Traditional Indian Sweets : ఈ దీపావళికి కొత్త రుచులు.. దేశంలోని 9 ప్రత్యేక స్వీట్లు

దీపావళి పండుగ అంటేనే కాంతుల సందడి, నోరూరించే పిండివంటలు. దేవుడికి నైవేద్యంగా సమర్పించినా, బంధుమిత్రులకు పంచిపెట్టినా, పండుగ వేళ నోరు తీపి చేసుకోవడానికి మిఠాయిలు ఉండాల్సిందే. సాధారణంగా ప్రతీ దీపావళికి లడ్డూలు, కాజూ బార్ఫీలు చేసుకోవడం పరిపాటి. అయితే ఈసారి నవంబర్ 8న జరుపుకోబోయే దీపావళి పండుగకు రొటీన్ మిఠాయిలకు భిన్నంగా భారత్‌లోని వివిధ రాష్ట్రాల సాంప్రదాయ స్వీట్లతో మీ స్వీట్ ప్లేట్‌ను మరింత ప్రత్యేకంగా మార్చుకోవచ్చు. మన దేశంలోని వేర్వేరు ప్రాంతాలకు చెందిన ప్రసిద్ధ దీపావళి స్వీట్ల విశేషాలు మీకోసం:

దక్షిణాది ఘుమఘుమలు: మైసూర్ పాక్, ఉన్నియప్పం

కర్ణాటక సంస్కృతికి ప్రతీకగా నిలిచే మైసూర్ పాక్ (Mysore Pak) శనగపిండి, స్వచ్ఛమైన నెయ్యి, చక్కెరతో తయారవుతుంది. నోట్లో వేసుకోగానే కరిగిపోయే దీని రుచి పండుగ సంబరాన్ని రెట్టింపు చేస్తుంది. ఇక కేరళలో దీపావళికి ప్రత్యేకంగా చేసుకునే ఉన్నియప్పం (Unniyappam) బియ్యప్పిండి, బెల్లం, అరటిపండు, కొబ్బరి ముక్కలతో తయారవుతుంది. బయట కరకరలాడుతూ, లోపల మెత్తగా ఉండే ఈ చిన్న వంటకం కేరళ ఇళ్లలో ఎంతో ప్రత్యేకం. అలాగే తమిళనాడు స్టైల్‌లో బియ్యప్పిండి, మినపప్పుతో చేసే మురుక్కు (Murukku) పండుగ వేళ కరకరలాడే రుచులను అందిస్తుంది.

తూర్పు రాష్ట్రాల స్పెషల్స్: ఛేనా పోడా, నారికోలోర్ లారూ, చకావో ఖీర్

ఒడిశాకు చెందిన ఛేనా పోడా (Chhena Poda)ను ‘బేక్ చేసిన జున్ను తీపి పదార్థం’గా పిలుస్తారు. తాజా జున్ను (కోటేజ్ చీజ్), రవ్వ, చక్కెరను కలిపి బేక్ చేయడం వల్ల దీని పైన లైట్ కేరమెల్ టెక్స్చర్ వచ్చి అద్భుతమైన రుచిని ఇస్తుంది. అస్సాంలో దొరికే నారికోలోర్ లారూ (Narikol’or Laru) పచ్చి కొబ్బరి తురుము, బెల్లంతో చేసే సులువైన కొబ్బరి లడ్డూ. ఇక మణిపూర్ రాయల్ డిజర్ట్ అయిన చకావో ఖీర్ (Chakhao Kheer)ను నల్ల బియ్యం (Black Rice), పాలు, చక్కెరతో తయారు చేస్తారు. దీని సహజసిద్ధమైన ఊదా (పర్పల్) రంగు, ప్రత్యేకమైన ఫ్లేవర్ పండుగ వంటకాలకు సరికొత్త శోభను ఇస్తాయి.

ఉత్తరాది, పశ్చిమాది వంటకాలు: గుజియా, మోహన్‌థాల్, మఠరీ

ఉత్తరప్రదేశ్, రాజస్థాన్‌లలో ఎంతో పాపులర్ అయిన గుజియా (Gujiya) మైదాపిండితో చేసే స్వీట్ డంప్లింగ్. దీని లోపల కొబ్బరి, కోవా, పొడి పండ్ల మిశ్రమాన్ని (ఫిల్లింగ్) ఉంచి నూనెలో వేయిస్తారు. గుజరాత్‌లో ఏ పండుగ వచ్చినా కచ్చితంగా చేసుకునే మోహన్‌థాల్ (Mohanthal) శనగపిండి, నెయ్యితో తయారయ్యే సాంప్రదాయ మిఠాయి. పంజాబ్‌తో పాటు ఉత్తర భారతదేశంలో శీతాకాల పండుగల సమయానికి సిద్ధం చేసుకునే కరకరలాడే స్నాక్ మఠరీ (Mathri) కూడా దీపావళి పిండివంటల్లో ప్రత్యేక స్థానం సంపాదించుకుంది. ఈ దీపావళికి భారతదేశంలోని వేర్వేరు మూలల నుంచి వచ్చిన ఈ సాంప్రదాయ రుచులను మీ ఇంట్లో ప్రయత్నించి, పండుగను మరింత తీపి జ్ఞాపకంగా మార్చుకోండి..