NTR: ఎన్టీఆర్ ఇంట్లోకి కొత్త అతిథులు.. జపాన్ పేర్లు ఎందుకు పెట్టారో తెలుసా?

ఎన్టీఆర్ లైనప్ ఎంత బిజీగా ఉందో ప్రత్యేకంగా చెప్పక్కర్లేదు. అయితే, ఎంత బిజీగా ఉన్నా తన పర్సనల్ లైఫ్‌కు, ఫ్యామిలీకి టైమ్ కేటాయించడంలో తారక్ ఎప్పుడూ ముందే ఉంటారు. తాజాగా ఆయన తన సోషల్ మీడియా వేదికగా షేర్ చేసిన కొన్ని ఫోటోలు ఇప్పుడు నెట్టింట తెగ హల్‌చల్ చేస్తున్నాయి. పుట్టిన రోజున ఎన్టీఆర్ తన ఇంట్లోకి రెండు సరికొత్త రంగురంగుల పెట్స్ (మకావ్ జాతికి చెందిన పక్షులు)ను పరిచయం చేశారు. నెరిసిన గడ్డం, స్లీవ్‌లెస్ టీషర్టుతో సరికొత్త రగ్గడ్ లుక్‌లో ఉన్న తారక్.. నేలపై కూర్చుని ఆ పక్షులతో సరదాగా గడుపుతున్న పిక్స్ అభిమానులను ఫిదా చేస్తున్నాయి. ఒక పక్షి ఆయన చేతిపై వాలగా, మరొకటి కింద ముద్దుగా చూస్తూ కూర్చుంది.

ఈ బర్డీస్‌ను పరిచయం చేస్తూ తారక్ పెట్టిన క్యాప్షన్ ఇప్పుడు అందరి దృష్టిని ఆకర్షిస్తోంది. వాటికి ఆయన ‘అసాహి’ (Asahi – 朝日), ‘యూహి’ (Yuuhi – 夕日) అని పేర్లు పెట్టారు. జపనీస్ భాషలో ‘అసాహి’ అంటే ఉదయించే సూర్యుడు (సూర్యోదయం) అని, ‘యూహి’ అంటే అస్తమించే సూర్యుడు (సూర్యాస్తమయం) అని అర్థం. జపాన్ దేశంపై, అక్కడి సంస్కృతిపై తనకున్న అమితమైన ప్రేమను చాటుకునేందుకే తన ముద్దుల పక్షులకు ఈ జపనీస్ పేర్లను పెట్టినట్లు ఎన్టీఆర్ స్వయంగా వెల్లడించారు. ‘ఆర్ఆర్ఆర్’ ప్రమోషన్ల సమయం నుండి జపాన్ ఆడియన్స్‌తో తారక్‌కు ఒక ప్రత్యేకమైన అనుబంధం ఏర్పడిన సంగతి తెలిసిందే. ఇప్పుడు ఆ బాండింగ్‌ను ఇలా తన ఇంట్లోని కొత్త అతిథుల రూపంలో ఆయన గుర్తుచేసుకోవడం విశేషం.