Kollywood: నెక్స్ట్ సూపర్ స్టార్ ఎవరు?

ఒకప్పుడు తమిళ సినీ పరిశ్రమలో నువ్వా-నేనా అన్న స్థాయిలో పోటీ పడిన ఇద్దరు లెజెండ్స్ రజినీకాంత్ అండ్ కమల్ హాసన్. వీళ్ళ తర్వాత అదే రేంజ్ మాస్ క్రేజ్ సొంతం చేసుకున్న విజయ్ ఇప్పుడు రాజకీయాల వైపు అడుగులు వేయడంతో, తమిళ సినీ పరిశ్రమలో మళ్ళీ ‘సూపర్ స్టార్’ చర్చ హాట్ టాపిక్ అవుతోంది. మరి, తమిళ సినిమాను వచ్చే దశాబ్దం ఏలబోయే నెక్స్ట్ స్టార్ ఎవరు?

రజినీకాంత్ :
రజినీకాంత్ కెరీర్‌లో ‘బాషా’ ఒక టర్నింగ్ పాయింట్. ఆ సినిమా తర్వాత రజినీకాంత్ కేవలం హీరో కాదు, తమిళ ప్రేక్షకులలో ఒక సంచలనం అయ్యాడు. నాలుగు దశాబ్దాలుగా ఆయన స్టైల్, డైలాగ్ డెలివరీ, మాస్ ఇమేజ్ అభిమానులను అలరిస్తూనే ఉన్నాయి. 2025లో వచ్చిన ‘కూలీ’ కంటెంట్ పరంగా కాస్త వీక్ గా ఉన్నా, రజినీకాంత్ క్రేజ్ తో ఏకంగా 500 కోట్లకు పైగా గ్రాస్ కలెక్షన్స్ రాబట్టింది. రజనీకాంత్ వయసు పెరుగుతున్నా సినిమాల ఎంపికలో వేగం మాత్రం తగ్గలేదు. ‘జైలర్ 2’, ‘తలైవర్ 173’ లాంటి భారీ ప్రాజెక్టులు ఆయన స్టార్ పవర్‌ను మరింత బలపరుస్తున్నాయి.

కమల్ హాసన్: మరోవైపు కమల్ హాసన్ ‘విక్రమ్’తో స్ట్రాంగ్ హిట్ అందుకున్నా, ‘థగ్ లైఫ్’ గట్టి దెబ్బేసింది. ఇప్పుడు కమల్ అప్‌కమింగ్ లిస్ట్‌లో ‘కల్కి 2’, ‘KH 233’తో పాటు రజినీకాంత్-కమల్ హాసన్ కాంబోలో రాబోతున్న సినిమాలతో బిజీగా ఉన్నప్పటికీ.. మాస్ ఫాలోయింగ్ పరంగా రజినిని అధిగమించడం కష్టమే.

దళపతి విజయ్:
ఇలయదళపతి నుంచి దళపతిగా మారిన విజయ్.. వరుస బ్లాక్ బస్టర్లు, అమేజింగ్ ఫ్యాన్ ఫాలోయింగ్, రికార్డు స్థాయి ఓపెనింగ్స్ తో రజినీకాంత్ తర్వాత అంతే ఇంపాక్ట్ క్రియేట్ చేసిన స్టార్ గా నిలిచాడు. అయితే, విజయ్ ఇప్పుడు రాజకీయాల వైపు టర్న్ తీసుకోవడం, సీఎం అయిపోవడంతో.. కోలీవుడ్ లో రజినీకాంత్ తర్వాత విజయ్ వరకు వచ్చిన ఈ సూపర్ స్టార్ వారసత్వాన్ని ఇక్కడి నుంచి ఎవరు కొనసాగిస్తారు అనే క్వశ్చన్ రేజ్ అవుతోంది.

