Zero Income Tax: జీతం రూ.20 లక్షలు.. అయినా ట్యాక్స్ కట్టేది సున్నా.. సీఏ చెప్పిన సీక్రెట్ ఇదే..

భారీగా జీతం వచ్చే వారు కూడా సరైన ఆర్థిక ప్రణాళికలు అనుసరించడం ద్వారా తమ పన్ను భారాన్ని చట్టబద్ధంగా గణనీయంగా తగ్గించుకోవచ్చు. ఆదాయపు పన్ను చట్టంలోని వివిధ సెక్షన్లను సద్వినియోగం చేసుకోవడం ద్వారా ట్యాక్సబుల్ ఇన్‌కమ్‌ను ఎలా తగ్గించుకోవచ్చో ఛార్టెడ్ అకౌంటెంట్ నిపుణులు వివరిస్తున్నారు. ఉదాహరణకు, రూ. 20 లక్షల వార్షిక ప్యాకేజీ (CTC) ఉన్న ఒక వ్యక్తి పాత పన్ను విధానాన్ని ఎంచుకుని, సరైన పెట్టుబడులు పెడితే పన్ను పరిధిలోకి వచ్చే ఆదాయాన్ని సుమారు రూ. 12.5 లక్షలకు తగ్గించుకోవచ్చు.

పన్ను ఆదా చేసే ముఖ్యమైన మార్గాలు..
హెచ్‌ఆర్‌ఏ (HRA) మినహాయింపు: సెక్షన్ 10(13A) కింద అద్దె ఇళ్లలో ఉండే ఉద్యోగులు తాము చెల్లించే అద్దెపై భారీగా మినహాయింపులు పొందవచ్చు. స్టాండర్డ్ డిడక్షన్ లో భాగంగా.. వేతన జీవులందరికీ రూ. 50,000 ఆటోమేటిక్ మినహాయింపు లభిస్తుంది.

సెక్షన్ 80C పెట్టుబడులు: ఈపీఎఫ్ (EPF), ఈఎల్ఎస్ఎస్ (ELSS) మ్యూచువల్ ఫండ్స్, పీపీఎఫ్ వంటి వాటిల్లో పెట్టుబడి పెట్టడం ద్వారా రూ. 1.5 లక్షల వరకు ఆదా చేయవచ్చు.

హెల్త్ ఇన్సూరెన్స్ (Section 80D): తనకు, కుటుంబ సభ్యులకు , సీనియర్ సిటిజన్లయిన తల్లిదండ్రులకు చెల్లించే ప్రీమియంలపై గరిష్టంగా రూ. 75,000 వరకు క్లెయిమ్ చేయవచ్చు.

నేషనల్ పెన్షన్ సిస్టమ్ (NPS): సెక్షన్ 80CCD(1B) కింద అదనంగా మరో రూ. 50,000 పొదుపు చేసుకోవచ్చు.

హోమ్ లోన్ సదుపాయం: సెక్షన్ 24(b) కింద గృహ రుణంపై చెల్లించే వడ్డీని జీతంలో సర్దుబాటు చేయడం ద్వారా భారీ ఊరట లభిస్తుంది.

ఇతర అలవెన్సులు: లీవ్ ట్రావెల్ అలవెన్స్ (LTA), సేవింగ్స్ ఖాతా వడ్డీల (80TTA) ద్వారా కూడా పన్ను తగ్గించుకోవచ్చు.

ఎక్కువ పెట్టుబడులు, మినహాయింపులు ఉన్నవారికి పాత విధానం, ఎలాంటి పెట్టుబడులు లేని వారికి కొత్త పన్ను విధానం ప్రయోజనకరంగా ఉంటాయి. పన్ను ప్లానింగ్ అనేది చట్టాన్ని గౌరవిస్తూ ఆర్థిక క్రమశిక్షణతో పొదుపును పెంచుకునే ఒక అద్భుతమైన మార్గం.