Strait of Hormuz: అమెరికా అధ్యక్షుడు డొనాల్డ్ ట్రంప్ అమెరికా మ్యాప్లో ‘‘హార్ముజ్ జలసంధి’’ని చేర్చారు. దీనిని తన ట్రూత్ సోషల్లో పోస్ట్ చేశారు. వ్యూహాత్మక ఈ కీలక జలసంధికి ‘‘కొత్త అమెరికా భూభాగం’’ అని పేర్కొన్నారు. అమెరికా-ఇరాన్ యుద్ధంలో ఈ జలసంధి కీలకంగా మారింది. ఇదే సమయంలో ఇరాన్ మాత్రం ఈ జలసంధి గుండా రాకపోకల్ని పూర్తిగా తెరవడానికి నిరాకరిస్తోంది. అమెరికా తాత్కాలిక శాంతి ఒప్పందంలో ఇచ్చిన హామీలను అమలు చేసే వరకు జలసంధిని తెరిచేది లేదని తేల్చి చెప్పింది.
ఇదిలా ఉంటే, హార్ముజ్పై పూర్తి నియంత్రణ కలిగి ఉన్నామని ట్రంప్ చెప్పారు. అమెరికా ఇప్పటికే ఇరాన్పై నేవీ దిగ్బంధంతో హార్ముజ్ను ఆధీనంలోకి తీసుకున్నామని అన్నారు. ఇరాన్ నేత మహమ్మద్ ఘాలీబాఫ్ హార్ముజ్ జలసంధిని వెంటనే తెరిచే అవకాశం లేదని స్పష్టం చేశారు. అమెరికా నేవీ దిగ్బంధాన్ని ఎత్తేయాలని, ఇరాన్పై విధించిన చమురు ఆంక్షల్ని తొలగించాలని, విదేశాల్లో నిలిపేసిన ఇరాన్ ఆస్తుల్ని విడుదల చేయాలని డిమాండ్ చేశారు.
అమెరికా-ఇరాన్ యుద్ధంలో హార్ముజ్ కీలకంగా మారింది. ఈ జలసంధి గుండా 20 శాతం ఆయిల్, గ్యాస్ సప్లై జరుగుతోంది. యుద్ధం వల్ల రవాణాకు ఇబ్బందులు ఏర్పడటంతో ప్రపంచవ్యాప్తంగా ఇంధన భద్రతకు సమస్యలు ఎదురయ్యాయి. అమెరికా వెనక్కి తగ్గే వరకు జలసంధిని ఓపెన్ చేయబోమని ఇరాన్ చెబుతోంది. హర్ముజ్పై హక్కుల్ని వదులుకుని, ఓపెన్ చేయాలని యూఎస్ హెచ్చరిస్తోంది.