Soft Roti Tips: పెనం నుంచి తీయగానే రోటీ గట్టిపడిపోతోందా? ఈ సింపుల్ టిప్‌తో రోజంతా సాఫ్ట్‌గా!

Soft Roti Tips: ఇంట్లో రోజూ రోటీలు, చపాతీలు చేసుకునే వారికి ఎదురయ్యే సాధారణ సమస్యల్లో రోటీ గట్టిపడటం కూడా ఒకటి. పెనం మీద నుంచి తీసినప్పుడు మెత్తగా, బాగా పొంగిన రోటీ.. కొన్ని గంటలు గడిచిన తర్వాత గట్టిగా, పొడిగా మారిపోతుంది. ముఖ్యంగా ఉదయం తయారు చేసి లంచ్ బాక్స్‌లో పెట్టిన రోటీలు మధ్యాహ్నానికి మెత్తదనం కోల్పోతుంటాయి. అయితే రోటీ గట్టిపడటానికి పిండి క్వాలిటీ లేదా నీళ్లు కారణం అనుకోవాల్సిన అవసరం లేదు. రోటీ తయారు చేసిన తర్వాత దానిని ఎలా నిల్వ చేస్తున్నారన్నది కూడా చాలా ముఖ్యం అంటున్నారు.

నిజానికి చాలా మంది రోటీని పెనం నుంచి తీసిన వెంటనే గాలి చొరబడని డబ్బాలో పెట్టి మూత పెడుతుంటారు. ఇలా చేయడం వల్ల ఆ డబ్బా లోపల ఆవిరి చిక్కుకుపోతుంది. ఆ ఆవిరి చల్లబడినప్పుడు నీటి బిందువులుగా మారి రోటీని జిగురుగా మార్చవచ్చు. ముఖ్యంగా కింద ఉన్న రోటీలు ఎక్కువ తేమను గ్రహించి మెత్తగా, తడిగా మారే అవకాశం ఉంటుంది. అందుకే పెనం నుంచి తీసిన రోటీలను వెంటనే బాక్స్‌లో పెట్టకుండా 30 నుంచి 60 సెకన్ల పాటు ప్లేట్‌ పై ఉంచాలి. ఇలా చేయడం వల్ల ఆవిరి బయటకు పోతుంది. అయితే రోటీ పూర్తిగా చల్లారే వరకు వేచి ఉండాల్సిన అవసరం లేదు. రోటీలను లంచ్ బాక్స్‌లో పెట్టే ముందు శుభ్రమైన క్లాత్‌లో చుట్టడం మరో మంచి చిట్కా అని చెబుతున్నారు. ఈ క్లాత్ అనేది బాక్స్‌లో ఉన్న అదనపు తేమను పీల్చుకుని రోటీలపై నీరు చేరకుండా సహాయపడుతుంది. టిఫిన్ బాక్స్ అడుగున కూడా శుభ్రమైన క్లాత్ లేదా టిష్యూ ఉంచితే కింది రోటీలు తడిసిపోకుండా ఉంటాయి.

రోటీ బాగా పొంగేలా కాల్చడం వల్ల దాని లోపల తేమ నిలిచి కొంతసేపు మెత్తగా ఉండేందుకు సహాయపడుతుంది. అయితే పెనం మీద అవసరానికి మించి ఉంచి ఎక్కువగా కాల్చితే రోటీలోని తేమ తగ్గిపోతుంది. దీంతో చల్లారిన తర్వాత రోటీ త్వరగా గట్టిపడుతుంది. కాబట్టి రోటీని బాగా కాల్చాలి కానీ అతిగా కాల్చకూడదు. అలాగే మెత్తటి రోటీ కోసం పిండి కూడా సరైన విధంగా కలపాలని చెబుతున్నారు. పిండి మరీ గట్టిగా ఉండకూడదు. అవసరాన్ని బట్టి గోరువెచ్చని నీటిని ఉపయోగించవచ్చు. అలాగే కొద్దిగా నూనె లేదా నెయ్యి కలపడం వల్ల రోటీ మెరుగ్గా ఉండే అవకాశం ఉంది. పిండి కలిపిన తర్వాత దాన్ని 20 నుంచి 30 నిమిషాలు పాటు పక్కన పెట్టాలి. ఎక్కువ పొడి పిండి ఉపయోగించడం వల్ల రోటీ త్వరగా పొడిబారే అవకాశం ఉంది. అలాగే లంచ్ బాక్స్‌లో రోటీ, కూరను కలిపి ప్యాక్ చేయడం వల్ల కూరలోని గ్రేవీ, వేడి ఆవిరి రోటీకి చేరుతుంది. దీంతో రోటీ జిగురుగా లేదా అతిగా మెత్తగా అయ్యే అవకాశం ఉంటుంది. అందుకే వీలైనంత వరకు రోటీని కూరకు వేరుగా ప్యాక్ చేయడం మంచిది.

రోటీ గట్టిపడటానికి అసలు కారణం ఇదే

రోటీ చల్లబడే కొద్దీ దానిలోని తేమ మారుతూ ఉంటుంది. దీంతో కొంతసేపటి తర్వాత రోటీ మెత్తదనం తగ్గుతుంది. అదే సమయంలో పూర్తిగా మూసివేసిన డబ్బాలో ఎక్కువ ఆవిరి ఉంటే రోటీ పొడిగా కాకుండా తడిగా, జిగురుగా మారుతుంది. కాబట్టి రోటీని ఎక్కువసేపు మెత్తగా ఉంచాలంటే అదనపు ఆవిరిని బయటకు పంపి, రోటీ పూర్తిగా ఆరిపోకుండా చూసుకోవడం ముఖ్యం.

ఈ 5 విషయాలు గుర్తుంచుకోండి

* పెనం నుంచి తీసిన వెంటనే రోటీని గాలి చొరబడని డబ్బాలో పెట్టొద్దు.

* ప్యాక్ చేసే ముందు ఆవిరి కాసేపు బయటకు పోనివ్వండి.

* రోటీలను పొడి కాటన్ క్లాత్‌లో చుట్టి ఉంచండి.

* రోటీని అవసరానికి మించి కాల్చవద్దు.

* రోటీ, కూరలను వీలైనంత వరకు వేరువేరుగా ప్యాక్ చేయండి.