Oil Free Poori: ఒక్క చుక్క నూనె లేకుండా పొంగే పూరీలు.. ఎలాగో చూస్తే షాకవుతారు!

Oil Free Poori: నార్మల్ డైలీ రొటిన్ టిఫిన్లతో పోల్చితే పూరీ – కూర పేరు వినగానే ఎవరికైనా నోరూరుతుంది. సెలవు రోజైనా, ఇంట్లో శుభకార్యమైనా, చుట్టాలు వచ్చినా మన ఇళ్లలో పూరీ ఉండాల్సిందే. అయితే పూరీ తినడానికి ఎంత రుచిగా ఉంటుందో, దానిని డీప్ ఫ్రై చేయడానికి అంతకంటే ఎక్కువ నూనె (ఆయిల్) పడుతుంది. దీంతో ఆరోగ్యంపై శ్రద్ధ చూపే చాలా మంది, బరువు పెరుగుతామనే భయం కారణంగా ఈ పూరీలకు దూరంగా ఉంటున్నారు. మీరు కూడా ఈ లిస్టులో ఉంటే ఇకపై అస్సలు బాధపడకండి.. ఎందుకంటే ఒక్క చుక్క నూనె కూడా లేకుండా, కుండలా పొంగే క్రిస్పీ పూరీలను తయారు చేసుకునే ఒక అద్భుతమైన వంటింటి చిట్కాను ఎలా చేసుకోవాలో ఈ స్టోరీలో తెలుసుకుందాం.

కావలసిన పదార్థాలు:

గోధుమ పిండి – 2 కప్పులు

వాము – అర టీస్పూన్

ఉప్పు – రుచికి సరిపడా

గోరువెచ్చని నీరు – సరిపడా

తయారీ విధానం..
ముందుగా ఒక పెద్ద గిన్నెలో గోధుమ పిండి తీసుకుని, అందులో ఉప్పు, వాము వేయాలి. ఇప్పుడు కొద్దికొద్దిగా గోరువెచ్చని నీటిని పోస్తూ పిండిని గట్టిగా (చపాతీ పిండి కంటే కొంచెం గట్టిగా) కలుపుకోవాలి. పూరీ పిండి ఎప్పుడూ కాస్త గట్టిగా ఉంటేనే పూరీలు బాగా వస్తాయి. పిండిని కలిపిన తర్వాత దానిపై మూత పెట్టి 10 నుంచి 15 నిమిషాల పాటు పక్కన పెట్టాలి. దీనివల్ల పిండి బాగా నానుతుంది, పూరీలు చేసుకునే సమయంలో విరిగిపోకుండా ఉంటాయి.

తర్వాత పిండిని మరోసారి చేత్తో మెత్తగా చేసి, చిన్న చిన్న ఉండలుగా చేసుకోవాలి. ఆ తర్వాత చపాతీ పీటపై పూరీల సైజులో గుండ్రంగా ఒత్తుకోవాలి. ఇప్పుడు స్టవ్ ఆన్ చేసి ప్రెషర్ కుక్కర్ పెట్టాలి. అందులో 1 నుంచి 2 గ్లాసుల నీళ్లు పోయాలి. కుక్కర్ లోపల ఒక చిన్న స్టాండ్ ఉంచాలి (దీనివల్ల మనం పెట్టే ప్లేట్ నీటిని తాకకుండా పైకి ఉంటుంది). ఒక స్టీల్ ప్లేట్ తీసుకుని, పూరీలు అంటుకోకుండా ఉండటానికి దానికి చాలా తక్కువగా నెయ్యి లేదా నూనె రాయాలి. ఒత్తుకున్న పూరీలను ఆ ప్లేట్‌లో పెట్టి, ఆ ప్లేట్‌ను కుక్కర్ లోపల ఉన్న స్టాండ్‌పై ఉంచాలి. ఇప్పుడు ఆ కుక్కర్‌కు మూత పెట్టాలి. కానీ కుక్కర్‌కు విజిల్ పెట్టకూడదు. హై ఫ్లేమ్‌పై కేవలం 3 నుంచి 4 నిమిషాల పాటు పూరీలను ఆవిరిపై ఉడకనివ్వాలి. కొన్ని నిమిషాల తర్వాత కుక్కర్ మూత తీసి చూస్తే, చక్కగా పొంగిన నూనె లేని పూరీలు రెడీగా కనిపిస్తాయి. వీటిని ఆలూ కుర్మా, చోలే మసాలా లేదా పెరుగుతో కలిపి వేడివేడిగా వడ్డించుకోని తింటే ఉంటుందీ..

ఈ పద్ధతి ఎందుకు ప్రత్యేకం అంటే..
పూరీలను నూనెలో డీప్ ఫ్రై చేయకపోవడంతో, ఇందులో ఫ్యాట్ (కొవ్వు), క్యాలరీలు చాలా తక్కువగా ఉంటాయి. గుండె జబ్బులు ఉన్నవారు, హై కొలెస్ట్రాల్ సమస్యతో బాధపడేవారు, బరువు తగ్గాలనుకునే వారికి ఈ పద్ధతి ఒక బెస్ట్ ఆప్షన్‌గా పని చేస్తుందని చెబుతున్నారు. నూనె లేకుండా ఆవిరిపై చేసినప్పటికీ, ఈ పూరీలు ఎంతో రుచిగా, సాఫ్ట్‌గా ఉంటాయి. కాబట్టి డైట్ పేరుతో పూరీ తినాలనే మీ కోరికను ఇకపై చంపుకోనవసరం లేదు. ఇకపై మీకు పూరీలను తినాలనిపించినప్పుడు మీ ఇంట్లో ఈ ‘కుక్కర్ పూరీ’ ట్రిక్‌ను ట్రై చేసి చూడండి.