Jr NTR Fan: ఎన్టీఆర్ ను కలిసి ముద్దాడిన ఫ్యాన్

జూనియర్ ఎన్టీఆర్ తన అభిమానుల పట్ల చూపించే ప్రేమాభిమానాలు ఎప్పుడూ ప్రత్యేకం. అభిమానులను కేవలం ప్రేక్షకులుగా కాకుండా తన కుటుంబ సభ్యులతో సమానంగా చూసుకునే తారక్, తాజాగా చేసిన ఓ పని ప్రతి ఒక్కరి హృదయాలను హత్తుకోవడమే కాకుండా సోషల్ మీడియాలో విపరీతంగా ట్రెండ్ అవుతోంది..గతంలో ‘దేవర’ రీ-రిలీజ్ సందర్భంగా థియేటర్ వద్ద కనిపించిన ఓ దివ్యాంగుడైన అభిమాని (మాట్లాడలేడు, వినలేడు) తారక్‌ను చూడాలన్న తపనతో అందరి దృష్టినీ ఆకర్షించాడు. ఆ వీరాభిమాని గురించి తెలుసుకున్న ఎన్టీఆర్, హైదరాబాద్‌లో జరిగిన ‘డోంట్ ట్రబుల్ ది ట్రబుల్’ ప్రీ-రిలీజ్ ఈవెంట్ సందర్భంగా అతడిని ప్రత్యేకంగా తన కారవాన్‌లోకి పిలిపించుకుని ముచ్చటించారు.

నిజానికి ఎన్టీఆర్ చేతికి తీవ్ర గాయమై ఆర్మ్ స్లింగ్ (చేతికి సపోర్టివ్ బెల్ట్) ధరించి ఉన్నారు. ఆ అభిమాని కారవాన్‌లోకి రాగానే ఎంతో ఆప్యాయంగా పలకరించి, సైగల ద్వారానే అతడి యోగక్షేమాలు అడిగి తెలుసుకున్నారు. అనంతరం ఫొటో దిగే సమయంలో, చేతి కట్టు అడ్డుగా ఉండకూడదన్న ఉద్దేశంతో, ఎంతో నొప్పితో కూడిన గాయం ఉన్నప్పటికీ ఏమాత్రం ఆలోచించకుండా ఆ స్లింగ్‌ను స్వయంగా తొలగించేశారు. అంతేకాకుండా, ఆ అభిమానిని ఆత్మీయంగా హత్తుకుని నిండు మనసుతో కౌగిలించుకున్నారు. అభిమాని కూడా ఎన్టీఆర్‌ను ప్రేమతో ముద్దాడటంతో ఆ దృశ్యం చూసిన వారంతా భావోద్వేగానికి గురయ్యారు. చేతి నొప్పిని సైతం లెక్కచేయకుండా ఓ దివ్యాంగ అభిమానిపై తారక్ చూపించిన ఈ సాటిలేని ప్రేమ నెటిజన్లను విపరీతంగా ఆకట్టుకుంటోంది. దీనికి సంబంధించిన దృశ్యాలు ప్రస్తుతం ఇంటర్నెట్‌ను షేక్ చేస్తున్నాయి.