Summer Health : ఎండకాలంలో లీచీ పండు తింటే ఏమవుతుందో తెలుసా..? అమృతం అనుకుంటే ప్రమాదమే.!

వేసవి కాలం వచ్చిందంటే చాలు రసవంతమైన, తియ్యటి లిచీ పండ్లు మార్కెట్లో సందడి చేస్తుంటాయి. ఈ కాలంలో లిచీ పండ్లను తినడం నాలికకు ఎంతో రుచిని, మనస్సుకు ఆనందాన్ని ఇస్తుంది. ఇవి కేవలం రుచికరంగా ఉండటమే కాకుండా విటమిన్ సి, ఫైబర్, పొటాషియం , యాంటీఆక్సిడెంట్లతో నిండి ఉంటాయి. ఎండల తీవ్రతకు శరీరం డీహైడ్రేట్ అవ్వకుండా కాపాడటంలో, అలాగే రోగనిరోధక శక్తిని బలోపేతం చేయడంలో ఇవి అద్భుతంగా సహాయపడతాయి. అందుకే చాలామంది వీటిని కిలోల కొద్దీ తెచ్చుకుని మరీ ఇష్టంగా తింటారు. అయితే, అమృతం లాంటి ఈ లిచీ పండ్లను అతిగా తినడం వల్ల ఊహించని ఆరోగ్య సమస్యలు కొనితెచ్చుకున్నట్లేనని ఆరోగ్య నిపుణులు హెచ్చరిస్తున్నారు. ముఖ్యంగా ఖాళీ కడుపుతో లేదా అధిక పరిమాణంలో వీటిని తింటే శరీరంపై తీవ్రమైన ప్రతికూల ప్రభావాలు పడే అవకాశం ఉంది.

ఎక్కువగా లిచీ పండ్లు తింటే ఏమవుతుంది?
ప్రముఖ ఆయుర్వేద నిపుణులు వివరించిన ప్రకారం, లిచీ పండు తినడం ఆరోగ్యానికి ఎంతో మంచిదే అయినప్పటికీ, మోతాదు మించితే మాత్రం అది రివర్స్ కొడుతుంది. ముఖ్యంగా ఉదయాన్నే ఖాళీ కడుపుతో ఈ పండ్లను తినడం వల్ల రక్తంలో చక్కెర స్థాయిలు ఒక్కసారిగా ప్రభావితమవుతాయి. లిచీలో ఉండే కొన్ని సహజ రసాయన పదార్థాల వల్ల అకస్మాత్తుగా బ్లడ్ షుగర్ పడిపోవడం లేదా హెచ్చుతగ్గులు రావడం జరిగి నీరసం, తీవ్రమైన తలనొప్పి, కళ్ళు తిరగడం, అలసట వంటి సమస్యలు తలెత్తుతాయి. అంతేకాకుండా, వేసవిలో ఒకేసారి ఎక్కువ మొత్తంలో లిచీ పండ్లను లాగించేయడం వల్ల కడుపు నొప్పి, గ్యాస్, అజీర్తి, విరేచనాలు (మోషన్స్) , శరీరంలో వేడి పెరిగిపోయి కొన్ని రకాల అలర్జీలు కూడా వచ్చే ప్రమాదం ఉంది.

లిచీని సరైన పద్ధతిలో ఎలా తినాలి?
లిచీ పండ్ల ద్వారా పూర్తి పోషకాలు లభించాలన్నా, ఎలాంటి సైడ్ ఎఫెక్ట్స్ రాకుండా ఉండాలన్నా వాటిని తినే విధానంలో కొన్ని నియమాలు పాటించాలి. నిపుణుల అభిప్రాయం ప్రకారం, ఏ వయసు వారైనా సరే రోజుకు 8 నుండి 10 లిచీ పండ్లను మాత్రమే తినడం సురక్షితం. మార్కెట్ నుండి తెచ్చిన తర్వాత వాటిని నీటిలో శుభ్రంగా కడిగిన తర్వాతే వలుచుకుని తినాలి. ఎట్టి పరిస్థితుల్లోనూ ఖాళీ కడుపుతో వీటిని ముట్టకూడదు, ఏదైనా ఆహారం తిన్న తర్వాత మాత్రమే స్నాక్‌లా తీసుకోవాలి. అలాగే పిల్లలకు ఇచ్చేటప్పుడు మరింత పరిమిత పరిమాణంలో, అంటే రోజుకు నాలుగైదు కంటే ఎక్కువ ఇవ్వకూడదు. ఒకవేళ లిచీ పండ్లను ఫ్రిజ్‌లో నిల్వ ఉంచినట్లయితే, వాటిని బయటకు తీసిన వెంటనే తినకుండా కాసేపు పక్కన పెట్టి, అవి పూర్తిగా గది ఉష్ణోగ్రతకు (Room Temperature) వచ్చిన తర్వాతే తినడం ఆరోగ్యానికి ఎంతో ఉత్తమం.

ఈ ఆరోగ్య సమస్యలు ఉన్నవారు అస్సలు తినకూడదు!
లిచీ పండ్లు అందరికీ అమృతం కావు, కొంతమంది వీటిని తినేటప్పుడు చాలా జాగ్రత్తగా ఉండాలి లేదా పూర్తిగా దూరంగా పెట్టాలి. ముఖ్యంగా మధుమేహం (డయాబెటిస్) ఉన్నవారు, అలాగే రక్తంలో చక్కెర స్థాయిలు తక్కువగా ఉండే హైపోగ్లైసీమియా సమస్య ఉన్నవారు లిచీ పండ్లను తినే ముందు ఖచ్చితంగా డాక్టర్ సలహా తీసుకోవాలి. ఎందుకంటే ఇవి బ్లడ్ షుగర్ లెవెల్స్‌ను వేగంగా మార్చేస్తాయి. వీరితో పాటు తరచుగా అలర్జీల బారిన పడేవారు, కడుపు ఉబ్బరం లేదా ఇతర తీవ్రమైన జీర్ణకోశ సమస్యలతో బాధపడేవారు కూడా ఎండకాలంలో ఈ పండ్లను ఎక్కువగా తినడం అస్సలు మంచిది కాదు. కాబట్టి, ఈ వేసవిలో రుచికరమైన లిచీలను ఆస్వాదించండి.. కానీ పరిమితి లోపల తిని ఆరోగ్యాన్ని కాపాడుకోండి.