Pakistan: పాకిస్తాన్లో పలు ప్రాంతాల్లో భారీ వర్షాలు కురుస్తున్నాయి. గత 48 గంటల్లో కురిసిన వర్షాలకు ఆ దేశంలో 37 మంది మరణించారని అధికారులు ఆదివారం తెలిపారు. పాక్ వ్యాప్తంగా కురుస్తున్న వర్షాలకు ఇళ్లు కూలిపోవడం, కొండ చరియలు విరిగిపడటం జరుగుతోంది. ముఖ్యంగా వాయువ్య ప్రాంతంలోని ఖైబర్ ఫఖ్తున్ఖ్వా ప్రావిన్స్ తవ్రంగా ప్రభావితం అవుతోంది. ఆఫ్ఘనిస్తాన్ సరిహద్దుల్లో ఉన్న ఖైబర్ ప్రావిన్సులో గురువారం రాత్రి నుంచి మొదలైన భారీ వర్షాల కారణంగా 27 మంది మరణించారని, వీరిలో ఎక్కువగా చిన్నారులు ఉన్నారని ప్రావిన్షియల్ డిజాస్టర్ మేనేజ్మెంట్ అథారిటీ వెల్లడించింది.
Read Also: PM Modi: దేశవ్యాప్తంగా ప్రధాని మోడీ పర్యటన.. 10 రోజుల్లో 12 రాష్ట్రాల్లో కార్యక్రమాలు..
ఖైబర్ ఫఖ్తున్ఖ్వా ప్రావిన్స్లోని బజౌర్, స్వాత్, లోయర్ దిర్, మలాకండ్, ఖైబర్, పెషావర్, ఉత్తర, దక్షిణ వజీరిస్థాన్ మరియు లక్కీ మార్వాట్ సహా పది జిల్లాల్లో కుండపోత వర్షాలు కురిశాయి. ఆ ప్రాంత ముఖ్యమంత్రి అలీ అమీన్ గండాపూర్ మాట్లాడుతూ.. బాధితులను ఒంటరిగా వదిలిపెట్టమని, వారికి పరిహారం ఇస్తామని ప్రకటించారు. బలూచిస్తాన్ గ్వాదర్ తీర ప్రాంత పట్టణాన్ని వరదలు ముంచెత్తడంతో ఐదుగురు మరణించారు. గ్వాదర్ ప్రాంతంలో రెండు రోజులుగా కురుస్తున్న వర్షాలకు ప్రజలు నిరాశ్రయులయ్యారు. పాక్ ఆక్రమిత కాశ్మీర్లో కూడా వర్షాల వల్ల ప్రాణ, ఆస్తి నష్టాలు సంభవించినట్లు అక్కడి అధికారులు వెల్లడించారు.
ఉత్తర గిల్గిట్ బాల్టిస్తాన్ ప్రాంతంలో వర్షాల కారణంగా మంచు, కొండచరియలు విరిగిపడటంతో పాకిస్తాన్ చైనాను కలిపే రహదారి చాలా చోట్ల దెబ్బతింది. పర్యాటకులు ఈ ప్రాంతానికి వెళ్లొద్దని అధికారులు సూచించారు. 2022లో పాకిస్తాన్ వ్యాప్తంగా భారీ వర్షాలు, వరదలు సంభవించాయి. ఆ సమయంలో 1800 మంది మరనించారు. 3.3 కోట్ల మంది ప్రభావితమయ్యారు. దాదాపుగా 80 లక్షల మంది ప్రజలు నిరాశ్రయులయ్యారు. ఆ విపత్తు నుంచే ఇప్పటికీ పాకిస్తాన్ కోలుకోవడం లేదు. ఓ రకంగా చెప్పాలంటే పాక్ ఆర్థిక సంక్షోభానికి ఈ వర్షాలు కూడా కారణమయ్యాయి.
