Weight Loss Mistakes: బాబోయ్ బరువు తగ్గడానికి ఈ పని మాత్రం చస్తే చేయకండి..!

Weight Loss Mistakes: ఈరోజుల్లో చాలా మంది ఇబ్బంది పడుతున్న ప్రధాన సమస్య అతిగా బరుకు పెరగడం. ఈ పెరిగిన బరువును తగ్గించుకోవడం కోసం చాలామంది విభిన్న ప్రయత్నాలు చేస్తున్నారు. ఈ క్రమంలో త్వరగా బరువు తగ్గాలనే ఆత్రుతతో భోజనం మానేస్తుంటారు. అయితే ఈ పద్ధతి ఆరోగ్యంపై తీవ్ర ప్రతికూల ప్రభావం చూపుతుందని ప్రపంచ ఆరోగ్య సంస్థ హెచ్చరిస్తోంది. నిజానికి బరువు పెరగడం అనేది కేవలం శరీర ఆకృతికి సంబంధించిన సమస్య మాత్రమే కాదు, అది అనేక అనారోగ్యాలకు మూలం. అందుకే జిమ్‌లు, డైటింగ్ వంటి పద్ధతుల ద్వారా బరువు తగ్గాలని అందరూ ప్రయత్నిస్తుంటారు. అయితే బరువు తగ్గడం అంటే ఆహారం మానేయడం అని చాలా మంది పొరపడుతుంటారు. ఈ అపోహపై ప్రపంచ ఆరోగ్య సంస్థ కీలక వివరణ ఇచ్చింది.

ఆహారం మానేయడం ఎందుకు ప్రమాదకరం..
WHO నివేదిక ప్రకారం.. భోజనం మానేయడం వల్ల బరువు తగ్గుతామనుకోవడం ఒక భ్రమ. ఒక పూట భోజనం మానేయడం వల్ల ఆకలి విపరీతంగా పెరుగుతుంది. దీనివల్ల తర్వాతి పూట మనకు తెలియకుండానే అతిగా తినేస్తాం. ఫలితంగా కేలరీల వినియోగం పెరిగి బరువు తగ్గడానికి బదులు మరింత పెరుగుతారు. భోజనం మానేయడం ద్వారా బరువు తగ్గినా, అది దీర్ఘకాలంలో ఏమాత్రం ఫలితాన్ని ఇవ్వదు. నిపుణుల అభిప్రాయం ప్రకారం ఆహారం మానేయడం వల్ల శరీరంలో పలు మార్పులు వస్తాయి. అవి ఏంటంటే.. శరీరానికి అవసరమైన ఆహారం అందకపోవడంతో రోజంతా నీరసంగా, నిస్సత్తువగా అనిపిస్తుంది. అలాగే రక్తంలో చక్కెర స్థాయిలు అకస్మాత్తుగా పడిపోయి ‘హైపోగ్లైసీమియా’కు దారితీస్తుంది. దీనివల్ల తల తిరగడం, ఏకాగ్రత లోపించడం వంటి లక్షణాలు కనిపిస్తాయి. క్రమం తప్పకుండా ఆహారం తీసుకోకపోతే శరీర జీవక్రియ మందగిస్తుంది.

ఆరోగ్యకరంగా బరువు తగ్గడం ఎలా అంటే..
స్థిరమైన బరువును కాపాడుకోవడానికి WHO కొన్ని సూచనలు చేసింది. అవి ఏంటంటే.. భోజనం మానేయడం కంటే, తక్కువ పరిమాణంలో పోషక విలువలున్న ఆహారాన్ని తరచుగా తీసుకోవడం మంచిది. నిర్ణీత సమయాల్లో ఆహారం తీసుకోవడం వల్ల జీవక్రియ సక్రమంగా ఉంటుంది. కేవలం ఆహార నియంత్రణే కాకుండా, క్రమం తప్పకుండా శారీరక వ్యాయామం చేయడం ద్వారా బరువు తగ్గవచ్చు. ముఖ్యంగా బిజీ లైఫ్‌స్టైల్ గడిపే ఉద్యోగస్తులు, యువకులు పని ఒత్తిడిలో భోజనం మానేస్తుంటారు. బరువు తగ్గాలనుకునే వారు ఏదైనా ప్రణాళిక రూపొందించుకునే ముందు నిపుణుల సలహా తీసుకోవాలి.