కోలీవుడ్ అభిమానులు ‘తలా’ అని ప్రేమగా పిలుచుకునే హీరో అజిత్ కుమార్. విజయ్ రాజకీయాల్లోకి వెళ్ళిపోవడంతో తమిళ సినీ పరిశ్రమలో ఖాళీ అయిపోయిన అగ్రస్థానాన్ని అందుకునే హీరో అజితేనా? సినిమాలకంటే రేసింగ్‌లపై ఎక్కువ ఫోకస్ పెట్టడం, ప్రమోషన్స్‌కు దూరంగా ఉండడం, లిమిటెడ్ సినిమాలు చేయడం లాంటి కారణాలు ఉన్నప్పటికీ అజిత్ క్రేజ్ తగ్గలేదు. ‘విడముయార్చి’, ‘గుడ్ బ్యాడ్ అగ్లీ’ లాంటి సినిమాలు మిక్స్డ్ టాక్ తెచ్చుకున్నా భారీ ఓపెనింగ్స్ సాధించాయి. ఎలాంటి ఆడియో ఫంక్షన్స్, ఇంటర్వ్యూలు, సోషల్ మీడియా ప్రచారం లేకుండానే థియేటర్లకు అభిమానులను రప్పించగల సామర్థ్యం అజిత్ కే సొంతం. 2025లో భారత ప్రభుత్వం ఆయనకు ‘పద్మభూషణ్’ పురస్కారం ప్రదానం చేయడం ఆయనకున్న గౌరవాన్ని మరింత పెంచింది. ప్రస్తుతం ‘AK 64’ కూడా భారీ బడ్జెట్‌తో రూపుదిద్దుకుంటోంది. ఒక సూపర్ స్టార్ గా నిలవాలంటే కేవలం క్రేజ్ మాత్రమే సరిపోదు; నిరంతరం సినిమాలు చేయడం, విస్తృత ప్రమోషన్స్, పాన్ ఇండియా స్థాయిలో ఇంపాక్ట్ క్రియేట్ చేయడం అవసరం. అజిత్ మాత్రం తనకు నచ్చినప్పుడు మాత్రమే సినిమాలు చేస్తూ, మిగతా సమయాన్ని రేసింగ్, పర్సనల్ ఎంజాయ్‌మెంట్‌కే కేటాయిస్తూ ఉంటాడు. అందుకే, ఆయన ఈ స్థానంలో పూర్తిగా ఫిట్ కాలేడు అన్నది విశ్లేషకుల అభిప్రాయం.

విక్రమ్ – విజయ్ సేతుపతి:
విక్రమ్ లాంటి విలక్షణ నటుడు, విజయ్ సేతుపతి లాంటి సహజ నటుడు.. ఇద్దరికీ అపారమైన ప్రతిభ, ఇండియా వైడ్ గుర్తింపు ఉంది. మరి వీరు భవిష్యత్తులో కమర్షియల్ సూపర్ స్టార్స్ గా ఎదుగుతారా? లేక గ్రేట్ యాక్టర్స్ గానే మిగిలిపోతారా? విక్రమ్ అంటే ముందుగా గుర్తొచ్చేది ఆయన డెడికేషన్. ‘అన్నియన్’ (అపరిచితుడు)తో విక్రమ్‌కు భారీ క్రేజ్ వచ్చింది. ఆ సినిమా తర్వాత నెక్స్ట్ సూపర్ స్టార్ అవుతాడనుకున్నారు కానీ.. వరుసగా మాస్ కమర్షియల్ బ్లాక్ బస్టర్ల కంటే విభిన్నమైన ప్రయోగాత్మక పాత్రలను ఎంచుకోవడంతో ఆ స్థాయి స్టార్డమ్‌ను నిలకడగా కొనసాగించలేకపోయాడు. ‘సేతు’, ‘పితామగన్’, ‘తంగలాన్’, ‘వీరధీర శూరన్’ లాంటి సినిమాలు నటుడిగా ఆయన స్థాయిని పెంచాయి. ప్రస్తుతం ‘చియాన్ 63’ తో పాటు 64, 65, 66 ప్రాజెక్టులతో బిజీగా ఉన్నా, కంటిన్యూ మాస్ హిట్స్ లేకపోవడం వల్ల ఆయన ఒక ‘అల్టిమేట్ పర్ఫార్మర్’ గానే గుర్తింపు తెచ్చుకున్నారు.

విజయ్ సేతుపతి: హీరోగా, విలన్‌గా, క్యారెక్టర్ ఆర్టిస్ట్‌గా ఏ పాత్ర ఇచ్చినా జీవించే నటుడు. ‘విక్రమ్’లో సంతానం పాత్రతో భయపెట్టిన విజయ్ సేతుపతి.. ‘జవాన్’, ‘మహారాజా’లతో పాన్ ఇండియా మార్కెట్‌ను పెంచుకున్నాడు. ప్రస్తుతం ‘ట్రైన్’, ‘స్లమ్‌డాగ్’, ‘జైలర్ 2’ వంటి ప్రాజెక్టులతో ఫుల్ బిజీగా ఉన్నాడు. అయితే, కమర్షియల్ మాస్ ఫార్ములాకే పరిమితం కాకుండా కథ బలంగా ఉంటే ఎలాంటి పాత్రనైనా అంగీకరించడం ఆయన ఇమేజ్ కి ప్లస్ మరియు మైనస్. భవిష్యత్తులో వరుస కమర్షియల్ బ్లాక్ బస్టర్లు అందుకుంటే ఆయన కూడా సూపర్ స్టార్ రేస్ లో నిలుస్తారు.

