Trump: ట్రంప్‌పై విమర్శలు.. ఒబామా దంపతుల కోతి బొమ్మల వీడియో తొలగింపు

మాజీ అమెరికా అధ్యక్షుడు ఒబామా, మాజీ ప్రథమ మహిళ మిచెల్ దంపతులను కోతులుగా చిత్రీకరిస్తూ ట్రంప్ సోషల్ మీడియాలో పోస్ట్ చేసిన వీడియోపై పెద్ద ఎత్తున విమర్శలు వెల్లువెత్తాయి. డెమోక్రాట్ నాయకులు తీవ్రంగా ధ్వజమెత్తారు. జాత్యహంకార దాడిగా అభివర్ణించారు. తొలుత విమర్శలను వైట్‌హౌస్ ఖండించినా.. కొద్దిసేపటి తర్వాత దిద్దుబాటు చర్యలు చేపట్టారు. విమర్శులు తీవ్ర రూపం దాల్చడంతో ట్రంప్ సోషల్ మీడియా నుంచి వీడియో తొలగించారు.

సోషల్ మీడియా నుంచి వీడియో తొలగించినట్లుగా వైట్‌హౌస్ ప్రకటించింది. సెనేట్ నుంచి తీవ్ర వ్యతిరేకత వ్యక్తమవ్వడంతో వీడియో తొలగించినట్లుగా తెలుస్తోంది. దాదాపు 12 గంటల తర్వాత వీడియోను డిలీట్ చేశారు.

బరాక్ ఒబామా.. రెండు పర్యాయలు అగ్ర రాజ్యం అమెరికాను పరిపాలించిన అధ్యక్షుడు. ప్రపంచ దేశాలతో మంచి సంబంధాలు కలిగిన నేతగా గుర్తింపు పొందారు. అలాంటి నేతపై ప్రస్తుత అమెరికా అధ్యక్షుడు ట్రంప్ అనుచిత చర్యకు పాల్పడ్డారు. బరాక్ ఒబామా, మిచెల్ ఒబామా దంపతులను కోతులుగా చిత్రీకరించి ట్రూత్ సోషల్ మీడియాలో ట్రంప్ పోస్ట్ చేశారు. వీడియోలో ‘‘ది లయన్ స్లిప్స్ టునైట్’’ పాట ప్లే అవుతుండగా మాజీ అధ్యక్షుడు బరాక్ ఒబామా, మాజీ ప్రథమ మహిళ మిచెల్ ఒబామా ముఖాలు కోతి రూపాల్లో ఒక క్షణం పాటు కనిపించాయి. అంతేకాకుండా 2020 ఎన్నికల్లో మోసం జరిగిందంటూ ఆరోపణలు గుప్పించారు.

ఇది కూడా చదవండి: Mumbai: ముంబై మేయర్‌గా రీతూ తాన్డే.. డిప్యూటీ మేయర్‌గా సంజయ్ ఘడి ఎన్నిక

అయితే వీడియోపై పెద్ద ఎత్తున విమర్శలు వెల్లువెత్తున్నాయి. ఇది చాలా అసహ్యకరమైన ప్రవర్తన అంటూ కాలిఫోర్నియా గవర్నర్ గవిన్ న్యూసమ్ పేర్కొన్నారు. ‘‘అధ్యక్షుడి అసహ్యకరమైన ప్రవర్తన. ప్రతి ఒక్కరు రిపబ్లికన్ నేత తీరును ఖండించాలి.’’ అని న్యూసమ్ ఎక్స్‌లో రాశారు. చరిత్రలో ట్రంప్ ఒక మచ్చ అని.. ‘‘జాత్యహంకరం’’ అని మాజీ జాతీయ భద్రతా సలహాదారు, ఒబామా సన్నిహితుడు బెన్ రోడ్స్ అభివర్ణించారు. ఇక డెమోక్రాట్ల విమర్శలను ‘‘నకిలీ ఆగ్రహం’’గా వైట్‌హౌస్ కొట్టిపారేసింది. మొత్తానికి సెనేట్ నుంచి కూడా తీవ్ర వ్యతిరేకత వ్యక్తమవ్వడంతో 12 గంటల తర్వాత వీడియోను వైట్‌హౌస్ తొలగించింది.

 

U.S. President Donald Trump posted this on Truth Social, which featured the Obamas as monkeys. pic.twitter.com/f0ovYjPnDy

— Open Source Intel (@Osint613) February 6, 2026