Apara Mehta : ఎక్కడపడితే అక్కడ టచ్ చేశారు.. సిగరెట్‌తో కాల్చారు: ప్రాణాపాయంలో పడ్డ నటి!

ఇప్పుడున్న డిజిటల్ యుగంలో ఇన్స్టాగ్రామ్, ఎక్స్ వంటి సోషల్ మీడియా వేదికలు సెలబ్రిటీలకు రాత్రికి రాత్రే ఆకాశమంత ప్రాచుర్యాన్ని తెచ్చిపెడుతుండవచ్చు. కానీ, ఈ రకమైన సాంకేతిక విప్లవం రాకముందే ఇండియన్ సీరియల్ ఇండస్ట్రీ సూపర్ స్టార్లను సృష్టించింది. వెండితెర కథానాయకులకు ఏమాత్రం తీసిపోని రీతిలో టీవీ నటులకు అప్పట్లో అభిమానులు నీరాజనాలు పట్టేవారు. ఇండియన్ టెలివిజన్ చరిత్రలో సరికొత్త మైలురాయిగా నిలిచిన సుదీర్ఘ సీరియల్ ‘క్యోంకీ సాస్ భీ కభీ బహూ థీ’ (Kyunki Saas Bhi Kabhi Bahu Thi) ప్రసారమవుతున్న రోజుల్లో ప్రేక్షకుల అభిమానం ఒక్కోసారి భయానక వాతావరణానికి దారితీసేది. ఈ క్రమంలోనే సీనియర్ నటి అపరా మెహతా (Apara Mehta) తన జీవితంలో ఎదురైన ఒక ప్రమాదకర సంఘటనను గుర్తుచేసుకున్నారు.

ఆ రోజుల్లో ‘క్యోంకీ సాస్ భీ కభీ బహూ థీ’ సీరియల్ ప్రజాదరణలో సరికొత్త రికార్డులను తిరగరాస్తోంది. అదే సమయంలో అపరా మెహతా నటించిన ఒక గుజరాతీ నాటకాన్ని కోల్‌కతాలోని ప్రసిద్ధ కళామందిర్ హాలులో ప్రదర్శిస్తున్నారు. వరుసగా ఐదు షోలు ప్లాన్ చేయగా, ప్రతీ ప్రదర్శనకూ హాలు కిక్కిరిసిపోయింది. ఆ సమయానికి సీరియల్ పీక్ క్రేజ్ తో ఉండటంతో ఆమె థియేటర్‌లోకి అడుగుపెట్టగానే ప్రేక్షకులు ఒక్కసారిగా ఊగిపోయారు. దాదాపు 8,000 దాండియా కర్రలను గాలిలోకి విసిరేస్తూ అత్యంత ఉత్సాహంతో ఆమె వద్దకు చేరుకోవడానికి ప్రయత్నించారు.

“నన్ను చూడగానే జనం ఒక్కసారిగా చుట్టుముట్టారు. లాగుతూ, నెట్టుకుంటూ నన్ను వేదికపైకి తీసుకెళ్లారు. నేను వారితో చేతులు కలపడానికి ప్రయత్నించగా, ఒకరు నా చేతికున్న వజ్రపు ఉంగరాన్ని లాక్కోవడానికి చూశారు. అంతేకాకుండా, ఆ గందరగోళంలో ఎవరో పొరపాటున నన్ను సిగరెట్‌తో కాల్చేశారు! అక్కడ ఉన్న వేదిక కూడా ఊగడం మొదలైంది. పరిస్థితి చాలా ప్రమాదకరంగా మారింది” అని అపరా మెహతా ఆనాటి భయంకర అనుభవాన్ని గుర్తుచేసుకున్నారు.

పరిస్థితి చేయిదాటిపోతుండటంతో, నిర్వాహకులు ఆమెను వేదిక పైనుంచి కిందకు దింపేశారు. ఆమె చుట్టూ ఒక రక్షణ వలయంలా ఏర్పడినప్పటికీ, ఆ తొక్కిసలాటలో జనం ఆమెను ఎక్కడపడితే అక్కడ తాకడం మొదలుపెట్టారు. ఆ సమయంలో చేసేదేమీ లేక “సరే, ముట్టుకోండి.. మీకు దీనివల్ల ఏమి వస్తుంది?” అని మనసులోనే అనుకున్నానని ఆమె తెలిపారు.

అపరా మెహతా ఈ సీరియల్‌లో హీరో మిహిర్ తల్లిగా, హీరోయిన్ తులసి అత్తగారైన ‘సవితా మాన్సుఖ్ వీరాణి’ పాత్రలో జీవించారు. ఆమె నటనకు దేశవ్యాప్తంగా విశేష ప్రశంసలు లభించాయి. దాదాపు ఎనిమిదేళ్ల పాటు దిగ్విజయంగా సాగిన ఈ సీరియల్ ఆ తర్వాత ముగిసింది.