ఒకప్పుడు స్పై సినిమాలు అంటే ఇంటెలిజెన్స్, మైండ్ గేమ్స్, సీక్రెట్ ఆపరేషన్స్ గుర్తొచ్చేవి. కానీ నేటి ట్రెండ్లో వంద మందిని ఒంటిచేత్తో కొట్టేసే సూపర్ హీరోల్లా గూఢచారులను చూపిస్తున్నారు. దేశభక్తి, భారీ యాక్షన్ ఎలివేషన్స్ పేరుతో స్పై జానర్ తన అసలు రూపాన్ని కోల్పోతుందా? అనే చర్చ ప్రస్తుతం ఇండస్ట్రీలో హాట్ టాపిక్గా మారింది.
యష్ రాజ్ ఫిల్మ్స్ (YRF) స్పై యూనివర్స్లో వచ్చిన ‘పఠాన్’ బ్లాక్బస్టర్ హిట్ కావడంతో అదే ఫార్ములా ఎప్పటికీ వర్కౌట్ అవుతుందని మేకర్స్ భావించారు. కానీ హృతిక్ రోషన్, ఎన్టీఆర్ లాంటి భారీ మల్టీస్టారర్ కాంబినేషన్లో వచ్చిన ‘వార్ 2’ బాక్సాఫీస్ వద్ద ఆశించిన ఫలితాన్ని అందుకోలేకపోయింది. కథలోని భావోద్వేగాలను పక్కనబెట్టి కేవలం యాక్షన్, బడ్జెట్ పైనే ఫోకస్ పెట్టడం వల్ల ఈ సినిమా బ్రేక్ ఈవెన్ సాధించలేకపోయింది.
దీనికి భిన్నంగా రియలిస్టిక్ ఆపరేషన్స్, ఇంటెలిజెన్స్ గేమ్తో సాగే ‘ధురందర్’ సిరీస్ రూ. 3000 కోట్లకు పైగా వసూళ్లు సాధించి సరికొత్త రికార్డు సృష్టించింది. అలాగే గతంలో తక్కువ బడ్జెట్తో వచ్చిన ‘ఉరి: ద సర్జికల్ స్ట్రైక్’ కూడా బలమైన ఎమోషన్తో సంచలన విజయం సాధించింది. దీన్నిబట్టి ప్రేక్షకులు కేవలం జెండా, దేశభక్తి నినాదాలు మాత్రమే కాకుండా.. సహజత్వానికి దగ్గరగా ఉండే కథలను కోరుకుంటున్నారని స్పష్టమవుతోంది.
ప్రస్తుతం స్పై ప్రపంచాన్ని హీరోయిన్స్ కూడా శాసిస్తున్నారు. హాలీవుడ్ ‘సిటాడెల్’, సమంత ఇంటెన్స్ పర్ఫార్మెన్స్తో వచ్చిన ‘హనీ బన్నీ’, ఆలియా భట్-శర్వరీ లీడ్ రోల్స్ లో జూలై 2026 లో రాబోతున్న ‘ఆల్ఫా’ చిత్రాలు దీనికి నిదర్శనం. ఆల్ఫా టీజర్లో యాక్షన్ అదిరిపోయినప్పటికీ, పాత ఫార్ములానే రిపీట్ చేస్తున్నారా అనే డౌట్స్ ఆడియన్స్లో ఉన్నాయి.
మరోవైపు టాలీవుడ్ హిస్టరీ చూస్తే.. సూపర్ స్టార్ కృష్ణ కాలంలో ‘గూఢచారి 116’, ఇటీవల అడివి శేష్ ‘గూఢచారి’, కమల్ హాసన్ ‘విశ్వరూపం’ కల్ట్ క్లాసిక్స్గా నిలిచాయి. ఎందుకంటే వీటిలో ఇంటెలిజెన్స్ తో పాటు బలమైన క్యారెక్టర్ జర్నీ ఉంటుంది. కానీ కేవలం గాడ్జెట్స్, స్టైలిష్ యాక్షన్పై ఆధారపడిన ‘ఏజెంట్’, ‘స్పై’, ‘చాణక్య’ వంటి సినిమాలు తెలుగు ప్రేక్షకులను మెప్పించలేకపోయాయి. కేవలం స్పై ట్యాగ్ చూసి ఆడియన్స్ థియేటర్లకు వచ్చే రోజులు పోయాయి. బాక్సాఫీస్ వద్ద విజయం సాధించాలంటే భారీ ఎలివేషన్ల కంటే రియలిజం, ఇంటెలిజెన్స్ గేమ్ మరియు గుండెకు హత్తుకునే బలమైన కథే స్పై జానర్ భవిష్యత్తును నిర్ణయించనున్నాయి.