ధనుష్: నటుడిగా, దర్శకుడిగా, రచయితగా తనకంటూ ప్రత్యేక గుర్తింపు తెచ్చుకున్నాడు. ‘అసురన్’, ‘తిరుచిత్రంబలం’, ‘రాయన్’, ‘కుబేర’ లాంటి సినిమాలతో మార్కెట్ పరంగా సత్తా చాటాడు. రీసెంట్ గా ‘ఇడ్లీ కడాయి’, ‘తేరే ఇష్క్ మే’ లాంటి విభిన్న ప్రాజెక్టులతో దేశవ్యాప్తంగా పరిధిని పెంచుకున్నాడు. అయితే, ఆయన లక్ష్యం కేవలం సూపర్ స్టార్ అవ్వడం కంటే ఒక కంప్లీట్ సినీ క్రియేటర్ గా నిలవడమే అని స్పష్టంగా కనిపిస్తోంది.

శివకార్తికేయన్: కోలీవుడ్ లో నెక్స్ట్ జనరేషన్ సూపర్ స్టార్ అయ్యే ఛాన్స్ ఎక్కువగా ఉన్న పేరు ఇది. ‘డాక్టర్’, ‘డాన్’, ‘మావీరన్’, ‘అమరన్’ లాంటి వరుస విజయాలతో ఈయన స్టార్డమ్ ఒక్కసారిగా పెరిగింది. ఎస్పెషల్లీ ‘అమరన్’ ఏకంగా 300 కోట్లకు పైగా వసూళ్లు సాధించి, ఆయనను అగ్ర హీరోల లిస్ట్‌లో చేర్చింది. టీవీ యాంకర్ గా స్టార్ట్ అయిన ఈయన జర్నీ అద్భుతం. అయితే, రీసెంట్ గా వచ్చిన ‘మదరాసి’, ‘పరాశక్తి’ సినిమాలు డిజాస్టర్స్ కావడం కాస్త దెబ్బతీసింది. అయినప్పటికీ వయస్సు, మార్కెట్, స్ట్రాంగ్ ఫ్యాన్ ఫాలోయింగ్ పరంగా శివకార్తికేయన్ ఈ రేస్‌లో బలమైన పోటీదారుడే.

కార్తీ: ‘పరుత్తివీరన్’ తో కెరీర్ స్టార్ట్ చేసి ‘ఖైదీ’, ‘సర్దార్’, ‘మెయ్యళగన్’ లాంటి సినిమాలతో నటుడిగా నిరూపించుకున్నాడు. తమిళంతో పాటు తెలుగులోనూ మంచి మార్కెట్ ఉంది. ప్రస్తుతం రాబోయే ‘సర్దార్ 2’, ‘ఖైదీ 2’, ‘మార్షల్’ లాంటి చిత్రాలు గనుక బ్లాక్ బస్టర్లు అయితే కార్తీ కూడా సూపర్ స్టార్ రేస్ లోకి రావడం ఖాయం.

సూర్య (స్ట్రాంగ్ కంటెండర్): కోలీవుడ్ లో మాస్ అండ్ క్లాస్ ఇమేజ్ ను ఈక్వల్ గా సొంతం చేసుకున్న స్టార్. ‘గజిని’, ‘వారణం ఆయిరం’, ‘అయాన్’, ‘సింగం’, ‘సూరరాయ్ పోట్రు’, ‘జైభీం’ లాంటి చిత్రాలతో తనకంటూ ప్రత్యేక స్థానాన్ని నిర్మించుకున్నాడు. తాజాగా **’కంగువ’** బాక్స్ ఆఫీస్ వద్ద భారీ విజయాన్ని అందుకోవడంతో, విజయ్ రాజకీయాల్లోకి వెళ్ళిన తర్వాత ఖాళీ అయిన నెక్స్ట్ సూపర్ స్టార్ స్థానం కోసం సూర్య పేరు మరింత స్ట్రాంగ్ గా వినిపిస్తోంది.

కోలీవుడ్‌లో విశాల్, సింబు, జయం రవి, జీవా, అరుణ్ విజయ్, అధర్వ, విజయ్ ఆంటోనీ లాంటి హీరోలు తమదైన శైలిలో సినిమాలు చేస్తూ అప్పుడప్పుడు హిట్లు అందుకుంటున్నా.. కేవలం టైర్-2 హీరోలుగానే స్థిరపడ్డారు. ప్రతి సినిమాతోనూ భారీ ఓపెనింగ్స్ రాబట్టి, ఇండస్ట్రీని కమర్షియల్ గా ముందుకు నడిపించే స్థాయి మాస్ స్టార్డమ్ ప్రస్తుతానికి సూర్య, శివకార్తికేయన్ ల వైపే ఎక్కువగా మొగ్గు చూపుతోంది. భవిష్యత్తులో థియేటర్లకు కోట్లాది అభిమానులను ఎవరు నిలకడగా రప్పించగలరో.. వారే కోలీవుడ్ కి అసలైన కమర్షియల్ సూపర్ స్టార్ అవుతారు!