Onion Rice Recipe: అమ్మల కష్టానికి ఫుల్ స్టాప్.. ఉదయాన్నే హడావిడి లేకుండా 10నిమిషాల్లో టేస్టీ, హెల్తీ లంచ్ బాక్స్ రెసిపీ..

Onion Rice Recipe: ప్రతిరోజూ ఉదయం పిల్లల లంచ్ బాక్స్ కోసం తల్లులు పడే కష్టాలు వర్ణనాతీతం. పోషకాహారం, రుచి, కొత్తదనం, సమయం, పిల్లల ఇష్టాయిష్టాలను బ్యాలెన్స్ చేయడం వారికి పెద్ద సవాలుగా మారుతుంది. రోజూ ఏం పెట్టాలి? అనే ఆలోచన, ఒకే రకమైన ఆహారం పెడితే పిల్లలు తినకపోవడం, బాక్స్ ఖాళీ చేయకపోవడం వంటివి తరచూ జరుగుతుంటాయి. పిల్లలను నిద్రలేపి, తయారీ చేసి, బ్రేక్‌ఫాస్ట్, లంచ్ బాక్స్ సిద్ధం చేయడానికి టైమ్ సరిగ్గా సరిపోదు. అలాంటి వాళ్ల కోసం ఓ మంచి రెసిపీని తీసుకొచ్చాం. ఉదయాన్నే హడావిడిలేకుండా 10నిమిషాల్లో చేసుకొనే లంచ్ బాక్స్ రెసిపీల్లో ఉల్లిపాయ అన్నం (Onion Rice) ఒకటి. దీన్ని ఎంతో ఈజీగా, తక్కువ సమయంలో చేసుకోగలం. రుచి కూడా అద్భుతంగా ఉంటుంది. మీ పిల్లలు టిఫిన్ బాక్స్ ఖాళీ చేయడం పక్కా! ఈ రెసిపీని ఎలా తయారు చేయాలో ఇప్పుడు చూద్దాం..

READ MORE: Supreme Court: మహాభారతం పోరాటంలాగా ఉంది.. విడాకులిస్తూ సుప్రీంకోర్టు అసహనం

కావలసిన పదార్థాలు:
అన్నం: ఒక పెద్ద కప్పు (ముందే వండినది)
ఉల్లిపాయలు: 2 పెద్దవి (పొడవుగా కోసిన ముక్కలు)
పచ్చిమిర్చి: 2-3
మసాలా దినుసులు: ఆవాలు, జీలకర్ర, కొద్దిగా కరివేపాకు
రుచికి సరిపడా: ఉప్పు, చిటికెడు పసుపు, కారం
నూనె లేదా నెయ్యి: సరిపడా

తయారీ విధానం:
పోపు పెట్టడం: ముందుగా బాణలిలో నూనె లేదా నెయ్యి వేడి చేయాలి. అందులో ఆవాలు, జీలకర్ర వేసి చిటపటలాడనివ్వాలి. ఆపై కరివేపాకు, పచ్చిమిర్చి వేసి వేయించాలి. ఇప్పుడు సన్నగా, పొడవుగా తరిగిన ఉల్లిపాయ ముక్కలను వేసి దోరగా వేయించాలి. ఉల్లిపాయలు ఎంత బాగా వేగితే అన్నానికి అంత మంచి రుచి వస్తుంది.ఉల్లిపాయలు వేగాక అందులో పసుపు, ఉప్పు, కారం వేసి కలపాలి. ఇప్పుడు ముందే వండి పెట్టుకున్న అన్నాన్ని ఇందులో వేసి, మసాలాలన్నీ అన్నానికి బాగా పట్టేలా మెల్లగా కలుపుకోవాలి. రెండు నిమిషాల పాటు తక్కువ మంట మీద వేడి చేసి, చివరగా కొద్దిగా కొత్తిమీర చల్లుకుంటే వేడివేడి ఆనియన్ రైస్ సిద్ధం! ఈ ఉల్లిపాయ అన్నాన్ని చల్లని రైతా (పెరుగు పచ్చడి), అప్పడం లేదా ఆవకాయతో కలిపి తింటే అమృతంలా ఉంటుంది.