‘నాట్యం’ దర్శకనిర్మాతలకు చిరంజీవి ప్రశంసలు

ప్రముఖ కూచిపూడి డ్యాన్సర్ సంధ్యారాజు నటిస్తూ నిర్మించిన సినిమా ‘నాట్యం’. రేవంత్ కోరుకొండ దర్శకత్వంలో నిశ్రింకళ ఫిల్మ్‌ పతాకంపై రూపొందిన ఈ సినిమా 22న ప్రేక్షకుల ముందుకు రానుంది. ఈ సందర్భంగా మెగాస్టార్ చిరంజీవి ‘నాట్యం’ సినిమాకు ప్రశంసలు అందించారు. ‘నాట్యం’ సినిమా చాలా చక్కగా ఉండి మంచి ఫీలింగ్‌ను కలిగించింది. నాట్యం అంటే ఓ కథను అందంగా, దృశ్యరూపంలో చూపించడం. నాట్యం అంటే కాళ్లు, చేతులు లయబద్దంగా ఆడించడం అనుకుంటారు కానీ దర్శకుడు రేవంత్, సంధ్యా రాజు మాత్రం కథను అందంగా చెప్పడం అని చూపించారు. ఒకప్పుడు ప్రజలకు ఏదైనా చెప్పాలంటే ఎంటర్టైన్మెంట్‌ గా చెప్పేవారు. ఇందులో అలాగే చూపించారు. కె.విశ్వనాథ్ గారిని స్ఫూర్తిగా తీసుకుని ఈ సినిమాను తీసినట్టు అనిపిస్తోంది.

మన కళలు, నాట్యం, సంగీతంపై ఆయనకున్న గ్రిప్, ప్యాషన్ అంతా ఇంతా కాదు. ఇప్పుడు రేవంత్ అలాంటి ప్రయత్నం చేయడం ఆనందంగా ఉంది. ఇలాంటి వారు రావాలి. మన ఆచారాలు, సంప్రదాయాలు, కళలను మరిచిపోతున్న ఈ తరంలో ఇలాంటి ప్రయత్నాన్ని మనస్ఫూర్తిగా అభినందిస్తున్నాను. ఎంతో ప్యాషన్ ఉన్న సంధ్యా రాజు ఈ సినిమా తీయటానికి ముందుకు వచ్చినందుకు అభినందించాలి. పెద్ద ఫ్యామిలీ నుంచి వచ్చి డబ్బు కోసం కాకుండా తనకు కళల పట్ల ఎంతో అంకిత భావాన్ని ఉందని చెప్పారు. ఈ సినిమా ద్వారా నాట్యం గొప్పదనం కోట్ల మందికి చేరుతుంది.

ఈ సినిమాతో ఆమె తన టాలెంట్‌ను చూపించాలని అనుకున్నారు. అది వృథా కాదు. రేవంత్, సంధ్యా రాజు ఇద్దరిది పర్ఫెక్ట్ కాంబినేషన్. ఈ చిత్రం హిట్ కావాలని మనస్ఫూర్తిగా కోరుకుంటున్నాను. ఇలాంటి సినిమాను తెలుగు ప్రేక్షకులు కచ్చితంగా ఆదరిస్తారనే నమ్మకం నాకుంది. ఇండస్ట్రీని ‘శంకరాభరణం’కు ముందు ‘శంకరాభరణం’ తరువాత అని అంటుంటారు. అలా శంకరాభరణంను ఎంతగా ఆదరించారో కొత్తగా చెప్పాల్సిన పని లేదు. అదో క్లాసిక్. అలానే నాట్యం సినిమాకు కూడా ప్రజాశీస్సులు దక్కుతాయని ఆశిస్తున్నా’ అని అన్నారు.

సంధ్యా రాజు మాట్లాడుతూ ‘ఈ కళ డబ్బుతో రాదు.. అంకితభావం, కష్టపడే తత్వం ఉండాలి. నాట్యం వల్ల జనాలు గౌరవిస్తారనే నా జీవితాన్ని నాట్యానికి అంకితం చేశాను. ఈ ప్రయాణంలో చిరంజీవి గారిని కలవడం సంతోషంగా ఉంది. ఆయన గొప్ప డ్యాన్సర్. సూర్యుడిలాంటి వారు. ఆయన ఆశీర్వాదం లభించడం ఆనందంగా ఉంది’ అని అన్నారు. డైరెక్టర్ రేవంత్ మాట్లాడుతూ ఇలాంటి సినిమా ఎలా తీశావ్? అని అందరూ అంటుంటే నాకు భయంగా ఉంటుంది. ఇందులో కేవలం నాట్యం గురించే కాకుండా మన సంస్కృతిని కూడా చూపించాం. తెలుగుదనం ఉట్టిపడే సినిమా. అన్ని రకాల ఎమోషన్స్ ఉంటాయి. చిరంజీవి గారు మా సినిమాని స‌పోర్ట్ చేయడం చాలా ఆనందంగా ఉంది అని అన్నారు.