Director Jeevan Reddy : ‘చోర్ బజార్’ కమర్షియల్ ఎంటర్ టైనర్

‘దళం’, ‘జార్జ్ రెడ్డి’తో మంచి దర్శకుడిగా పేరు తెచ్చుకున్న జీవన్ రెడ్డి ఆకాష్ పూరి హీరోగా తీసిన సినిమా ‘చోర్ బజార్’. గెహనా సిప్పీ నాయిక. యూవీ క్రియేషన్స్ సమర్పణలో ఐవీ క్రియేషన్స్ పతాకంపై వీఎస్ రాజు నిర్మించిన ఈ సినిమా 24న ప్రేక్షకుల ముందుకొస్తోంది. ఈ సందర్భంగా జీవన్ రెడ్డి మాట్లాడుతూ ‘నా గత చిత్రాలైన దళం, జార్జ్ రెడ్డికి భిన్నంగా పూర్తి ఎంటర్ టైన్ మెంట్ తో తీసిన చిత్రమిది. బ్లడ్ షెడ్ లేకుండా వినోదాత్మక సినిమా చేయాలని భావించే ఈ చిత్రాన్నితెరకెక్కించా. జార్జ్ రెడ్డి కంటే ముందు సిద్ధమైన కథ. ప్రతి ఫ్రేమ్ కలర్ ఫుల్ గా ఉంటుంది’ అన్నారు.
టైటిల్ గురించి మాట్లాడుతూ ‘చోర్ బజార్ కు వెళ్తుండేవాడిని. అక్కడ నేను చూసిన మనుషులు రాత్రంతా బిజినెస్ చేసి, పగలు నిద్రపోతుంటారు. పగలు ఓ జీవితం, రాత్రి మరో జీవితం గడుపుతుంటారు. ప్రతి ఒక్కరూ ఒక్కో హీరోను అభిమానిస్తారు. ఆ స్ఫూర్తితోనే మా చిత్రంలో హీరోకు బచ్చన్ సాబ్ అనే పేరు పెట్టాం. పాత్రలన్నీ సహజత్వానికి దగ్గరగా ఉంటూ ఫుల్ కమర్షియల్ గా సాగుతుంటాయి. సినిమా ప్రధానంగా లవ్ స్టోరి అయినా ఓ విలువైన డైమండ్ చుట్టూ తిరుగుతుంది. వంద కోట్ల విలువైన డైమండ్ చోర్ బజార్ లో ప్రత్యక్షమవుతుంది. కానీ అక్కడి వాళ్లకు దాని విలువ తెలియదు. ఈ డైమండ్ చుట్టూ డ్రామా, ఫన్ క్రియేట్ అవుతాయి. కథ చెప్పేందుకు పూరి జగన్నాథ్ ను కలిస్తే… రెండు సినిమాలు చేశావు కదా నువ్వు అనుకున్నట్లు తీయ్ అన్నారు. ఈ సినిమా తర్వాత ఓ ఇంట్రెస్టింగ్ ప్రాజెక్ట్ చేయబోతున్నాను. వివరాలు కొద్ది రోజుల్లో వెల్లడిస్తా’ అని చెబుతున్నారు జీవన్ రెడ్డి.