Honor Killing : ఇష్టం లేని పెళ్లి చేసుకుందని కన్న కూతురిని చంపేసి తగులబెట్టేశారు!

Honor Killing : ఇటీవలి కాలంలో యువత ప్రేమ అంటూ లేని చిక్కులు తెచ్చుకుంటున్నారు. పెద్దలను ఎదిరించి ప్రేమించి పెళ్లి చేసుకుని ప్రాణాలు పోగొట్టుకుంటున్నారు. కూతురు ప్రేమించిన వ్యక్తి తమ కులానికి చెందిన వ్యక్తి కాదని కన్న తల్లిదండ్రులు దారుణాలకు పాల్పడిన ఘటనలు చాలానే ఉన్నాయి. సమాజంలో పరువు ఎక్కడపోతుందో అని భావించిన తల్లిదండ్రులు ప్రాణాలు కూడా తీసేందుకు వెనకాడటం లేదు. ఈ క్రమంలో ఓ సంచలన ఘటన వెలుగు చూసింది. తమకు ఇష్టంలేని పెళ్లి చేసుకున్నందుకు సొంత కుటుంబీకులే కూతురిని కిరాతకంగా హత్య చేసిన ఘటన రాజస్థాన్‌లోని ఝలావర్‌లో వెలుగు చూసింది. 24 ఏళ్ల యువతి తనకు నచ్చిన వ్యక్తిని పెళ్లి చేసుకున్నందుకు ఆమె కుటుంబ సభ్యులే హత్య చేశారు. వివరాల ప్రకారం.. భర్త ముందే మహిళను కుటుంబ సభ్యులు కిడ్నాప్ చేశారు. తరువాత ఆమెను చంపి, ఆమె మృతదేహాన్ని శ్మశాన వాటికలో కాల్చారు.

Read Also: Rahul Gandhi : హత్రాస్ ప్రమాదానికి ఎవరు బాధ్యులు.. రాహుల్ భోలే బాబా గురించి ఏం చెప్పారంటే ?

ఈ కేసుకు సంబంధించిన దర్యాప్తులో మహిళ తన కుటుంబ సభ్యులకు వ్యతిరేకంగా రవి భీల్‌ను వివాహం చేసుకున్నట్లు తేలింది. కుటుంబసభ్యుల ఆగ్రహానికి గురికాకుండా ఉండేందుకు దంపతులు వేరే ప్రాంతంలో మకాం వేశారు. మధ్యప్రదేశ్‌లోని ఓ గ్రామంలోని బ్యాంకుకు దంపతులు వస్తున్నారని కుటుంబ సభ్యులకు సమాచారం అందడంతో అక్కడ ఆ యువతిని కిడ్నాప్ చేయాలని నిర్ణయించుకున్నారు. ప్లాన్‌ ప్రకారం కూతురిని కిడ్నాప్ చేశారు. అనంతరం ఆమెను హత్య చేశారు. ఫిర్యాదు చేసేందుకు భర్త పోలీసులను ఆశ్రయించగా.. అప్పటికే ఆమె శరీరాన్ని మంటల్లో తగులబెట్టారు. పోలీసులు సంఘటనా స్థలానికి చేరుకునే సరికి మహిళ శరీరం 80 శాతానికి పైగా కాలిపోయింది. ఆమె కుటుంబ సభ్యులు అక్కడి నుంచి పరారయ్యారు. మహిళ కాలిన అవశేషాలను తదుపరి విచారణ కోసం ఫోరెన్సిక్‌కు పంపించారు.