్యాన్స్ అయితే ఫుల్ ఖుష్ అవుతున్నారు.