CJI Justice NV Ramana: ఆర్భిట్రేషన్ సెంటర్ తో హైదరాబాద్‌ కి మరింత ఖ్యాతి

హైదరాబాద్‌లో రూపుదిద్దుకుంటున్న ఇంటర్నేషనల్ ఆర్బిట్రేషన్ అండ్ మీడియేషన్ సెంటర్ వల్ల హైదరాబాద్‌ ఖ్యాతి మరింతగా పెరుగుతుందన్నారు సుప్రీంకోర్ట్ చీఫ్‌ జస్టిస్ ఎన్వీ రమణ. గచ్చిబౌలి లో IAMC నిర్మాణానికి భూమిపూజ చేశారు చీఫ్ జస్టిస్ ఎన్.వీ. రమణ. భారతదేశంలో మొదటి IAMC అంతర్జాతీయ మధ్యవర్తిత్వ కేంద్రం నిర్మాణానికి హైదరాబాద్ వేదిక కావడం గొప్ప విశేషం అన్నారు. IAMC నిర్మాణానికి గచ్చిబౌలి లోని ఐకియా వద్ద 3.7 ఎకరాల భూమిని ఇచ్చింది తెలంగాణ ప్రభుత్వం.

ఈ కార్యక్రమానికి మంత్రులు మహమూద్ అలీ, కేటీఆర్, తలసాని శ్రీనివాస్ యాదవ్, ఇంద్రకరణ్ రెడ్డి, సబితా ఇంద్రారెడ్డి, శ్రీనివాస్ గౌడ్ హాజరయ్యారు. సుప్రీంకోర్టు జడ్జీలు హిమా కోహ్లీ, నాగేశ్వరరావు, తెలంగాణ రాష్ట్ర హైకోర్టు సీజే సతీష్ చంద్ర శర్మ, ఏపీ హైకోర్టు సీజే ప్రశాంత్ కుమార్ హాజరయ్యారు.

ఇప్పటికే హైదరాబాద్ లో అంతర్జాతీయ మధ్యవర్తిత్వ కేంద్రం కొనసాగుతోంది. దీనికి భూమి పూజ చేయడం చాలా సంతోషంగా ఉంది. ఎంతో విలువైన భూమిని గచ్చిబౌలి లో కేటాయించినందుకు సీఎం కేసీఆర్ కు ధన్యవాదాలు తెలిపారు జస్టిస్ ఎన్వీ రమణ. 50 కోట్ల రూపాయలు నిర్మాణానికి కేటాయించడం ముందడుగు అన్నారు. అంతర్జాతీయ మధ్యవర్తిత్వ కేంద్రం వల్ల హైదరాబాద్ కు మరింత పేరు వస్తుంది. సింగపూర్ మాదిరిగా హైదరాబాద్ కేంద్రం కూడా ప్రపంచ ఖ్యాతి పొందాలన్నారు. వచ్చే ఏడాది ఈ సమయానికి భవన నిర్మాణం పూర్తి కావాలని ఆశిస్తున్నా అన్నారు.

ఆర్బిట్రేషన్ మీడియేషన్ సెంటర్ భవన నిర్మాణానికి సహకరించినందుకు తెలంగాణ ప్రభుత్వానికి కృతజ్ఞతలు తెలిపారు సుప్రీంకోర్టు జడ్జి లావు నాగేశ్వరరావు. ఆర్బిట్రేషన్ సెంటర్ నిర్మాణానికి సహకరించిన సీజేఐ, తెలంగాణ సీఎం కేసీఆర్, మంత్రి కేటీఆర్ కి ధన్యవాదాలు తెలియజేశారు. ఈ కార్యక్రమానికి ముఖ్యమంత్రి రావాల్సి ఉంది కానీ స్వల్ప అస్వస్థత వల్ల రాలేకపోయారు. ఆయన త్వరగా కోలుకోవాలని ప్రజలకు మంచి సేవలందించాలని భగవంతుని కోరుకుంటున్నాను. ఈ సెంటర్ సింగపూర్ లండన్ ఆర్బిట్రేషన్ సెంటర్ కు ఉన్నంత పేరు రావాలని కోరుకుంటున్నా అన్నారు లావు నాగేశ్వరరావు.