Diwali at White House: వైట్‌హౌస్‌లో దీపావళి వేడుకలు.. ట్రంప్‌కు హనుమాన్ చాలీసా అందించిన భారతీయ వ్యాపారవేత్త

Diwali at White House: అమెరికా అధ్యక్షుడు డొనాల్డ్ ట్రంప్‌కు భారతీయ సంస్కృతి, సంప్రదాయాలకు సంబంధించిన ఓ ప్రత్యేక బహుమతి అందింది. అమెరికాలోని వైట్‌హౌస్‌లో నిర్వహించిన దీపావళి వేడుకల్లో భారతీయ మూలాలున్న వ్యాపారవేత్త విశాల్ గోండల్.. ట్రంప్‌కు తులసీదాస్ రచించిన హనుమాన్ చాలీసా ప్రతిని బహుమతిగా అందించారు. దీంతో ఈ విషయం ప్రస్తుతం సోషల్ మీడియాలో చర్చనీయాంశంగా మారింది.

భారతదేశంలో దీపావళి పండుగను ఎంతో ఘనంగా జరుపుకుంటారు. దేశవ్యాప్తంగా ఇళ్లు, వ్యాపార సముదాయాలు దీపాలు, విద్యుత్ కాంతులతో వెలిగిపోతుంటాయి. అయితే దీపావళి వేడుకలు కేవలం భారతదేశానికే పరిమితం కాలేదు. అమెరికా సహా ప్రపంచంలోని పలు దేశాల్లోనూ భారతీయులు ఈ పండుగను ఉత్సాహంగా జరుపుకుంటారు. అమెరికాలో ప్రతి సంవత్సరం వైట్‌హౌస్‌లో నిర్వహించే దీపావళి వేడుకలు కూడా ప్రత్యేక ఆకర్షణగా నిలుస్తాయి.

వైట్‌హౌస్‌లోని ఓవల్ ఆఫీస్‌లో నిర్వహించిన దీపావళి వేడుకల్లో భారతీయ సంస్కృతి, సంప్రదాయాలు ప్రత్యేకంగా కనిపించాయి. ఈ కార్యక్రమంలో పాల్గొన్న భారతీయ మూలాలున్న వ్యాపారవేత్త విశాల్ గోండల్ అమెరికా అధ్యక్షుడు డొనాల్డ్ ట్రంప్‌ను కలిశారు. ఈ సందర్భంగా తులసీదాస్ రచించిన హనుమాన్ చాలీసా పుస్తకాన్ని ట్రంప్‌కు బహుమతిగా అందించారు. భారతదేశంలో లక్షలాది మంది భక్తిశ్రద్ధలతో పఠించే హనుమాన్ చాలీసాను అమెరికా అధ్యక్షుడికి అందించడం ప్రత్యేకంగా నిలిచింది. ట్రంప్‌తో కలిసి ఓవల్ ఆఫీస్‌లో దీపావళి వేడుకల్లో పాల్గొనడం తనకు ఎంతో ప్రత్యేకమైన అనుభవమని విశాల్ గోండల్ సోషల్ మీడియా ద్వారా వెల్లడించారు. ఈ సందర్భంగా హనుమాన్ చాలీసాను బహుమతిగా అందించిన విషయాన్ని కూడా పంచుకున్నారు.

వైట్‌హౌస్‌లో జరిగిన దీపావళి వేడుకలకు భారతీయ మూలాలున్న పలువురు ప్రముఖులు హాజరయ్యారు. ప్రముఖ మిషెలిన్ స్టార్ చెఫ్ వికాస్ ఖన్నా, కెనడా మాజీ ఎంపీ రూబీ ధల్లా తదితరులు ఈ కార్యక్రమంలో పాల్గొన్నారు. ఈ వేడుకల ద్వారా భారతీయ సమాజానికి చెందిన సాంస్కృతిక వారసత్వం, సంప్రదాయాలు, దీపావళి పండుగ విశిష్టతను ప్రదర్శించారు. అమెరికా అధ్యక్ష కార్యాలయంలో భారతీయ సంస్కృతికి ప్రాధాన్యత లభించడం భారతీయుల దృష్టిని ఆకర్షించింది.

ఇదిలా ఉండగా, వైట్‌హౌస్‌లో దీపావళి వేడుకలు జరుగుతున్న సమయంలో అమెరికా పరిపాలనలో మరో కీలక పరిణామం చోటుచేసుకుంది. తనకు అత్యంత సన్నిహితుడైన స్టీఫెన్ మిల్లర్‌ను తదుపరి వైట్‌హౌస్ చీఫ్ ఆఫ్ స్టాఫ్‌గా నియమించనున్నట్లు అధ్యక్షుడు డొనాల్డ్ ట్రంప్ ప్రకటించారు. ప్రస్తుతం డిప్యూటీ చీఫ్ ఆఫ్ స్టాఫ్‌గా పనిచేస్తున్న స్టీఫెన్ మిల్లర్‌కు ట్రంప్‌తో సుదీర్ఘకాలంగా సన్నిహిత సంబంధాలు ఉన్నాయి. ఈ నియామక ప్రకటన కూడా అమెరికా రాజకీయాల్లో చర్చనీయాంశంగా మారింది.