US-Venezuela War: వెనిజులా‌పై దాడి, అధ్యక్షుడి నిర్భందానికి కారణం ఇదేనా?.. యూఎస్ దాడుల వెనుక షాకింగ్ నిజాలు..

US-Venezuela War: అమెరికా, వెనిజులా మధ్య ఉద్రిక్తతలు తారాస్థాయికి చేరాయి. ఈ రోజు తెల్లవారుజామున అమెరికా, వెనిజులాపై విరుచుకుపడింది. ముఖ్యంగా రాజధాని కారకస్‌పై బాంబుల వర్షం కురిపించింది. ఏం జరిగిందో తెలిసేలోగా, ఆ దేశ అధ్యక్షుడు నికోలస్ మదురో, ఆయన భార్యను నిర్బంధించినట్లు అమెరికా అధ్యక్షుడు ట్రంప్ ప్రకటించడంతో ఒక్కసారిగా ప్రపంచం షాక్‌ అయింది. వెనిజులాపై భారీగా దాడులు చేసినట్లు ట్రంప్ సోషల్ మీడియా వేదికగా ప్రకటించారు. మదురోను వెనిజులా నుంచి అమెరికా పట్టుకెళ్లినట్లు చెప్పారు.

గత కొన్ని రోజులుగా రెండు దేశాల మధ్య యుద్ధమేఘాలు కమ్ముకున్నాయి. మదురో ప్రభుత్వాన్ని చట్టవిరుద్ధమని చెబుతోంది. తాజాగా, ఆ దేశ అధ్యక్షుడినే అదుపులోకి తీసుకోవడం చర్చనీయాంశంగా మారింది. మాదకద్రవ్యాలు, వలసలు, జాతీయ భద్రత పేరు చెబుతూ అమెరికా ఈ ఈ దాడులకు పాల్పడింది.

వెనిజులాపై అమెరికా ఎందుకు దాడి చేసింది?

వెనిజులా నుంచి డ్రగ్స్ భారీ ఎత్తున అమెరికాలోకి వస్తున్నాయని ట్రంప్ ప్రధాన ఆరోపణ. మరోవైపు, ఆ దేశం నుంచి యూఎస్‌లోకి వలసలు కూడా పెరిగాయి. అమెరికా దక్షిణ సరిహద్దును దాటుతున్న వారిలో వెనిజులా నుంచి వచ్చే వారే అధికంగా ఉంటున్నారని ట్రంప్ ఆరోపిస్తున్నారు. నివేదికల ప్రకారం, 2013 నుండి, దాదాపు ఎనిమిది మిలియన్ల మంది వెనిజులా ప్రజలు ఆర్థిక పతనం, రాజకీయ అణచివేత నుండి పారిపోయారని అంచనా. వీరిలో ఎక్కువ మంది లాటిన్ అమెరికాలోని ఇతర ప్రాంతాలలో పునరావాసం పొందారు. మదురో కావాలనే తన జైళ్లలోని ఖైదీలను అమెరికా వెళ్లమని బలవంతం చేస్తున్నారని ట్రంప్ ఆరోపించారు. అయితే, వెనిజులా మాత్రం ఈ ఆరోపణల్ని తీవ్రంగా ఖండించింది.

రెండో కారణం డ్రగ్స్. వెనిజులా కోకైన్‌కు ప్రధానంగా రవాణా మార్గం. USలో ఫెంటానిల్ సంక్షోభానికి దోహదపడుతుందని ట్రంప్ వాదించారు. వెనిజులా నేర సంస్థలైన ట్రెన్ డి అరగువా మరియు కార్టెల్ డి లాస్ సోలెస్ లను విదేశీ ఉగ్రవాద సంస్థలుగా (FTOలు) ప్రకటించారు. ఈ రెండవ సంస్థకు స్వయంగా మదురోనే నాయకత్వం వహిస్తున్నారని ట్రంప్ ఆరోపించారు.

కారకాస్‌పై దాడులు, మదురో అరెస్ట్:

ట్రంప్ చెబుతున్న దాని ప్రకారం.. వెనిజులాకు వ్యతిరేకంగా అమెరికా చిన్న, తీవ్రమైన ఆపరేషన్ నిర్వహించింది. మదురోను ఆయన భార్యను బంధించి వెనిజులా నుంచి బయటకు తీసుకెళ్లారు. ఈ అరెస్ట్‌లో యూఎస్ అధికారులు పాల్గొన్నారని చెప్పారు. తమ దళాలు అద్భుతంగా పనిచేశాయని యూఎస్ ఆర్మీపై ట్రంప్ ప్రశంసలు కురిపించారు. మరోవైపు, తమ పౌరులపై, సైనిక స్థావరాలపై అమెరికా దాడులు చేసిందని వెనిజులా ఆరోపించింది.

గత కొన్ని నెలలుగా ఘర్షణ:

గత కొన్ని నెలలుగా అమెరికా, వెనిజులా మధ్య ఘర్షణ వాతావరణం నెలకొంది. ఎప్పుడైనా యూఎస్ వెనిజులాపై విరుచుకుపడొచ్చని పలు నివేదికలు చెప్పాయి. విమాన వాహక నౌక USS జెరాల్డ్ R ఫోర్డ్‌తో సహా కరేబియన్‌లో పెద్ద US నావికాదళం, వైమానిక దళాలు మోహరించాయి. వెనిజులా చమురును దిగ్భంధించే చర్యల్లో భాగంగా యూఎస్ రెండు చమురు ట్యాంకర్లను స్వాధీనం చేసుకుంది. మాదకద్రవ్యాల పడవలు ఉపయోగించే డాకింగ్ ప్రాంతాన్ని ధ్వంసం చేసినట్లు ట్రంప్ గతంలో అన్నారు. ఇదే వెనిజులాపై అమెరికా చేసిన మొదటిదాడి. అయితే, డ్రగ్స్ కార్టెల్‌ నాయకులతో తనకు ఎలాంటి సంబంధాలు లేవని మదురో చెబుతున్నారు.